Tramp vystupić na terminova sklikanaj naradzie najvyšejšaha vajennaha kiraŭnictva ZŠA
Prezident ZŠA ŭ aŭtorak vystupić na naradzie najvyšejšaha vajennaha kiraŭnictva, terminova sklikanaj ministram abarony Pitam Chiehsietam, paviedamlaje Associated Press sa spasyłkaj na pradstaŭnika Biełaha doma.
Sotni hienierałaŭ i admirałaŭ — staršych kamandziraŭ u zvańni ad adnoj zorki i vyšej, a taksama ich hałoŭnych daradcaŭ — byli biez papiaredžańnia vyklikanyja ministram abarony Pitam Chiehsietam z usiaho śvietu na bazu marskoj piachoty ŭ Kvantyka (štat Virdžynija).
Pradstaŭnik Biełaha doma nie mieŭ paŭnamoctvaŭ raskryvać płany prezidenta da publičnaha abviaščeńnia pra jaho ŭdzieł i havaryŭ na ŭmovach ananimnaści.
U niadzielnym intervju NBC News Tramp skazaŭ, što jany (udzielniki sustrečy) «buduć havaryć pra toje, jak dobra my spraŭlajemsia ŭ vajennaj śfiery, pra toje, što my ŭ vydatnaj formie, pra šmat dobrych, pazityŭnych rečaŭ».
U publikacyi adznačajecca, što ŭdzieł Trampa ŭ sustrečy pavyšaje vierahodnaść palityzacyi mierapryjemstva pierad biespartyjnaj aŭdytoryjaj vajennych kiraŭnikoŭ.
Naprykład, piša AR, u červieni jon vystupiŭ pierad vajskoŭcami ŭ Fort-Brehie, u Paŭnočnaj Karalinie, z pramovaj u styli pieradvybarčaj kampanii, u jakoj krytykavaŭ svajho papiarednika Džo Bajdena.
Tramp taksama pašyraje prysutnaść vajskoŭcaŭ u amierykanskich haradach, arhumientujučy heta nieabchodnaściu baraćby sa złačynnaściu ŭ miescach, dzie demakratyčnyja lidary nie mohuć zabiaśpiečyć hramadskuju biaśpieku.
Kamientary