Hrodzienski pank-muzyka Dźmitryj Karpovič pamior 17 vieraśnia 2025 hoda. Jon byŭ pradstaŭnikom pank-sceny Hrodna, hraŭ u hurcie «Tvoj horad», a ŭ 2008 hodzie stajaŭ la vytokaŭ stvareńnia «DK imia Hreka» — miesca, dzie pravodzilisia andehraŭndnyja kancerty, piša Hrodna.life.
Pieršapačatkova zasnavany Dźmitryjem Karpovičam «DK imia Hreka» byŭ repietycyjnym punktam, jaki ź ciaham času pieratvaryzsia ŭ placoŭku dla kancertaŭ. U «DK» pryjazdžaŭ minski pank-hurt «Bostonskoje čajepitije», vystupali hrodzienskija hurty «V.K.Ł.» i «Kaljan».
Analizujučy ŭkład «DK» u raźvićcio hrodzienskaj niezaležnaj sceny, lidar hurta «Proŝaj Privyčka» Jaŭhien Nikicin adznačaŭ, što placoŭka stała dla jaho adpraŭnym punktam. «Enierhietyčna heta miesca mieła mahnit i heta vyjaŭlałasia ŭ tym, što ty tudy moh pryjści nie pa niejkaj pryčynie, a prosta tak».
Stylistyčnych ramak, jakija b strymlivali muzykaŭ, nie było. «Adzinaj umovaj dla praviadzieńnia kancerta była najaŭnaść elektryčnaści ŭ razietkach, dobry nastroj u vystupoŭcaŭ i taki ž nastroj u słuchačoŭ», — kaža Nikicin.
U «DK imia Hreka». Fota: Jaŭhien Kandratovič
Placoŭka praisnavała da 2012. Paśla budynak, dzie jana znachodziłasia, źnieśli dla budaŭnictva darožnaj raźviazki. Pa słovach Nikicina, praces zakryćcia byŭ «viałaciakučym». Kančatkovyja daty likvidacyi niekalki razoŭ pieranosili. «Skazać, što było baluča — heta značyć ničoha nie skazać, nam bolš nie było dzie śpiavać».
U 2017 fatohraf Jaŭhien Kandratovič arhanizavaŭ vystavu, pryśviečanuju historyi placoŭki «DK». Taksama ŭ adzinym ekzemplary była vydadziena kniha, u jakuju ŭvajšło 70 fota.
Raźvitańnie ź Dźmitryjem Karpovičam adbudziecca 19 vieraśnia ŭ hrodzienskim chramie Mikałaja Cudatvorca na vulicy Fiłareta, 1/1, paviedamili ŭ sacsietkach jahonyja znajomyja.
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary