Što budzie ź biełarusami, jakija paśpiejuć da zakryćcia miažy z Polščaj prajści kantrol tolki ŭ adzin bok?
Z nočy 12 vieraśnia Polšča całkam zakryvaje miažu ź Biełaruśsiu. Uźnikaje pytańnie: što budzie z tymi biełarusami, jakija ŭžo prajšli biełaruski kantrol, ale nie trapili na polski bok? Adkaz na jaho daviedałasia Tochka.by.
Pres-sakratar Dziaržpahrankamiteta Anton Byčkoŭski rastłumačyŭ, što biełaruskija pamiežniki buduć prapuskać transpart u bok Polščy da apošniaha. Čarha rezka pavialičyłasia, ale chutkaść prachodžańnia zaležyć i ad polskich słužbaŭ.
«Prapusknaja zdolnaść vykarystańnia lehkavych transpartnych srodkaŭ źnižanaja faktyčna da 50%, prapusknaja zdolnaść u dačynieńni da rehularnych aŭtobusaŭ składaje prykładna 2 aŭtobusy ŭ hadzinu», — raskazaŭ jon pra chutkaść polskaha boku.
Byčkoŭski padkreśliŭ: situacyi, kali ludzi zastanucca «pamiž dźviuma krainami», nie budzie, bo niejtralnaj terytoryi niama. Kali palaki nie prymuć padarožnikaŭ, jany mohuć viarnucca nazad u Biełaruś, prajšoŭšy ŭsie nieabchodnyja kantrolnyja pracedury.
Biełaruski bok hatovy da taho, što paśla zakryćcia polskich punktaŭ prapusku nahruzka ŭzraście na inšych napramkach. Ale šmat što zaležyć ad «butelkavaha rylca», jakoje ciapier stvaraje polski bok.
Zakryćcio miažy Polšča patłumačyła pytańniami biaśpieki. Pryčyna — sumiesnyja vučeńni Biełarusi i Rasii «Zachad-2025». Z čaćviarha na piatnicu buduć zakrytyja aŭtadarožnyja punkty «Brest — Ciarespal» i «Kazłovičy — Kukuryki», a taksama niekalki čyhunačnych: u Hrodnie, Bierastavicy, Śvisłačy i Breście. Kali ich adkryjuć znoŭ, polskija ŭłady paviedamiać paźniej.
Ciapier čytajuć
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ20
Kamientary