Pieršy namieśnik staršyni BFF źniaŭ svaju kandydaturu na pasadu staršyni — i padtrymaŭ kandydata ad Minsportu
Andrej Vasilevič zajaviŭ, što kiravać fiederacyjaj futbołu pavinien čałaviek ź vialikim administracyjnym resursam. Pry hetym pa statucie ŭznačalić fiederacyju jak minimum na hod pavinien byŭ sam Vasilevič.
Pieršy namieśnik staršyni Biełaruskaj fiederacyi futbołu Andrej Vasilevič źniaŭ svaju kandydaturu na vybarach staršyni.
Vasilevič vystupiŭ z zajavaj, u jakoj padtrymaŭ inšaha kandydata — načalnika ŭpraŭleńnia sportu i turyzmu Minskaha abłvykankama Jaŭhiena Bułojčyka.
«Ja razumieju, što z ulikam usich faktaraŭ i abstavinaŭ, jakija skłalisia ŭ biełaruskim futbole, na pasadzie kiraŭnika ABFF pavinien być čałaviek z surjoznym administracyjnym resursam. Bo dla raźvićcia futboła ŭ našaj krainie nieabchodna pryniaćcie šerahu hłabalnych rašeńniaŭ, jakija treba danieści i adstajać na samym vysokim uzroŭni», — skazaŭ Vasilevič.
Jon vykazaŭ nadzieju, što novy staršynia pakinie jaho na pracy ŭ BFF. I patłumačyŭ, čamu padtrymlivaje Bułojčyka.
«Jaŭhien Vasiljevič Bułojčyk vyhladaje dobrym kandydatam. Niezdarma jaho vyłučyli adrazu čatyry abłasnyja fiederacyi futboła. Upeŭnieny, što jaho praca ŭ Minskaj vobłaści pad kiraŭnictvam Alaksandra Hienrychaviča Turčyna, ciapierašniaha premjer-ministra Biełarusi, i atrymany za hady pracy vopyt pasłužać mastom dla pryniaćcia hramatnych kiraŭnickich rašeńniaŭ na karyść raźvićcia biełaruskaha futboła», — ličyć namieśnik staršyni BFF.
Z sakavika 2023 hoda BFF kiravaŭ były Viciebski hubiernatar Mikałaj Šarśnioŭ. Na svajoj pasadzie jon adkryta kanfliktvaŭ ź ministram sportu i byłym achoŭnikam Łukašenki Siarhiejem Kavalčukom. Kiraŭnik BFF krytykavaŭ usie prapanovy, jakija łabiravaŭ ministr.
Naprykład, Šarśnioŭ byŭ suprać zabarony na zamiežnyja zbory dla kłubaŭ ź dziaržaŭnaj padtrymkaj, suprać limitaŭ na zarobki ŭ čempijanacie Biełarusi. Šarśniovu nie padabałasia, što Kavalčuk pastajanna ŭmiešvaŭsia ŭ spravy BFF, chacia pa praviłach UEFA dziaržava rabić heta nie maje prava.
U mai Šarśniova pryznačyli namieśnikam kiraŭnika spraŭ Łukašenki. A nieŭzabavie jon padaŭ zajavu ab adstaŭcy z pasady staršyni BFF, nie adpracavaŭšy čatyrochhadovy termin.
Cikava, što pa statucie jakraz pieršy namieśnik staršyni Vasilevič pavinien byŭ kiravać fiederacyjaj da 2026 hoda, na jaki była pryznačana čarhovaja kanfierencyja. Pryčym pra heta kazali ŭ BFF u kamientaru dla «Presboła». Adnak litaralna praź niekalki dzion fiederacyja abviaściła, što praviadzie pazačarhovuju kanfierencyju, na jakoj budzie abrany novy staršynia. Tady ž źjavilisia insajdy, što fiederacyju pavinien uznačalić Bułojčyk, jaki karystajecca padtrymkaj Kavalčuka.
U baraćbie za pasadu kiraŭnika BFF zastalisia dva kandydaty: akramia Bułojčyka, heta dyrektar minskaha «Dynama» Andrej Tołmač. Jon taksama atrymlivaŭ kamplimienty ad ministra sportu. Vybary staršyni BFF projduć 17 lipienia.
Kamientary
Im nie do biełorusskoho futboła, u nich jesť kuda boleje važnyje intieriesy v žiźni. ))