U Biełarusi prapanujuć zabaranić uładkavańnie bolš čym adnoj sažałki na terytoryi adnaho ziamielnaha ŭčastka. Takaja norma praduhledžana ŭ prajekcie źmianieńniaŭ Vodnaha kodeksa, jaki deputaty Pałaty pradstaŭnikoŭ pryniali ŭ pieršym čytańni, piša BiełTA.
Jak rastłumačyŭ ministr pryrodnych resursaŭ i achovy navakolnaha asiarodździa Siarhiej Maślak, novy varyjant kodeksa padrychtavany z ulikam praktyki jaho prymianieńnia i vynikaŭ navukovych daśledavańniaŭ. Asnoŭnaja meta — udaskanaleńnie zakanadaŭstva ŭ śfiery achovy i vykarystańnia vodnych resursaŭ.
Adna z prapanoŭ — dazvolić budaŭnictva tolki adnaho vadajoma ŭ miežach ziamielnaha ŭčastka, jaki naležyć fizičnaj asobie. Heta źviazana z tym, što niekatoryja ŭładalniki kapajuć niekalki vialikich sažałak, što moža pryvieści da źnižeńnia ŭzroŭniu padziemnych vod i prablem z vadoj u susiedziaŭ.
Pry hetym ministr padkreśliŭ, što zakon nie budzie mieć zvarotnaj siły — zasypać užo najaŭnyja vadajomy prymušać nie buduć.
Akramia taho, prajekt zakona ŭdakładniaje paniaćci i terminy, spraščaje šerah administracyjnych pracedur, a taksama ŭvodzić novyja — naprykład, uzhadnieńnie z abłvykankamami rabot, źviazanych z vymańniem taplakovaj draŭniny z vadajomaŭ.
Taksama prapanujecca dazvolić pieradaču pavierchnievych vodnych abjektaŭ u arendu arhanizacyjam dla adpačynku, sportu i turyzmu, kab jany sami adkazvali za ŭtrymańnie i ŭparadkavańnie hetych terytoryj..
Kamientary