Prezident Ukrainy Uładzimir Zialenski pryznačyŭ Hienadzia Šapavałava novym kamandujučym Suchaputnych vojskaŭ Uzbrojenych Sił Ukrainy. Adpaviedny ŭkaz apublikavany na sajcie Ofisa prezidenta Ukrainy, piša «Ukrainskaja praŭda».
Raniej Šapavałaŭ uznačalvaŭ vojski apieratyŭnaha kamandavańnia «Poŭdzień», ale pakinuŭ hetuju pasadu ŭ lutym 2025 hoda. U studzieni prezident Ukrainy daručyŭ jamu kaardynavać pytańni biaśpieki i supracoŭnictva ź mižnarodnymi partniorami ŭ niamieckim Visbadenie.
Hienadź Šapavałaŭ — uradženiec Kiravahradskaj vobłaści, naradziŭsia ŭ 1978 hodzie. Z adznakaj skončyŭ Instytut tankavych vojsk u Charkavie, a paźniej — Kamandna-štabny instytut Nacyjanalnaha ŭniviersiteta abarony Ukrainy. Prajšoŭ šlach ad kamandzira tankavaha ŭzvoda da kamandzira asobnaj motapiachotnaj bryhady imia Jakava Handziuka. U 2022 hodzie atrymaŭ zvańnie bryhadnaha hienierała.
Pasada kamandujučaha Suchaputnymi vojskami stała vakantnaj paśla adstaŭki 1 červienia Michaiła Drapataha. Jon napisaŭ adpaviedny rapart paśla trahičnaj padziei, kali rasijski rakietny ŭdar pa navučalnaj častcy Suchaputnych vojskaŭ pryvioŭ da hibieli jak minimum 12 vajskoŭcaŭ i bolš čym 60 paranienych. Paźniej Drapataha pryznačyli kamandujučym Abjadnanymi siłami, dzie jon budzie zajmacca vyklučna bajavymi zadačami.
Dźmitryj Łukašenka choča pastavić pad kantrol usie mabilnyja telefony11
Kamientary