Pad Minskam mašyna źbiła łasia — zahinuli dva čałavieki, paciarpieŭ viadomy komik
U Minskaj vobłaści nočču 6 lipienia lehkavik źbiŭ łasia i ŭrezaŭsia ŭ dreva. Zahinuli dva pasažyry, jašče try čałavieki trapili ŭ balnicu. Adzin sa špitalizavanych — biełaruski błohier i komik Ryhor Staŭpiec, pra heta raspaviała jaho znajomaja i kaleha pa stendapie Daša Hierman, piša «Lusterka».
DTZ adbyłosia ŭ noč na niadzielu na trasie R23 Minsk — Mikaševičy. Kala pieršaj hadziny nočy na 23-m kiłamietry 33-hadovy kiroŭca Belgee źbiŭ łasia — paśla hetaha mašyna vylecieła ŭ kiuviet i ŭrezałasia ŭ dreva.
U avaryi zahinuli dva pasažyry — 33 i 71 hoda. Jašče try čałavieki paciarpieli i byli dastaŭleny ŭ balnicu.
Jak raspaviała ŭ storys u Instagram biełaruskaja aktrysa i stendap-komik Daša Hierman, adzin sa špitalizavanych — błohier i komik Ryhor Staŭpiec.
«Hryša ŭ balnicy», — napisała jana sa spasyłkaj na paviedamleńnie MUS, nie ŭdakładniŭšy, ci byŭ jon za rulom abo siarod pasažyraŭ.
U jakim stanie błohier, taksama nieviadoma. Ryhor Staŭpiec — viadučy i komik ź Minska. Jon finalist šou Comedy Batł na TNT i ŭdzielnik Vyšejšaj lihi KVZ u składzie kamandy «Najlepšyja siabry». Vystupaje na mierapryjemstvach roznaha maštabu — ad karparatyvaŭ da šou na 1500 hledačoŭ, a taksama supracoŭničaje z pradakšn-kampanijaj Arkadi Logvin i pazicyjanuje siabie jak ambasadar brenda «Santa» ŭ TikTok (u hetaj sacsietcy ŭ jaho 112,5 tysiačy padpisčykaŭ).
Jaho roliki — karotkija scenki z humarystyčnymi situacyjami i łajfchakami — rehularna nabirajuć tysiačy łajkaŭ i kamientaryjaŭ.
Ciapier čytajuć
Kamientary