Izrail u samy bližejšy čas dazvolić Iardanii i AAE skidvać humanitarnuju dapamohu žycharam siektara Haza na parašutach. Pra heta zajaviŭ pradstaŭnik COGAT — padraździaleńnia armii Izraila, jakoje zajmajecca hramadzianskimi pytańniami na paleścinskich terytoryjach, paviedamlaje Bi-bi-si.
Pieršaj dapamohu takim čynam dastavić Iardanija.
U minułym hodzie, u pačatku viasny, amierykanskija i brytanskija vajskoŭcy ŭ supracoŭnictvie ź Iardanijaj, Jehiptam i Francyjaj užo skidvali ŭ Hazu na parašutach pradukty charčavańnia — dziasiatki tysiač porcyj hatovaj ježy.
Skid na parašutach ličycca nadzvyčaj nieefiektyŭnym sposabam dastaŭki humanitarnaj dapamohi. Pra heta znoŭ zajaviŭ u piatnicu kiraŭnik BAPOR — ahienctva AAN pa padtrymcy paleścinskich uciekačoŭ — Filip Łacaryni, nazvaŭšy hetuju ideju «adciahvańniem uvahi ad biaździejańnia».
Pradstaŭniki CHAMAS, žychary siektara Haza, a taksama mnohija zamiežnyja lidary i humanitarnyja i pravaabarončyja arhanizacyi ŭžo šmat miesiacaŭ havorać pra toje, što nasielnictvu Hazy z-za dziejańniaŭ Izraila, jaki abmiažoŭvaje pastaŭki praduktaŭ charčavańnia, pahražaje masavy hoład, a mnohija miascovyja žychary ŭžo haładujuć. Izrail hetyja abvinavačańni adchilaje i śćviardžaje, što nie abmiažoŭvaje abjom pastavak.
Padkantrolnaje hrupoŭcy CHAMAS Ministerstva achovy zdaroŭja Hazy na hetym tydni zajaviła, što za try dni ŭ siektary ad hoładu pamierli 33 čałavieki.
Dyrektar balnicy «Aš-Šyfa» ŭ horadzie Haza, doktar Machamied Abu Salmija, zajaviŭ BBC, što ad niedajadańnia ŭ siektary pakutujuć 900 tysiač dziaciej (h.zn., usie dzieci ŭ siektary). U AAN kažuć, što ad niedajadańnia pakutuje piataja častka dziaciej Hazy.
Izrail z maja ŭvioŭ u siektary Haza novuju sistemu dastaŭki i raźmierkavańnia humanitarnaj dapamohi: hetym ciapier zajmajecca stvorany Izrailem i ZŠA Humanitarny fond Hazy (Gaza Humanitarian Foundation, GHF). Inšyja arhanizacyi ad razdačy dapamohi naŭprost adchileny, a pracavać z GHF AAN i inšyja zamiežnyja dabračynnyja arhanizacyi admaŭlajucca.
Izrail tłumačyć, što novaja sistema spatrebiłasia dziela taho, kab nie dać CHAMAS i inšym uzbrojenym hrupoŭkam zabirać humanitarnuju dapamohu sabie. Da maja Izrail pa tych ža mierkavańniach błakavaŭ pastaŭki. Lidary Vialikabrytanii, Francyi i Hiermanii ŭ piatnicu, abmierkavaŭšy situacyju ŭ Hazie pa telefonie, vystupili z sumiesnaj zajavaj, zaklikaŭšy Izrail «nieadkładna źniać abmiežavańni na płyń humanitarnaj dapamohi».
«Humanitarnaja katastrofa, jakuju my nazirajem u Hazie, pavinna spynicca nieadkładna, — havorycca ŭ ich sumiesnym zvarocie. — Błakiroŭka nieabchodnaj humanitarnaj dapamohi dla mirnaha nasielnictva niedapuščalnaja».
Emanuel Makron, Kir Starmier i Frydrych Mierc «zaklikajuć usie baki spynić kanflikt šlacham nieadkładnaha spynieńnia ahniu», a taksama patrabujuć «biezumoŭnaha vyzvaleńnia ŭsich zakładnikaŭ», jakich utrymlivaje CHAMAS z 7 kastryčnika 2023 hoda.
«Bazavyja patreby mirnaha nasielnictva, uklučajučy dostup da vady i charčavańnia, pavinny być zadavolenyja biez dalejšych zatrymak», — nastojvajuć jany.
Krainy zaklikajuć Izrail «nieadkładna dazvolić AAN i humanitarnym niedziaržaŭnym arhanizacyjam vykonvać svaju pracu pa baraćbie z hoładam».
Pry hetym lidary ahavorvajucca, što «razzbrajeńnie CHAMAS źjaŭlajecca abaviazkovaj umovaj, i ŭ budučyni Hazy CHAMAS nijakaj roli hulać nie pavinien».
Kamientary