Maci sprabavała viarnuć traich dziaciej praz TikTok. Što vyrašyła kamisija?
Troje dziaciej Ajše i Siarhieja z sakavika 2025 hoda i da paniadziełka dnia znachodzilisia pad apiekaj dziaržavy ŭ Zelvienskim sacyjalna-piedahahičnym centry. Da hetaha dzieci pražyvali z baćkam: mužčyna piać hadoŭ vychoŭvaŭ ich adzin, ale viasnoj z-za «amaralnaha ładu žyćcia» ich u jaho zabrali.
Maci, jakaja da hetych padziej prajaŭlała mała ŭdziełu ŭ žyćci dački i dvuch synoŭ, vyrašyła viarnuć ich sabie, ale navat paśla videazvarotu da Łukašenki ŭ jaje ničoha nie atrymałasia. Kab dzieci ŭsio ž zmahli viarnucca ŭ siamju, miascovyja orhany sacyjalnaj apieki pastavili pierad baćkami šerah umoŭ, jakija im treba było vykanać da čarhovaha pasiadžeńnia kamisii. Pasiadžeńnie, jak stała viadoma, prajšło 14 lipienia. Što viadoma na dadzieny momant, piša Onliner.by.
Historyja traich dziaciej, zabranych u baćki, jaki vychoŭvaŭ ich adzin, stała rezanansnaj dziakujučy šyrokamu rozhałasu, stvoranamu ich maci pa imieni Ajše. Spačatku jana zapisvała roliki ŭ TikTok, a paśla źviarnułasia ŭ ŚMI.
Paśla razvodu dzieci, małodšamu ź jakich było ŭsiaho 8 miesiacaŭ, zastalisia žyć z baćkam u vioscy ŭ Zelvienskim rajonie, u toj čas jak maci viarnułasia ŭ Minsk i tolki zredku ich naviedvała. Paźniej stanie viadoma, što siamja traplała ŭ pole zroku orhanaŭ apieki jašče z 2017 hoda, ale potym, kali dzieci zastalisia žyć z baćkam, asablivych pytańniaŭ da jaho nie było.
«Pieršapačatkova ja nie byŭ suprać taho, kab dzieci zastalisia ŭ jaje [Ajše], i sud, upeŭnieny, staŭ by na jaje bok, bo heta paŭsiudnaja praktyka. Ale jana sama admoviłasia ad iskavych patrabavańniaŭ i pry hetym kaža, što ja ich [dziaciej] nibyta vykraŭ. Kali b jana pastajała za našych dziaciej, jany byli b u jaje, a ja zajmaŭsia b pracaj i dapamahaŭ im. Niachaj sama sabie pryznajecca, što nie prajaŭlała da ich cikavaści, što joj było zručna, kali jany byli ŭ mianie. Uvieś hety čas ja kłapaciŭsia pra dziaciej. Ja pabudavaŭ dvuchpakajovuju kvateru ŭ Zelvie i źbiraŭsia pierajechać tudy ź dziećmi da vosieni: Arsienij u hetym hodzie idzie ŭ pieršy kłas. Ale nie paśpieŭ: u sakaviku dziaciej u mianie adabrali. Ciapier ja rablu ŭsio mahčymaje, kab ich viarnuć: prajšoŭ narkołaha, uładkavaŭsia na pracu pa miescy žycharstva, bo da hetaha byŭ samazaniatym, zajmajusia ramontam u novaj kvatery», — tłumačyŭ Siarhiej, jakim čynam dzieci zastalisia žyć ź im.
Prablemy pačalisia viasnoj 2024 hoda: dziaciej pryznali ŭ sacyjalna-niebiaśpiečnym stanoviščy, pakolki, jak było ŭstanoŭlena, ich baćka ŭžyvaŭ śpirtnyja napoi.
Zhodna z dakumientami, na niejki pieryjad Siarhiej pryjšoŭ u normu, ale paśla znoŭ niešta pajšło nie tak, i ŭ sakaviku 2025 hoda rašyli, što dziaci majuć patrebu ŭ dziaržaŭnaj abaronie, i źmiaścili ich na čas vyrašeńnia situacyi ŭ Zelvienski SPC.
Daviedaŭšysia pra heta, maci ŭklučyłasia ŭ praces i zajaviła, što hatovaja zabrać usich traich dziaciej da siabie i što ŭžo źniała dla ich dvuchpakajovuju kvateru ŭ Minsku. Ale ŭsio akazałasia značna składaniej: Ajše (jana i sama hetaha nie admaŭlała) mała ŭdzialała dzieciam uvahi, mieła zapazyčanaść pa alimientach pierad byłym mužam zvyš 19 tysiač rubloŭ. Akramia taho, u dziaŭčyny staŭ nazapašvacca doŭh za ŭtrymańnie dziaciej u dziaržaŭnaj ustanovie.
U mai kamisija pa spravach niepaŭnaletnich Zelvienskaha rajvykankama abmiarkoŭvała vykanańnie płanaŭ pa abaronie pravoŭ dziaciej, adabranych ź siamji — Vary, Anatola i Arsienija. U vyniku abaim baćkam byli dadzieny rekamiendacyi i čas, kab vypravicca.
Tak, naprykład, baćku i maci treba pahasić salidarny doŭh za ŭtrymańnie dziaciej u dziaržaŭnaj ustanovie, a taksama «zabiaśpiečyć umovy pražyvańnia pa miescy žycharstva» (naprykład, u kvatery Ajše treba pastavić piśmovy stoł), a asobna baćku — prajści doktara-narkołaha i ŭładkavacca na pracu pa miescy žycharstva.
Kali žurnalisty razmaŭlali ź Siarhiejem, jon raspavioŭ, što dačka adpačyvaje ŭ letnim łahiery, a chłopčyki časova zastalisia ŭ SPC, ale jon spadziajecca, što ŭsie jany chutka viernucca da jaho.
U paniadziełak prajšło čarhovaje pasiadžeńnie kamisii, dzie było vyrašana, što dziaciej viernuć nazad u siamju, i jany buduć pražyvać z baćkam. Ich maci Ajše raspaviała, što budzie źviartacca ŭ sud ź iskam ab vyznačeńni miesca žycharstva dziaciej u jaje.
Kamientary