«Vitajem na radzimie». Biełarus raspavioŭ pra zatrymańnie na miažy za łajk i sapsavany adpačynak

«Sprava była na Bresckim pamiežnym pierachodzie. Kali ja padyšoŭ da akienca, dzie siadzić pamiežnik, žančyna, što była tam, ledź nie pad mikraskopam razhladała moj pašpart i ŭsie vizy i štampy, što tam stajać.

Praz paru chvilin takoha «ahladu» skazała, što pašpart pakul palažyć u jaje, a mianie vykličuć dla dadatkovych pytańniaŭ.

Čakaŭ ja, pakul mianie vykličuć, napeŭna, chvilin 15—20. Kali zajšoŭ u pakoj dla dopytaŭ, pamiežnik adrazu ž paprasiŭ moj telefon.

Napeŭna, praz paru chvilin kapańnia ŭ maim telefonie jon kaža, što znajšoŭ łajk na post Śviatłany Cichanoŭskaj, pastaŭleny ŭ 2020 hodzie.

Na pytańnie, čamu ŭ mianie jaho nie pavinna być, kali kanał byŭ pryznany ekstremisckim u 2023 hodzie (a zakon zvarotnaj siły ŭ Biełarusi nie maje), mnie adkazali, što raźbiarucca milicyjaniery. Paviali mianie ŭ inšy pakoj. Telefon, zrazumieła, nie viarnuli, patelefanavać nikomu, zrazumieła, nie dali.

Tak ja prasiadzieŭ u čakańni mužčyn u pahonach prykładna 4 hadziny. Kali jany pryjechali, skazali, što ja zatrymany, zaščoŭknuli kajdanki za śpinaj, pasadzili ŭ UAZik za kraty i pavieźli ŭ RAUS.

U kamiery ja paznajomiŭsia z takim ža asabliva niebiaśpiečnym złačyncam. Siadzieli my, napeŭna, hadzin da 17—18 viečara (ciaham dnia pryvieźli jašče adnaho «ekstremista»).

A 18-j hadzinie nas pavieźli ŭ izalatar časovaha ŭtrymańnia (IČU). Pa darozie zajechali kudyści, dzie ŭ mianie ŭziali adbitki palcaŭ (akazvajecca, adbitkaŭ asabliva niebiaśpiečnaha złačyncy navat u bazie nie było).

Pa prybyćci ŭ IČU nas pasialili ŭ kamieru da dvuch miascovych «pastajalcaŭ». Jany i raspaviali, što palityčnych pryvoziać kožny dzień ź miažy, i IČU nie pustuje zusim.

Darečy, my ŭsie byli dzień u darozie, a nastupny dzień prasiadzieli ŭ RAUS bieź ježy. Na prośbu pakarmić chacia b viačeraj nam skazali, što ŭsio ŭžo skončyłasia.

U kamiery ty nie možaš lažać, nie možaš abapiracca na ścianu ci stoł. Abo staiš, abo siadziš, ni na što nie abapirajučysia.

Adboj byŭ a 22:00, padjom — a 6:00. Padčas nočy a 2:00 i 4:00 padychodzić tavaryš milicyjanier da dźviarej i ŭsich budzić. Ty pavinien padyści i skazać: proźvišča, imia, imia pa baćku, datu naradžeńnia i artykuł, pavodle jakoha ty tut znachodzišsia.

Druhi dzień prajšoŭ niejak sam pa sabie, nahavarylisia z chłopcami ad dušy. Ja, napeŭna, stolki nie razmaŭlaŭ za ŭsio žyćcio. Na druhija sutki ŭ IČU, bližej da 14:00, mianie vypuścili. Kali vypuskali, skazali, što sud musić adbycca praz 10 dzion.

Ja adkazvaju, što praz 4 dni mušu lacieć dadomu, bo pryjechaŭ u adpačynak. Tavaryš u pahonach ź nieachvotaj zakreślivaje datu i stavić novuju — na paślazaŭtra.

Kali ja pryjšoŭ na sud, najpierš mianie spytali: «A navošta vy naohuł pryjšli?»

Z momantu ŭvachodu ŭ zału suda i da vychadu prajšło roŭna 7 chvilin. Sud pryznačyŭ 12 bazavych štrafaŭ, biez kanfiskacyi telefona (łajk byŭ pastaŭleny sa staroha telefona), a taksama treba było apłacić 1 bazavuju za dvoje sutak u IČU.

I akazvajecca — UVAHA! — łajk na post u Instagram ja pastaviŭ u dzień, kali pierachodziŭ miažu (łajk byŭ pastaŭleny ŭ 2020 hodzie, ale ŭ pratakole paznačyli, niby łajk byŭ pastaŭleny ŭ dzień ujezdu ŭ Biełaruś, patłumačyŭ paźniej chłopiec. — NN).

Kab zabrać svoj telefon, mnie daviałosia zastavacca ŭ krainie jašče 10 pracoŭnych dzion, kab pastanova ŭstupiła ŭ siłu. Bilety na samalot zhareli. U vyniku, pryjechaŭšy na tydzień, kab pabačyć blizkich, daviałosia pravieści ŭ krainie kala 20 dzion. Adpačynak udaŭsia.

Jašče vielmi zapomniłasia fraza pamiežnikaŭ, jakija mianie zatrymlivali, i milicyjanieraŭ, što adpuskali ź IČU:

«Vitajem na radzimie».

• 5
• 0
• 6
• 37
• 1
• 1
• 35
• 0