«U nas tatalnaje padzieńnie». Pradstaŭnica dyrektarata Bysol prakamientavała skandał sa Stryžakom

«Nichto nie chacieŭ by apynucca ŭ hetaj situacyi»

— Jakaja aficyjnaja pazicyja Bysol pa situacyi ź pikantnymi fotazdymkami, adpraŭlenymi Andrejem Stryžakom starońnim žančynam?

— Pa-pieršaje, u nas u arhanizacyi jość unutranaja antydyskryminacyjnaja palityka, jakoj my starajemsia prytrymlivacca ŭ svajoj pracy. I, viadoma ž, jana ni ŭ jakim razie nie prymaje prajavy charasmientu, u tym liku jakoj-niebudź dyskryminacyi. I jak hramadskaja arhanizacyja, jakaja pracuje ŭ śfiery akazańnia humanitarnaj dapamohi, my, viadoma ž, takija pavodziny asudžajem.

Pa-druhoje, my pačynajem svajo ŭnutranaje rasśledavańnie, jakoje zojmie niejki čas. Pa jaho vynikach my budziem prymać rašeńnie ab praciahu abo spynieńni supracoŭnictva z Andrejem. Ciapier Stryžak adchilajecca ad kiraŭničaj pasady, spyniaje svaje pradstaŭničyja paŭnamoctvy ad imia arhanizacyi. Zrazumieła, što heta časovaja miera na [pieryjad] praviadzieńnia rasśledavańnia. Pa vynikach my vyrašym: [albo] u niejkim vyhladzie viartajem supracoŭnictva, [albo] my jaho całkam spyniajem.

Heta dla nas pakul ciažkaje i niezakrytaje pytańnie. Nichto nie chacieŭ by apynucca ŭ hetaj situacyi. I [jość] nie toje kab šmat ludziej, jakich my možam prosta z vulicy pryvieści ŭ kamandu.

— Heta značyć, mahčymy i varyjant zvalnieńnia, poŭnaha spynieńnia supracoŭnictva?

— Tak. My budziem hatovyja padzialicca rašeńniem tady, kali jano budzie [pryniata]. Ja nie skažu pra terminy, tamu što my nie viedajem, jak šmat času heta moža zaniać. Nam treba acanić davoli šmat unutranych pracesaŭ i niejkich rečaŭ, jakija paŭpłyvajuć na hetaje rašeńnie.

— Ciapier Andrej adchileny ad kiraŭničaj pazicyi, pradstaŭničych abaviazkaŭ. Ci budzie jon praciahvać pracavać u Bysol? Čym mienavita jon budzie zajmacca padčas rasśledavańnia?

— Prosta ciapier — niama zrazumiełaha adkazu, na žal, na hetaje pytańnie. Ciapier u Andreja niama adkrytych pracoŭnych zadač.

«Na žal, my ciapier zastajemsia ŭ situacyi, kali ŭsio vielmi mocna źmiešvajuć i zdajecca, što tolki Andrej pracuje»

— Chto mienavita budzie prymać rašeńnie pra jaho budučyniu?

— Ja b chacieła raskazać krychu padrabiaźniej pra toje, jak uładkavanaja struktura fondu znutry. Tut jość važny dysklejmier. Ja, na žal, ź mierkavańniaŭ biaśpieki nie mahu dać dla publikacyi niejkija ŭnutranyja dakumienty i rehłamienty, jakija apisvajuć našu pracu. Dakładnuju kolkaść supracoŭnikaŭ ja taksama nie nazavu.

Dla nas važna, kab kamanda zastavałasia pa-za zonaj ryzyki, my kłapocimsia pra heta davoli mocna. Tamu što zrazumieła, u jakoj śfiery my pracujem, ź jakoj temaj, ź jakoj aŭdytoryjaj.

Što ja mahu raskazać? Struktura fondu takaja, što ŭ pracesie pryniaćcia rašeńniaŭ nie zaniaty tolki adzin čałaviek. U nas jość dyrektarat, jaki ažyćciaŭlaje ahulnuju kaardynacyju dziejnaści. Heta tyčycca stratehičnaj i apieracyjnaj pracy, finansavaha płanavańnia, ahulnych rečaŭ, ad jakich zaležyć isnavańnie ŭsiaho fondu.

I dalej u nas jość napramki pracy. Naprykład, akazańnie pramoj padtrymki palityčnym źniavolenym, arhanizacyja piersanalnych zboraŭ, uzajemadziejańnie z hramadskimi inicyjatyvami, praca ź biełaruskimi dobraachvotnikami va Ukrainie, haračaja linija. Heta ŭsio asobnyja viektary, u jakich jość svaje kaardynatary. Uvohule to ŭsio heta isnuje davoli aŭtanomna.

Zrazumieła, što ŭsio pracuje ŭ źviazcy i my ŭvieś čas u kamunikacyi adzin z adnym. Ale naša struktura takaja, što rašeńni, jakija tyčacca Bysol u cełym, prymajucca dyrektaratam pry vielmi ščylnaj kansultacyi z usioj kamandaj, asabliva z kaardynatarami kirunkaŭ.

Jość Andrej u hetym pracesie ci nie — rašeńnie ŭsio adno prymajecca, praca ŭsio adno robicca. I voś heta važny momant, jaki vielmi chaciełasia b paznačyć dla ŭsich.

Ja razumieju, što my pra heta vielmi mała havorym, tamu što starajemsia davoli sakretna vieści ŭsie hetyja pracesy, kab pamienš było mahčymaści na ich paŭpłyvać zboku. Rašeńni i dalej buduć prymacca dyrektaratam, kaardynatarami napramkaŭ i hetak dalej. I na momant, pakul Andrej adchileny ad kiraŭničaj pasady, i na momant, kali budzie pryniata jakoje-niebudź z rašeńniaŭ. Zastaniecca jon pracavać u fondzie ci nie — u hetym miescy ničoha asabliva nie źmienicca.

— Ja bačyła niekalki kamientaroŭ ludziej, jakija ŭpeŭnienyja, što kali Andrej Stryžak pojdzie, to Bysol źniknie. Ci tak heta?

— Ja razumieju, adkul heta biarecca. Znoŭ ža, u nas davoli vialikaja kamanda. Kolkaść našych supracoŭnikaŭ — heta dvuchznačny lik. Jany prafiesijanały, niekatoryja z nami pracujuć z samaha startu Bysol. Usie vielmi dobra razumiejuć śpiecyfiku, jość užo niejki ŭnikalny vopyt, jaki niemahčyma było b nabrać adniekul jašče, akramia jak z pracy ŭ fondzie. Ale zrazumieła, što ananimnyja praktyčna ŭsie. U nas publičnych supracoŭnikaŭ — litaralna para čałaviek. Pa vielmi zrazumiełych pryčynach.

Naša kancepcyja pracy sa źniešnim śvietam zaŭsiody była vybudavanaja tak, što jość Andrej jak publičny śpikier fondu, jaki ad jaho imia prysutničaje ŭsiudy. Heta, ułasna, adzin z asnoŭnych jaho słužbovych abaviazkaŭ — być publičnym śpikieram.

I tak, na žal, my ciapier zastajemsia ŭ situacyi, kali ŭsie vielmi mocna źmiešvajuć [Stryžaka i Bysol] i zdajecca, što tolki Andrej robić pracu. Ale heta nie zusim tak. Viadoma, jon byŭ uklučany i ŭ niejkija inšyja pracesy da ŭčarašniaha dnia. Ciapier jaho ŭklučeńnie minimizavanaje. Nu, uvohule, budzie pracavać Bysol [biez Stryžaka], tak.

— Jakaja była jaho rola? My ŭ publikacyjach padpisvali jaho jak «kiraŭnik Bysol». Jon uvachodziŭ u dyrektarat?

— Tak, jon častka dyrektarata. Kiraŭnik, suzasnavalnik. Kali histaryčna hladzieć na toje, jak Bysol stvaraŭsia i raźvivaŭsia, byli roznyja etapy, u tym liku źmieny arhanizacyjnych struktur. […] I znoŭ ža, my nikoli nie vychodzili ŭ pablik z tym, što ŭ nas voś tak usio ŭładkavana, jość voś takija pracesy, pravilna havaryć voś tak. Mahčyma, heta niejkaja naša pamyłka ŭ pazicyjanavańni ŭ tym liku.

— Rašeńnie pra budučyniu Andreja budzie prymać dyrektarat?

— Tak. I my heta robim u ščylnaj źviazcy z kamandaj.

Chaciełasia b dadać, čamu my ŭ vačach hramadskaści vyhladajem tak, jak byccam pozna vychodzim z zajavaj. Spačatku my chacieli heta ŭsio abmierkavać i ŭzhadnić u niejkim vyhladzie z kamandaj. Nam nie chaciełasia, kab supracoŭniki z navin daviedvalisia pra niejkija rašeńni. Heta tyčycca ŭsiaho fondu i ŭsioj kamandy, tamu nam važna spačatku pahavaryć usim razam. Pakolki nas šmat, heta zajmaje čas, na žal.

«Ciapier u nas tatalnaje padzieńnie»

— Vy asabista jak daviedalisia pra pikantnyja fota?

— Z navin.

— Da hetaj publikacyi byli niejkija skarhi [na Andreja] ad supracoŭnikaŭ abo ad inšych ludziej?

— Ja pra heta nie viedaju, tamu ja b nie kamientavała, kab nie nahniatać usiu hetuju situacyju jašče bolš. Jak arhanizacyja, jak kamanda, my daviedalisia pra heta ŭsio chutčej z navin, čym nie. I sapraŭdy hetak ža heta ŭsio pieražyvajem, jak i ŭsia šyrokaja hramadskaść.

— A ŭnutry kamandy raniej była niejkaja infarmacyja pra niekarektnyja pavodziny z boku Andreja?

— Ja nie pracavała ŭ fondzie ŭ toj momant, kali tam pracavała [Alaksandra] Źvierava, i nie viedaju ničoha pra heta, na žal. Ja tak razumieju, heta pytańnie z adsyłkaj da jaje. Ničoha tut, na žal, nie rastłumaču. Za čas majoj pracy takija historyi nie ŭspłyvali.

Byłaja supracoŭnica fondu Bysol Alaksandra Źvierava raniej zajaviła, što niekalki dziaŭčat kazali joj pra damahańni z boku Andreja Stryžaka. «Hetaje pytańnie ja ŭzdymała ŭ asabistaj hutarcy z Andrejem, paśla čaho fond u asobie Andreja sa mnoj raźvitaŭsia. Andrej jak zvyčajna čyrvanieŭ, sinieŭ i kazaŭ (cytata) što «ŭsie biedy z-za babak i bab» (nibyta jak svajo žyćcio apisaŭ)», — napisała Źvierava. Pra sychod Źvieravaj z fondu stała viadoma ŭ listapadzie 2022 hoda. Pavodle jaje słoŭ, tema z damahańniami tady «zamiałasia», bo nichto z achviar nie advažyŭsia pra heta zajavić kolki-niebudź publična.

Mahu dadać, što ŭ ramkach našaha razboru my źbiarem usio, što ciapier u pabliku lacić z roznymi abvinavačvańniami i [ŭ suviazi] z pastom Źvieravaj u tym liku. Prosim słać nam na poštu dadatkovuju infarmacyju, kali jość, pa situacyi — i pa hetych abvinavačvańniach. Nakolki ŭ nas resursu chopić — pastarajemsia razabracca ŭ situacyi i dać niejkuju acenku. U pramiežkavym vyniku razboru, dumaju, niešta pra heta zmožam dadać, kali budzie što.

— Arhanizacyja sutyknułasia ź niejkimi prablemami praz hetuju situacyju?

— Biezumoŭna. Heta ŭsio vielmi mocna bje pa našaj reputacyi, biezumoŭna. Pieršyja ryzyki i vydatki, jakija my niasiom, — reputacyjnyja. U nas ciapier statystyka ŭsioj našaj pracy maje vielmi dziŭny vyhlad, nazaviem heta tak.

Ja b skazała, što pakul rana rabić vysnovy pra toje, jak mienavita na nas paŭpłyvaje heta ŭsio z punktu hledžańnia akazańnia padtrymki našaj aŭdytoryi i z punktu hledžańnia zboraŭ. Napeŭna, praź miesiac plus-minus možna budzie adsačyć niejkuju dynamiku i zrabić vysnovy.

Zrazumieła, što ciapier u nas tatalnaje padzieńnie. Tut niama čaho chavać.

• 3
• 0
• 1
• 10
• 0
• 4
• 0
• 1