Kab atrymać miesiac adpačynku, rasijskija sałdaty płaciać pa 10000 jeŭra. A niekatoryja robiać fiktyŭnyja apieracyi

Adnoj z asnoŭnych krynic pastupleńnia novych bajcoŭ na front u Rasii źjaŭlajecca nabor kantraktnikaŭ, zarobki jakich u zaležnaści ad rehijona składajuć u ekvivalencie ad 10 000 da 30 000 jeŭra adrazu paśla padpisańnia kantraktu, potym 1000—3000 jeŭra štomiesiac, vypłaty da 40 000 jeŭra ŭ vypadku traŭmy i da 130 000 jeŭra svajakam u vypadku hibieli.

Ale mahčymaści lehalna patracić hetyja hrošy na froncie abmiežavanyja, tamu ŭźnikli kvitniejučyja čornyja rynki. Na prablemu karupcyi ŭ rasijskaj armii źviartaje ŭvahu Tagesspiegel.

Na froncie handlujuć narkotykami, seksualnymi pasłuhami, a aficery vymahajuć hrošy ŭ padnačalenych, pahražajučy hvałtam. U tyle ž mužčyny hatovy płacić lubyja sumy, kab paźbiehnuć mabilizacyi.

Vielmi papularnaja pasłuha

Najbolš zapatrabavanaja pasłuha dla tych, chto znachodzicca na froncie, — atrymać mahčymaść pastajannaha zvalnieńnia ź jaho.

Jak paviedamlaje Darja Bierh, kaardynatarka pravaabarončaha prajekta «Idzicie lesam», handal viadziecca praź śpiecyjalnyja čaty ŭ Telegram. Ź vieraśnia 2022 hoda, pavodle ŭkazu Pucina, kantrakty ź Ministerstvam abarony stali biesterminovymi. Aficyjna pakinuć front možna tolki ź ciažkim paškodžańniem, z nahody atrymańnia vysokaj dziaržaŭnaj uznaharody abo ŭ trunie.

Za hrošy, jak śćviardžajuć pravaabaroncy, možna trapić u śpis na atrymańnie ordena navat biez asablivych dasiahnieńniaŭ u bajach. Čaściej, adnak, demabilizacyju kuplajuć inšym sposabam: praź fiktyŭnuju traŭmu. Dla hetaha treba padkupić kamandzira i vajennych miedykaŭ, što robić praces składanym i darahim. Tut šmat ašukanstva: sałdat pieravodzić avans na rachunak mierkavanaha pamočnika, paśla čaho pamočnik prosta źnikaje.

Rasijskija žurnalisty-rasśledavalniki znajšli niekalkich ludziej, jakija paśpiachova nabyli takuju ​​lhotu i pahadzilisia raskazać. Samy tanny varyjant kaštuje kala 8000 jeŭra. Vierchniaj miažy niama. Časta častka abo navat usia suma apłačvajecca najaŭnymi.

Apošnim časam, z-za pavieličeńnia aryštaŭ za handal padroblenymi dyjahnazami, nabyła papularnaść novaja schiema: fiktyŭnyja apieracyi. Sałdatu staviać vydumany dyjahnaz, robiać nadrez pad narkozam i adrazu zašyvajuć, imitujučy chirurhičnaje ŭmiašańnie.

Pravaabaroncam viadomy vypadki, kali praz Telegram pradavalisia sapraŭdnyja infiekcyi VIČ i hiepatytu, jakija dazvalajuć atrymać vyzvaleńnie ad słužby.

Frantavy adpačynak za tysiačy jeŭra

Bolš kamfortny varyjant — nabyć adpačynak. Tydniovaja pabyŭka doma kaštuje prykładna miesiačnuju zarpłatu sałdata, a miesiac adpačynku — 7000—10 000 jeŭra, paviedamlaje Ivan Čuvilajeŭ, pres-sakratar «Idzicie lesam».

Taksama papularny pieravod u padraździaleńni, jakija znachodziacca dalej ad frontu. Viadomy vypadki, kali cełyja padraździaleńni miesiacami znachodzilisia na biaśpiečnaj adlehłaści, płaciačy chabar kamandziram — dziasiatki tysiač jeŭra ŭ miesiac.

Pasady zahadčyka abo vadziciela tyłavoha składa taksama pradajucca. Za 150—200 jeŭra možna vyzvalicca z «padvała», dzie sałdat bjuć za takija praviny, jak užyvańnie ałkaholu ci narkotykaŭ.

Adčajnyja kroki

Pravaabaroncam viadomy i inšyja historyi sałdat, jakija, nie majučy hrošaj, sprabujuć samastojna vybracca z frontu.

Naprykład, Mikałaj z akupavanaj Łuhanščyny raspavioŭ vydańniu «Mieduza», jak paśla ciažkaha paškodžańnia ruki jamu nie dazvolili pakinuć front. Jon i jašče adzin sałdat, pačuŭšy pra mietad ad inšych, stralali adzin u adnaho z aŭtamataŭ samarobnymi patronami z abrezanymi iržavymi ćvikami, imitujučy paškodžańni ad ukrainskaj hranaty, skinutaj bieśpiłotnikam.

Na nazie Mikałaja źjavilisia hiematomy, jana chutka zahnaiłasia. Ale ŭ špitali zaŭvažyli padazronyja ślady ad strełu, i Mikałaju daviałosia zapłacić lekaru 3000 jeŭra, kab toj schavaŭ heta. Adnak jaho ašukali, i paśla karotkaha lačeńnia mužčynu viarnuli na front.

«Padatki» i katavańni

U mnohich padraździaleńniach kamandziry źbirajuć z padnačalenych «padatak» biez anijakaj kampiensacyi, apraŭdvajučy heta nieabchodnaściu kuplać amunicyju. Tych, chto nie płacić, katujuć i pahražajuć adpravić na šturm uzmocnienych ukrainskich pazicyj — zadača, z vykanańnia jakoj amal nichto nie viartajecca.

Pravaabaroncy zhadvajuć vypadak, jaki adbyŭsia na terytoryi akupavanaj Danieckaj vobłaści. Tam vajennaja prakuratura vyzvaliła 17 sałdat, jakich trymali ŭ kletkach dla žyvioł. Śledstva vyjaviła, što raniej u hetych kletkach trymali inšych sałdat, jakija admaŭlalisia płacić kamandziram. Niekatorych ź ich «likvidavali» — najbolš raspaŭsiudžany eŭfiemizm dla zabojstva na froncie.

Tym časam u sacyjalnych sietkach Rasii pavialičvajecca kolkaść hrup, dzie žančyny šukajuć adzinokich vajskoŭcaŭ. U siarednim žonka moža atrymać kala 80 000 jeŭra za zahinułaha muža. Viadomy vypadki, kali adna žančyna atrymlivała vypłaty za dvuch ci navat troch zahinułych mužoŭ.

Jak raskazaŭ žurnalistam kamandzir adnaho z padraździaleńniaŭ, da pačatku 2023 hoda dzieviać ź dziesiaci zvankoŭ ad svajakoŭ zahinułych ci źnikłych datyčyli pošuku sałdata, vyśviatleńnia pytańniaŭ, dzie možna zdać DNK dla identyfikacyi ci atrymać cieła.

Adnak da kancu 2024 hoda statystyka źmianiłasia — u dzieviaci ź dziesiaci vypadkaŭ pytańni tyčylisia dakumientaŭ dla chutkaha atrymańnia kampiensacyi za hibiel.

Elektronny rejestr i novyja mahčymaści dla karupcyi

Viasnoj 2025 hoda ŭ Rasii paśla niekalkich zatrymak zapuścili adziny elektronny rejestr vajennych pozvaŭ. Pozvy ciapier nie patrabujuć papiarovaha podpisu — jany ŭnosiacca ŭ asabisty akaŭnt hramadzianina na sajcie. Navat kali čałaviek nie bačyŭ elektronnuju pozvu, jamu adrazu zabaraniajuć vyjezd za miežy krainy, a praz dva tydni dadajucca dadatkovyja štrafy z pryčyny nieźjaŭleńnia.

Pa słovach pravaabaroncaŭ, heta moža pryvieści da jašče bolšaha rostu karupcyi, bo čynoŭniki, jakija majuć dostup da rejestra, mohuć pačać pradavać mahčymaść vyklučeńnia ź jaho za vialikija sumy.

• 0
• 0
• 5
• 1
• 0
• 0
• 0
• 0