Na vajnie va Ukrainie zahinuŭ rasijski aktyvist, jaki byŭ suprać vajny i zaklikaŭ nie iści na jaje
Adzin z aktyŭnych udzielnikaŭ ekałahičnaha pratestu suprać budaŭnictva śmiećcievaha palihona na stancyi Šyjes Jaŭhien Abakumaŭ zahinuŭ na vajnie va Ukrainie, vajavaŭšy na baku Rasii, piša «Novaja hazieta. Jeŭropa».
Zapis pra jaho hibiel haradskija publičnyja staronki archanhielskaha horada Kotłas apublikavali 7 lipienia.
Infarmacyju pra śmierć Abakumava «Novaja hazieta Jeŭropa» paćvierdzili jaho znajomyja. U razmovie byłyja paplečniki Abakumava pa prateście raspaviali, što mužčyna adpraviŭsia ŭ zonu bajavych dziejańniaŭ u krasaviku, a pra jaho śmierć stała viadoma jašče ŭ kancy červienia. Takim čynam, na froncie jon prabyŭ mienš za try miesiacy.
Pa niepaćvierdžanaj infarmacyi, hibiel nastupiła ŭ vyniku artyleryjskaha abstrełu budynka, dzie znachodzilisia rasijskija vajskoŭcy.
Abakumavu było 48 hadoŭ. U Kotłasie žyvuć jaho žonka i syn. Źviazacca z svajakami Abakumava nie zmahła.
Pryčyny, pa jakich Abakumaŭ vyrašyŭ adpravicca na vajnu, niezrazumiełyja. Udzielnica pratestaŭ na Šyjesi z Komi na ŭmovach ananimnaści raskazała, što Abakumaŭ vystupaŭ suprać vajny z Ukrainaj i adhavorvaŭ ludziej iści ŭ pryzyŭnyja punkty paśla abviaščeńnia «častkovaj mabilizacyi».
«Siabru-ŭkraincu dapamoh pakinuć Ukrainu razam ź siamjoj. Ličyŭ, što toje, što adbyvajecca — heta suśvietny pieradzieł kapitałaŭ, a addavać svajo žyćcio za čužyja kamiercyjnyja intaresy — hłupstva», — raspaviała ekaaktyvistka.
Abakumaŭ byŭ adnym z aktyŭnych udzielnikaŭ pratestaŭ na Šyjesie: mužčyna byŭ adnym ź inicyjataraŭ stvareńnia mižrehijanalnaj ekałahičnaj kaalicyi «Stop-Šyjes», utvoranaj u kastryčniku 2019 hoda.
«Jon vielmi dapamahaŭ va ŭsim, byŭ rašučy i dobra arhanizavany. Jon zmoh kuryravać pracu hrupy jurystaŭ, nie majučy nijakaha dačynieńnia da jurysprudencyi», — patłumačyŭ ekaaktyvist z Archanhielskaj vobłaści Dźmitryj Siakušyn. Kali pratesty pačalisia, Abakumaŭ pracavaŭ mašynistam ciahnika.
U pieradvybarčy pieryjad pierad vybarami hubiernatara ŭ vieraśni 2020 hoda Abakumava spynili palicejskija niedaloka ad ułasnaha doma. U aŭtamabili aktyvista znajšli ulotki, u jakich «Adzinaja Rasija» nazvana «partyjaj žulikaŭ i złodziejaŭ». Palicyja adpuściła aktyvista, ale nakład ulotak kanfiskavała.
Akramia pieradvybarčych kampanij, aktyvist zajmaŭsia antykarupcyjnymi rasśledavańniami ŭ orhanach haradskoj ułady. U 2021 hodzie Abakumaŭ staŭ daradcam novaj kiraŭnicy Kotłasa Śviatłany Dajnieka jakaja zaniała pasadu Andreja Bralnina, adpraŭlenaha ŭ adstaŭku niezadoŭha da zaviadzieńnia suprać jaho kryminalnaj spravy pa artykułach ab chabary i złoŭžyvańni słužbovymi paŭnamoctvami. U 2023 hodzie ŭ adstaŭku syšła ŭžo sama Dajnieka, ale Abakumaŭ praciahnuŭ pracavać u administracyi Kotłasa.
Kamientary