У Беларусі прапануюць забараніць уладкаванне больш чым адной сажалкі на тэрыторыі аднаго зямельнага ўчастка. Такая норма прадугледжана ў праекце змяненняў Воднага кодэкса, які дэпутаты Палаты прадстаўнікоў прынялі ў першым чытанні, піша БелТА.
Як растлумачыў міністр прыродных рэсурсаў і аховы навакольнага асяроддзя Сяргей Масляк, новы варыянт кодэкса падрыхтаваны з улікам практыкі яго прымянення і вынікаў навуковых даследаванняў. Асноўная мэта — удасканаленне заканадаўства ў сферы аховы і выкарыстання водных рэсурсаў.
Адна з прапаноў — дазволіць будаўніцтва толькі аднаго вадаёма ў межах зямельнага ўчастка, які належыць фізічнай асобе. Гэта звязана з тым, што некаторыя ўладальнікі капаюць некалькі вялікіх сажалак, што можа прывесці да зніжэння ўзроўню падземных вод і праблем з вадой у суседзяў.
Пры гэтым міністр падкрэсліў, што закон не будзе мець зваротнай сілы — засыпаць ужо наяўныя вадаёмы прымушаць не будуць.
Акрамя таго, праект закона ўдакладняе паняцці і тэрміны, спрашчае шэраг адміністрацыйных працэдур, а таксама ўводзіць новыя — напрыклад, узгадненне з аблвыканкамамі работ, звязаных з выманнем тапляковай драўніны з вадаёмаў.
Таксама прапануецца дазволіць перадачу паверхневых водных аб’ектаў у арэнду арганізацыям для адпачынку, спорту і турызму, каб яны самі адказвалі за ўтрыманне і ўпарадкаванне гэтых тэрыторый..
Каментары