Prezident Madahaskara zajaviŭ, što źjechaŭ na fonie pratestaŭ u biaśpiečnaje miesca, kab zachavać svajo žyćcio
U krainie ŭspychnuli pratesty zumieraŭ.
Andry Radzuelina paviedamiŭ, što znachodzicca ŭ biaśpiečnym miescy. Raniej paviedamłasia, što jon pakinuŭ krainu na fonie pratestaŭ. Na viečar paniadziełka byŭ zapłanavany zvarot prezidenta da nacyi, ale jon niekalki razoŭ adkładaŭsia, piša Bi-bi-si.
«Siońnia mnie daviałosia schavacca, kab zachavać svajo žyćcio. Ale navat u takich umovach ja nie spyniaju šukać vyjście», — zajaviŭ jon u chodzie pramoj tranślacyi ŭ fejsbuku, nie raskryvajučy svajo miescaznachodžańnie.
Jon taksama zaklikaŭ da zachavańnia Kanstytucyi dla vyrašeńnia palityčnaha kryzisu ŭ krainie, jaki pahłyblajecca.
«Isnuje tolki adzin sposab vyrašyć hetyja prablemy — heta vykonvać kanstytucyju, jakaja dziejničaje ŭ krainie», — skazaŭ jon u pramym efiry.
U paniadziełak francuzskaja radyjostancyja RFI paviedamiła, što Radzuelina byŭ vyviezieny z krainy na francuzskim vajskovym samalocie ŭ niadzielu. Lidar apazicyi Siteny Randryjanasałonijaka, spasyłajučysia na supracoŭnikaŭ prezidenckaj administracyi, paćvierdziŭ ahienctvu Reuters, što kiraŭnik dziaržavy pakinuŭ krainu.
«Prezident pakinuŭ krainu, my patelefanavali supracoŭnikam prezidenckaj administracyi, i jany paćvierdzili, što jon pakinuŭ krainu ŭ niadzielu, skazaŭ Randryjanasałonijaka, dadaŭšy, što miescaznachodžańnie Radzueliny nieviadoma.
U niadzielu viertalot dastaviŭ prezidenta Madahaskara na vostraŭ Sient-Mary, raźmieščany na ŭschodnim uźbiarežžy Madahaskara, adkul jon sieŭ na bort francuzskaha vajennaha samalota. Pavodle danych RFI, prezident, mahčyma, nakiravaŭsia ŭ Dubaj praz Maŭrykij.
Pa danych jaje krynic, evakuacyju Radzueliny sankcyjanavaŭ prezident Francyi Emanuel Makron.
Francuzskija ŭłady zajaŭlali, što nie buduć uviazvacca ŭ situacyju na Madahaskary, a sam Makron pierad vyletam ź Jehipta viečaram u paniadziełak u hutarcy z žurnalistami vykazaŭ zaniepakojenaść situacyjaj na Madahaskary, ale admoviŭsia paćvierdzić paviedamleńni ab tym, što Radzuelina byŭ evakujavany pry padtrymcy francuzskich uład.
Novy načalnik hienieralnaha štaba Madahaskara hienierał Demaśfien Pikułas, pryznačany na svaju pasadu ŭ niadzielu pry padtrymcy ministra ŭzbrojenych sił, zapeŭniŭ hramadskaść, što siły biaśpieki pracujuć razam dla padtrymańnia paradku ŭ dziaržavie.
Hienierał Pikułas, vystupajučy razam z novym kamandujučym palicejskimi siłami hienierałam Nanosam Mbina Mamielisonam, admoviŭsia adkazvać na pytańni, chto zaraz kiruje ŭradam i ci znachodzicca prezident u krainie.
Mamielison koratka adkazaŭ, što zachop ułady nie ŭvachodzić u płany armii. «Na hety momant heta nie tak. My pracujem razam, armija i žandarmieryja. Armija nie maje namieru zachoplivać uładu», — skazaŭ jon.
Pratestoŭcy źbirajucca na hałoŭnaj płoščy Antananaryvu, da ich dałučylisia sałdaty. Pratestoŭcy nazvali płošču «Płoščaj demakratyi» i patrabujuć adstaŭki prezidenta Radzueliny.
Sproba pieravarotu
Napiaredadni administracyja Radzueliny zajaviła, što ŭ krainie adbyvajecca sproba niezakonnaha i niekanstytucyjnaha zachopu ŭłady. U zajavie Radzueliny havorycca, što «ŭ ciapierašni čas na terytoryi respubliki robicca sproba zachapić uładu, što źjaŭlajecca poŭnym parušeńniem Kanstytucyi i demakratyčnych pryncypaŭ».
Jon rašuča asudziŭ «sprobu destabilizavać krainu» i zaklikaŭ usie klučavyja siły krainy abjadnacca dla abarony kanstytucyjnaha paradku i nacyjanalnaha suvierenitetu.
Praź niekalki hadzin armiejskaje padraździaleńnie pad nazvaj CAPSAT (Armiejski korpus kadravych i administracyjna-techničnych słužbaŭ) zajaviła, što ŭziało na siabie kiraŭnictva vajennym kamandavańniem i zaraz kantraluje ŭsie ŭzbrojenyja siły — suchaputnyja, pavietranyja i vajenna-marskija.
Moładzievy onłajn-ruch Gen Z Mada arhanizavaŭ pratesty suprać štodzionnych adklučeńniaŭ vady i elektryčnaści. Pieršyja pratesty na Madahaskary pačalisia 25 vieraśnia, zatym demanstracyi vylilisia ŭ bolš šyrokaje niezadavalnieńnie ŭradam Radzueliny z-za vysokaha ŭzroŭniu biespracoŭja, karupcyi i rostu koštu žyćcia.
Siły biaśpieki zachoŭvali značnuju prysutnaść u bujnych haradach Madahaskara, a palicyja vykarystoŭvała ślezaciečny haz i humovyja kuli dla razhonu pratestoŭcaŭ.
Pa dadzienych AAN, u sutyknieńniach zahinuli pa mienšaj miery 22 čałavieki, ale ŭrad acaniŭ kolkaść zahinułych u 12 čałaviek.
Na praciahu ŭsich demanstracyj prezident Andry Radzuelina rabiŭ šmatlikija sproby supakoić pratestoŭcaŭ, naprykład, zvolniŭšy svoj urad i zaklikaŭšy da dyjałohu z moładździu.
U subotu niekatoryja sałdaty pakinuli svaje kazarmy na ŭskrainie stalicy Antananaryvu, kab dałučycca da pratestoŭcaŭ pierad meryjaj horada.
Chto taki Andry Radzuelina
Andry Radzuelina — pradprymalnik i były dydžej, jaki kiruje Madahaskaram z 2009 hoda.
Jon pryjšoŭ da ŭłady ŭ tym ža hodzie, zrynuŭšy tahačasnaha prezidenta Marka Ravałoamananu ŭ vyniku pieravarotu, padtrymanaha armijaj. Va ŭzroście 34 hadoŭ Radzuelina atrymaŭ tytuł samaha maładoha lidara Afryki.
Akramia taho, što jon byŭ dydžejem, pierš čym zaniacca palitykaj, Radzuelina taksama kiravaŭ šeraham pradpryjemstvaŭ.
U 2007 hodzie jon byŭ abrany meram stalicy Madahaskara Antananaryvu.
Radzuelina chutka zavajavaŭ papularnaść, zbolšaha dziakujučy svajoj enierhii i stylu viadzieńnia pieradvybarnaj kampanii, jon pieraabraŭsia na pasadu ŭ 2018 hodzie i znoŭ byŭ abrany ŭ 2023 hodzie ŭ chodzie sprečnych vybaraŭ, jakija apazicyja bajkatavała.
Madahaskar — adna z samych biednych krain śvietu: pa danych Suśvietnaha banka, 75% nasielnictva žyvie za rysaj biednaści. Pa danych Mižnarodnaha valutnaha fondu, tolki kala traciny z 30 miljonaŭ žycharoŭ Madahaskara majuć dostup da elektryčnaści.
Kamientary