Kolki času biełarusy čakajuć mižnarodnuju abaronu ŭ Polščy i ci zaciahniecca praces jašče bolš?
Paśla źjaŭleńnia infarmacyi pra zamarožvańnie ŭ Polščy terminaŭ razhladu spraŭ pa mižnarodnaj abaronie da sakavika 2026 hoda miascovyja biełarusy čarhovy raz pačali ciažka dychać: znoŭ uskładnieńni ŭ lehalizacyi. Atrymańnie mižnarodnaj achovy i raniej było čelendžam — najpierš u płanie doŭhaha čakańnia, jakoje siońnia ŭ siarednim składaje 15 miesiacaŭ.
Nasamreč havorki pra poŭnaje prypynieńnie razhladu spraŭ pa mižnarodnaj abaronie, jak padumali niekatoryja biełarusy, nie išło. Dakumienty praciahvajuć prymać i razhladać u paradku ich padačy, zamarožany tolki zakanadaŭčy termin, padčas jakoha jany musiać apracavacca.
Bolšaj kolkaściu detalaŭ pa temie z «Našaj Nivaj» padzialiłasia kiraŭnica jurydyčnaha adździeła Centra biełaruskaj salidarnaści Volha Dabravolskaja.
Zajavu na mižnarodnuju abaronu biełarusy mohuć padavać, jak i raniej, u padraździaleńniach pamiežnaj słužby i Upraŭleńni pa spravach inšaziemcaŭ u Varšavie pa adrasie Taborowa, 33.
Z novymi ŭvodnymi zamiežniki da 4 sakavika 2026 hoda nie mohuć padać skarhu na biaździejnaść abo zaciahvańnie pracedury čynoŭnikami.
«To-bok kali ŭ šefa Upraŭleńnia pa spravach zamiežnikaŭ raniej było šeść miesiacaŭ na razhlad spravy, i jon moh praciahnuć praces da 15 miesiacaŭ, to ciapier jon hetymi terminami nie budzie abmiežavany. Ale radykalnych źmien dla biełarusaŭ i biełarusak u suviazi z hetym nie čakajecca, bo i raniej niekatoryja spravy nie paśpiavali apracavać za 15 miesiacaŭ. Sa źmienami ŭ zakanadaŭstvie supracoŭniki prosta mohuć nie infarmavać zamiežnych hramadzian pra zaciahvańnie terminaŭ.
Hałoŭnaje, što varta zrazumieć: zaraz spravy razhladajucca, rašeńni vydajucca. I nieabaviazkova jany buduć u pracy 15 miesiacaŭ ci daŭžej. Usio heta vielmi indyvidualna i zaležyć ad kankretnaha kiejsa», — tłumačyć Volha Dabravolskaja i dadaje, što dakładna takaja norma ŭžo try hady dziejničaje ŭ spravach, jakija razhladajuć vajavody — pa zajavach na vid na žycharstva.
Tak ci inakš, zakanadaŭčyja novaŭviadzieńni bjuć pa pravach zamiežnikaŭ — zaŭvažaje daradca Śviatłany Cichanoŭskaj pa pravavych pytańniach Leanid Marozaŭ.
«Asnoŭnaj prablemaj robicca adsutnaść mahčymaści dla biełarusaŭ i biełarusak abskardzić biaździejnaść abo nieabhruntavanaje zaciahvańnie pracedury. U vyniku sama pracedura nabyvaje niapeŭny charaktar. Adsutnaść vyrazna vyznačanych zakonam terminaŭ stvaraje situacyju, kali supracoŭniki majuć šyroki dyskrecyjny prastor i faktyčna mohuć samastojna vyznačać čas razhladu zajaŭ. U cełym nazirajecca tendencyja, jakaja vyklikaje zakłapočanaść adnosna psichałahičnaha stanu, sacyjalnaj stabilnaści i budučyni zajaŭnikaŭ».
Z dobrych navin — biełarusam, jakija padali zajavy na mižnarodnuju abaronu ŭ Polščy, mohuć dazvolić karotkija vyjezdy za miažu pry najaŭnaści vidu na žycharstva i prajaznoha dakumienta — čakajecca piśmovaje paćviardžeńnie pazicyi Upraŭleńnia pa spravach zamiežnikaŭ Polščy na hety kont. Volha Dabravolskaja źviarnułasia z zapytam va Upraŭleńnie pa spravach zamiežnikaŭ, i CBS prainfarmuje pra vyniki dadatkova. Siońnia ž biełarusy ŭ čakańni abarony nie mohuć pakidać miežy Polščy.
Z 2019 hoda biełarusy stali druhoj pa kolkaści hrupaj zamiežnikaŭ u Polščy. Pa stanie na 1 kastryčnika 2025 hoda amal 146 000 hramadzian našaj krainy mieli dziejny dazvoł na žycharstva ŭ Polščy. Što tyčycca zapytaŭ na nadavańnie mižnarodnaj abarony, to z 9 žniŭnia 2020‑ha da 1 kastryčnika 2025 hoda pa jaje źviarnulisia 15 792 biełarusaŭ.
Ciaham 2021‑2025 hadoŭ hramadzianam Biełarusi było vyniesiena 12 264 rašeńni, u tym liku 11 529 stanoŭčych (976 pra nadavańnie statusu ŭciekača i 10 553 pra nadavańnie dadatkovaj abarony).
Kamientary