Natallu Hovaravu z traimi dziećmi ekakujavali ź Biełarusi. Joj pahražała čatyry hady chimii
Natalla Hovarava, 43-hadovaja cyrulnica z Oršy i maci traich dziaciej, vymušanaja była pakinuć Biełaruś paśla taho, jak jaje asudzili na 4 hady chimii za kamientary. Svajoj historyjaj jana padzialiłasia z «Bajsołam», a taksama abviaściła zbor hrošaj.
«U 2020 hodzie, kali spačatku źjaviłasia nadzieja na palityčnyja źmieny ŭ Biełarusi, a potym źnikła, ja vielmi ciažka heta pieražyvała. Nievynosna baluča było čytać ab zatrymańniach, aryštach, katavańniach, zvalnieńniach, pieraśledach ludziej, niazhodnych z vynikami vybaraŭ. Reahujučy na toje, što adbyvajecca, ja nieadnarazova pakidała kamientary ŭ roznych mesendžarach z asudžeńniem pradstaŭnikoŭ ułady i siłavych struktur za ich supraćzakonnyja i biesčałaviečnyja dziejańni suprać svaich hramadzian.
Ja nikoli nie dumała, čytajučy ŚMI, što ŭvieś toj kašmar, praź jaki prachodziać palitźniavolenyja, daviadziecca pieražyć i mnie.
Uvosień 2024 hoda mianie zatrymali na pracoŭnym miescy supracoŭniki HUBAZ i advieźli na dopyt. Padčas dopytu pahražali ŭ moj adras i majoj siamji, abražali. Tam ža mianie prymusili zapisać «pakajannaje videa», — raskazvaje Natalla.
Žančynu aryštavali. Try z pałovaj miesiacy jana znachodziłasia pad vartaj bieź ciopłaj vopratki i srodkaŭ hihijeny, z zabaronaj na charčovyja pieradačy i spatkańni z rodnymi.
«Mianie padviarhali źnievažalnym asabistym dahladam, prymušajučy zdymać ź siabie ŭsio adzieńnie, niekalki razoŭ biespadstaŭna źmiaščali ŭ karcar, a kali mnie patrabavałasia miedycynskaja dapamoha, admaŭlali.
Atrymaŭšy prysud — 4 hady abmiežavańnia voli z nakiravańniem u papraŭčuju ŭstanovu adkrytaha typu, a taksama štraf i pakryćcio materyjalnych iskaŭ u dačynieńni da traich «paciarpiełych», ja sprabavała zmahacca, padała apielacyju. Zrazumieŭšy, što prysud zastaniecca bieź źmien, a maje dzieci — biez maci, my ź siamjoj pryniali rašeńnie pakinuć terytoryju Biełarusi», — kaža Natalla.
Z dapamohaj «Bajsoł» jany byli ekstranna evakujavanyja ź Biełarusi ŭ Polšču i zaraz časova žyvuć u šełtary dla byłych palitźniavolenych.
«My ź dziećmi majem patrebu ŭ vašaj dapamozie: zastaŭšysia biez usiaho ŭ čužoj krainie, nam prosta niama na što žyć. Ja prašu dapamahčy nam na pieršy čas, pakul ja zmahu arandavać žyllo, znajści pracu, uładkavać dziaciej u škołu i apranuć ich.
Budziem vielmi ŭdziačnyja luboj dapamozie i padtrymcy!», — piša Natalla.
Suma zboru — €4000
- € 2200 — na arendu žylla na pieršyja try miesiacy (plus zadatak)
- €800 — na adzieńnie, abutak dla dziaciej, padrychtoŭku da škoły
- €700 — ježa, bytavyja vydatki na pieršy čas
- €300 — kursy polskaj movy
Ciapier čytajuć
Asudžany za «Hajun» da chimii brat Ihara Łosika ŭciok ź Biełarusi1
Asudžany za «Hajun» da chimii brat Ihara Łosika ŭciok ź Biełarusi
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary