U Sirii adbyłasia važnaja padzieja: ułady krainy i pradstaŭniki druzskaj supolnaści damovilisia ab pieramirji paśla kryvavych sutyknieńniaŭ u horadzie Suviejda, dzie žyvuć pieravažna druzy, paviedamlaje Euronews.
Pavodle paviedamleńnia siryjskaha dziaržaŭnaha ŚMI, uradavyja vojski ŭstalujuć błokpasty, a darohi i dziaržaŭnyja ŭstanovy ŭ rehijonie znoŭ pačnuć pracavać. Taksama płanujecca stvaryć ahulnuju kamisiju z udziełam uładaŭ i druzskaj supolnaści dla rasśledavańnia padziej i vyzvaleńnia ŭsich zatrymanych padčas chvalavańniaŭ.
U sieradu situacyja na miažy pamiž Izrailem i Siryjaj stała chaatyčnaj: kala 1000 izrailskich druzaŭ sprabavali trapić u Siryju, a niekalki dziasiatkaŭ siryjskich druzaŭ — u Izrail.
ZŠA vitali spynieńnie ahniu. Dziaržsakratar Marka Rubia zajaviŭ, što heta moža stać krokam da stabilizacyi ŭ rehijonie, i zaklikaŭ Izrail spynić avijaŭdary dy pačać dyjałoh.
U adkaz na hvałt suprać druzaŭ na poŭdni Siryi Izrail nanios udary pa siryjskich vajskovych abjektach u Damasku, u tym liku pobač z prezidenckim pałacam. Armija Izraila hatovaja pierakinuć dadatkovyja siły, uklučajučy drony i źniščalniki, na miažu ź Siryjaj i ŭ bufiernuju zonu na Hałanskich vyšyniach.
Izrailski ministr zamiežnych spraŭ Hideon Saar rezka raskrytykavaŭ mižnarodnuju supolnaść za maŭčańnie i zajaviŭ, što siryjski režym i džychadzisty sistematyčna pieraśledujuć mienšaści. Jon padkreśliŭ, što Izrail maje vyraznyja intaresy — praduchilić napady na druzaŭ i nie dapuścić niebiaśpieki na miažy.
Prezident Izraila Icchak Hiercah zapeŭniŭ, što kraina nie budzie stajać ubaku, kali siabry i svajaki izrailskich druzaŭ padviarhajucca niebiaśpiecy. A premjer-ministr Bińjamin Nietańjachu źviarnuŭsia da svaich hramadzian-druzaŭ z prośbaj nie pierachodzić miažu, kab nie ryzykavać žyćciom i nie zaminać dziejańniam izrailskaj armii.
Kamientary