Na kancercie Karža varšaŭskaja palicyja zatrymała 109 čałaviek. I praviaraje łozunhi, jakija hučali na stadyjonie
Jašče dzieviać čałaviek byli zatrymanyja na stychijnym prepaci fanataŭ śpievaka ŭ rajonie Vola.
Varšaŭskaja palicyja raskazała ab pracy na kancercie Maksa Karža na Nacyjanalnym stadyjonie ŭ polskaj stalicy. Bolš za sotniu čałaviek byli zatrymanyja, mnohija atrymali štrafy.
Pieršyja zatrymańni adbylisia jašče 8 žniŭnia, za dzień da kancerta. Fanaty Karža ładzili prepaci na vulicy Ordana ŭ rajonie Vola. Miascovyja žychary paskardzilisia na šum nočču i vyklikali palicyju. U vyniku zatrymali 9 čałaviek, 25 atrymali štrafy. Arhanizataru tusoŭki mohuć pradjavić abvinavačańnie ŭ niezakonnym masavym mierapryjemstvie. Palicyja praviaraje ŭmovy damovy pamiž arhanizataram mierapryjemstva i ŭładalnikam arandavanaha ŭčastka.
Na samim kancercie Karža 9 žniŭnia, jaki sabraŭ bolš za 60 tysiač hledačoŭ, siłaviki zatrymali 109 čałaviek za šmatlikija pravaparušeńni i złačynstvy. Siarod ich — zachoŭvańnie narkotykaŭ, napad na supracoŭnikaŭ achovy, zachoŭvańnie i pranos piratechniki, a taksama niezakonnaje praniknieńnie na terytoryju stadyjona.
Palicyjanty aštrafavali 50 čałaviek na ahulnuju sumu 11 450 złotych (3135 dalaraŭ), u sud było nakiravana 38 zajaŭ ab pryciahnieńni da adkaznaści. Nahadajem, niekatoryja fanaty biełaruskaha śpiavaka sprabavali prarvacca z trybunaŭ na tancpoł, z-za čaho kancert ledź nie admianili.
Taksama paviedamlajecca, što palicyjanty vyznačajuć asoby, adkaznyja za źjaŭleńnie na stadyjonie łozunhaŭ, jakija mohuć utrymlivać prykmiety niepravamiernych dziejańniaŭ. Pry hetym jakija heta byli łozunhi, nie ŭdakładniajecca.
Kamientary
"žielezom po stiekłu"