«Samaje staroje» dzicia ŭ śviecie naradziłasia z embryjona, jaki byŭ zamarožany 30 hadoŭ tamu
Chłopčyk Tadevuš staŭ svojeasablivym rekardsmienam: jaho embryjon byŭ zamarožany jašče ŭ 1994 hodzie — zadoŭha da taho, jak jaho baćki pajšli ŭ pačatkovuju škołu. Jak tak mahło stacca?
Jak paviedamlaje The Times, u siamji 35-hadovaj Lindsi i 34-hadovaha Cima Pirsaŭ sa štatu Ahajo (ZŠA) 26 lipienia hetaha hoda naradziŭsia chłopčyk Tadevuš, jaki raźviŭsia z embryjona, što byŭ zamarožany ŭ 1994 hodzie.
Hety embryjon byŭ stvorany ŭ 1990-ch hadach padčas pracedury ekstrakarparalnaha apładnieńnia (EKA) dla Lindy Arčard i jaje tahačasnaha muža, jakija sutyknulisia ź ciažkaściami začaćcia. Tady było stvorana čatyry embryjony: adzin pryvioŭ da naradžeńnia dački, jakoj ciapier 30 hadoŭ, a try astatnija byli zamarožanyja dla budučaha vykarystańnia.
«Ja zaŭsiody vielmi chacieła jašče adno dzicia. Ja nazyvała hetyja embryjony maimi tryma nadziejami», — padzialiłasia z vydańniem ciapier 62-hadovaja Arčard.
Jak raskazała žančyna, paśla razvodu jana atrymała prava na zachoŭvańnie embryjonaŭ i ź ciaham času daviedałasia pra mahčymaść pieradačy ich inšym siemjam — praź śpiecyjalnyja prahramy, jakija časta kaardynujucca chryścijanskimi arhanizacyjami. Jaje embryjony trapili ŭ katehoryju «ciažka prystroić» — zvyčajna heta embryjony, što daŭno zachoŭvajucca abo majuć mienšyja šancy na paśpiachovaje vynošvańnie.
Lindsi i Cim Pirsy na praciahu siami hadoŭ sprabavali začać dzicia, ale biezvynikova. Jany zarehistravalisia ŭ prahramie i atrymali adzin z embryjonaŭ Arčard.
«Rody byli niaprostyja, ale ciapier my aboje adčuvajem siabie dobra. My nie źbiralisia stavić niejkija rekordy — prosta chacieli mieć dzicia. Jon taki spakojny. My ŭ zachapleńni ad taho, što jaho majem», — raspaviała Lindsi.
Dla Lindy Arčard heta taksama byŭ mocny emacyjny vopyt: «Heta ŭsio vyhladaje nierealna. Mnie dahetul ciažka pavieryć».
Kamientary
Čas biažyć chutka, treba pačynać pakavać ryštunak, marozić embryjony, dy źbiracca ŭ darohu. Vy što z saboju voźmiecie, z samaha važnaha ?