Cichanoŭskaja pra śmierć u kałonii Andreja Padniabiennaha: Niama prabačeńnia tym, chto datyčny da hetaha złačynstva
Śviatłana Cichanoŭskaja prakamientavała śmierć u mahiloŭskaj kałonii palitźniavolenaha Andreja Padniabiennaha.
«Za kratami pamior palitźniavoleny Andrej Padniabienny. Dziaviataja śmierć palitviaźnia za kratami, pra jakuju nam viadoma. Ciažka padabrać słovy, kab pieradać uvieś bol, złość i smutak.
Andrej byŭ lubiačym synam i kłapatlivym baćkam, pracavitym čałaviekam, ale režym nazvaŭ jaho «niebiaśpiečnym terarystam».
Jaho asudzili na 16 hadoŭ i 8 miesiacaŭ źniavoleńnia. Uvieś čas źniavoleńnia Andreju davodziłasia prachodzić praź ciažkija ŭmovy i katavańni, psichałahičny i fizičny cisk. Ale navat u takich umovach jon kazaŭ, što hatovy adsiadzieć jašče, kali heta dapamoža jaho dzieciam žyć u volnaj krainie. I za žadańnie lepšaj budučyni dla svajoj siamji jaho spačatku pazbavili svabody, a ŭ niavoli zabrali samaje kaštoŭnaje — žyćcio.
Niama ničoha strašniejšaha, čym stracić rodnaha čałavieka. Niama prabačeńnia tym, chto datyčny da hetaha złačynstva. Maje ščyryja spačuvańni siamji i blizkim Andreja», — napisała Śviatłana Cichanoŭskaja.
Pra śmierć palitviaźnia stała viadoma siońnia. «Maje darahija! 3 vieraśnia nie stała majho lubimaha synočka!!! Maja kryvinačka, maja busińka adbyvaŭ niepamiernaje pakarańnie ŭ Mahilovie, PK-15. Jakajaści svołač pazbaviła jaho svabody, a zatym i žyćcia… Adychodziać najlepšyja. Maje załatyja ŭnučački zastalisia biez baćki… Suciašaje tolki adno: bolš nichto nie zmoža ni fizična, ni psichałahična ździekavacca z majho syna… » — napisała maci ŭ fejsbuku.
Na vybarach 2020 hoda Andrej Padniabienny byŭ naziralnikam. Jaho aburyli falsifikacyi, jon pisaŭ skarhi na načalnika kamisii ŭ prakuraturu. Chłopiec udzielničaŭ u akcyjach pratestu. Na adnoj z takich jon byŭ na mašynie: za heta byŭ aštrafavany i pazbaŭleny pravoŭ.
Zatrymali Andreja 5 listapada 2021 hoda i źmiaścili pad vartu.
Chłopca sudzili ŭ zakrytym režymie. Jaho abvinavacili pa šerahu ciažkich artykułaŭ Kryminalnaha kodeksa Biełarusi, siarod jakich č. 1 art. 14 i č. 3 art. 218 (zamach na naŭmysnaje źniščeńnie albo paškodžańnie čužoj majomaści), č. 1 art. 361-1 (stvareńnie ekstremisckaha farmiravańnia), č. 1 i č. 2 art. 289 (akt teraryzmu). Andreja abvinavačvali ŭ padpale mašyny načalnika ŭpraŭleńnia departamientu vykanańnia pakarańniaŭ, prakole kołaŭ u 39 tralejbusaŭ, stvareńni i administravańni Telegram-kanała i čata, jakija pryznali ekstremisckimi farmiravańniami.
Sudździa Anatol Sotnikaŭ pryznačyŭ Andreju 15 hadoŭ kałonii va ŭmovach uzmocnienaha režymu.
KDB unios Andreja ŭ «śpis asobaŭ, datyčnych da terarystyčnaj dziejnaści». Ale pravaabaroncy pryznali jaho palitviaźniem.
Potym Andreju dadali da asnoŭnaha terminu jašče hod i vosiem miesiacaŭ źniavoleńnia. Jaho dadatkova asudzili pa čatyroch kryminalnych artykułach, u tym liku za «sadziejničańnie ekstremisckaj dziejnaści» i «raspalvańnie inšaj sacyjalnaj varožaści».
Palitviazień znachodziŭsia ŭ kałonii №15 u Mahilovie.
Heta ŭžo dziaviataja śmierć u kałonii ci turmie: Vitold Ašurak, Mikałaj Klimovič, Aleś Puškin, Vadzim Chraśko, Alaksandr Kulinič, Ihar Lednik, Dźmitryj Šlethaŭer, Valancin Štermier, Andrej Padniabienny.
Ciapier čytajuć
Piać dzion, 60 udzielnikaŭ, saŭna, biljard i kryki adno na adnaho. Raskazvajem, jak prajšła zakrytaja «hulnia Mackieviča»50
Kamientary
Na etom vłasť i dieržit...