Vierchni horad i Rakaŭskaje pradmieście čakaje vialikaje pieraŭtvareńnie. Što źmienicca?

Niadaŭna prachodziła hramadskaje abmierkavańnie horadabudaŭničaha prajekta detalovaha płanavańnia (PDP) terytoryi histaryčnaha centra Minska (u dakumient unosilisia karektyvy). Pa zakančeńni abmierkavańnia haradskaja architekturna-haradabudaŭničaja rada razhledzieła zaŭvahi, što pastupili ad minčan, i zasłuchała tłumačeńni raspracoŭščykaŭ prajekta, paviedamlajuć Minsk-naviny.

Płany na dobraŭparadkavańnie histaryčnaha centra biełaruskaj stalicy padzialajucca pa časie na bližejšyja (da 2030 hoda) i pierśpiektyŭnyja (da 2050-ha i dalej). Praces pieraŭtvareńnia histaryčnaha centra aktyŭna startavaŭ u 2004 hodzie paśla padpisańnia Łukašenkam adpaviednaha ŭkaza. Za 20 hadoŭ terytoryja radykalna źmianiłasia, i asnoŭnyja raboty ŭ bolšaści vyšejpieraličanych kvartałaŭ užo zavieršany.

Tamu ŭ Vierchnim horadzie i prylehłych da jaho kvartałach naležyć zaviaršyć tolki niekalki abjektaŭ: dabudavać šmatfunkcyjanalny kompleks na vuł. Internacyjanalnaj, 3, skončyć rekanstrukcyju budynka № 6 na vuł. Revalucyjnaj.

Taksama ŭ płanach prystasavać budynak № 3 na vuł. Revalucyjnaj (ciapier tam raźmiaščajecca HUBAZiK) pad małuju scenu Kupałaŭskaha teatra. Dla hetaha da histaryčnaha budynka prapanujuć zrabić prybudovu.

Jašče adna navinka — mahčymaść rekanstrukcyi majsterni-muzieja skulptara Ivana Misko (vuł. Internacyjanalnaja, 11B) z prybudovaj pamiaškańnia pad Muziej biełaruskaj kasmanaŭtyki.

Krychu bolš źmien zapłanavana ŭ kvartałach, što atačajuć Rakaŭskaje pradmieście.

Asnoŭnaje, što tut moža adbycca, — heta daŭno zapłanavany vynas špalernaj fabryki i prystasavańnie jaje terytoryi i pamiaškańniaŭ pad šmatfunkcyjanalny centr, jaki raspracoŭščyki PDP nazvali maładziožnym centram kultury i mastactva.

Častku fabryčnych pabudoŭ spatrebicca źnieści, kab praciahnuć zavułak Špalerny da skryžavańnia z vulicaj Mielnikajcie. Takaja transfarmacyja prastory dazvolić vyłučyć niekalki ŭčastkaŭ dla zabudovy ŭzdoŭž novaha adrezka zavułka.

Jak vykarystajuć hetuju terytoryju?

Na miescy ciapierašniaha handlovaha doma «Biełaruskija špalery» ŭ budučyni moža źjavicca 7—8-paviarchovy žyły dom z padziemnaj parkoŭkaj. Pobač ź im na miescy budynkaŭ № 6 i 8 u zav. Špalernym prapanujuć uźvieści administracyjna-dziełavy abjekt i ŭbudavanaje ŭ łandšaft kafe.

A na svabodnaj terytoryi pamiž damami na vuł. Mielnikajcie 12, i Špalernaj, 4/2, advodzicca ŭčastak dla nievialikaha dziciačaha sadka na 90 miescaŭ. Akramia hetaha, prapanujecca dobraŭparadkavańnie skviera ŭzdoŭž vuł. Dzimitrava. A na miescy parkoŭki i haspadarčaj pabudovy Doma prafsajuzaŭ (pr. Pieramožcaŭ, 19a) płanujecca kanhres-centr. Jak buduć realizavanyja płany, pakaža čas.

Pavialičyć

Płanujecca raźvivać sistemu piešachodnych suviaziaŭ u histaryčnym centry. Naprykład, kab złučyć ciapier padzielenyja vulicami častki staroha Minska, płanujecca budaŭnictva piešachodnaha mosta nad rakoj ad Minskaha zamčyšča da Trajeckaha pradmieścia i dobraŭparadkavańnie prachodu ad vuł. Zybickaj pad isnujučym mostam praź Śvisłač u bok Pałaca sportu.

Złučyć dźvie častki budučaha kompleksu «Minskaje zamčyšča» (ciapier jany padzieleny praśpiektam Pieramožcaŭ i zabudovaj pa niacotnym baku mahistrali) moža piešachodny padziemny tunel pa stvary histaryčnaj vulicy Zamkavaj. Tunel prapanujecca dapoŭnić muziejnaj ekspazicyjaj zachavanych na padziemnym uzroŭni aŭtentyčnych frahmientaŭ staražytnaha horada. I heta jašče nie ŭsie prapanovy, vykładzienyja ŭ PDP.

Namiečanyja da 2030 hoda płany architekturna-haradabudaŭničaja rada padtrymała za vyklučeńniem raźmiaščeńnia dziciačaha sadka pablizu vuł. Mielnikajcie. Dziciačuju ŭstanovu prapanujecca nie budavać, pakolki pablizu jość anałahičnyja abjekty, zahružanyja nie całkam.

Na addaleny pieryjad prapanujucca bolš radykalnyja pieramieny, i nie ŭsie jany byli adnaznačna ŭspryniatyja členami rady.

U asnoŭnym namiery raspracoŭščykaŭ PDP tyčacca terytoryi Minskaha zamčyšča i transpartnaha ruchu praz histaryčny centr.

Zamčyšča

Pavialičyć

Da 1000-hodździa Minska (2067 hod) płanujecca pabudavać unikalny architekturna-haradabudaŭničy ansambl «Płošča tysiačahodździa» ŭ rajonie płoščy 8 Sakavika (zialonaja zona kala vychadu ź mietro na stancyi «Niamiha»).

Miarkujecca, što da hetaha času źjavicca i ŭnikalny muziejny kompleks «Minskaje zamčyšča» z ekspazicyjaj z zachavanych frahmientaŭ ścien i zabudovy staražytnaha horada. Ale spačatku treba budzie pravieści archiŭnyja i archieałahičnyja daśledavańni, a taksama arhanizavać konkurs (lepš mižnarodny) na prajekt rehienieracyi terytoryi zamčyšča.

Raniej užo byŭ raspracavany prajekt muziejna-kulturnaha kompleksu na miescy ŭźniknieńnia staroha Minska. Jaho płanavali realizavać, ale paźniej ad idei admovilisia, tłumačačy heta vysokim koštam rabot i nieadnaznačnaściu prajektnych rašeńniaŭ.

Płošča Vierchniaha horada

Pavialičyć

Raspracoŭščyki PDP prapanujuć u pierśpiektyvie ŭznavić ansambl paradnaj płoščy staroha horada (płošča Svabody) šlacham «funkcyjanalna-prastoravaha abjadnańnia ŭsich budynkaŭ, raźmieščanych na joj». Praściej kažučy, płošča pavinna stać piešachodnaj. Dla hetaha treba pabudavać tunel ad praśpiekta Niezaležnaści da vulicy Niamihi.

Jak rastłumačyli horadabudaŭniki, zrabić transpartny «kalidor» bolš praciahłym prablematyčna pa techničnych pryčynach (prachodžańnie mietro i inš.). Dalej transpart vyjazdžaje ŭ pačatak prasp. Pieramožcaŭ, dzie budzie raźviazka na adnym uzroŭni.

To-bok isnujučy puciepravod nad vuł. Niamihaj demantujecca, ruch u hetym vuźle budzie jak na zvyčajnym pierakryžavańni.

Jość navat prapanova skaracić kolkaść pałos ruchu na vulicy Niamihi.

Takim čynam aŭtary prajekta śviadoma sprabujuć minimizavać prytok asabistych aŭtamabilaŭ u histaryčny centr, pakidajučy pryjarytet dla ruchu hramadskaha transpartu. Takoje, darečy, praktykujecca va ŭsim śviecie. Ale, jak prahučała na saviecie, važna pry hetym nie stvaryć prablem dla žyćcia horada. Rašeńnie z puciepravodam było ŭspryniata prysutnymi dastatkova naściarožana. Adčuvałasia, što nie ŭsie prymajuć taki varyjant. Adnak pakul što heta navat nie płany, a tolki prapanovy aŭtaraŭ prajekta.

Rakaŭskaje i vakoł jaho

Pavialičyć

Na miescy špalernaj fabryki horadabudaŭniki bačać u budučyni novy abjekt u kanstrukcyjach składanych hieamietryčnych formaŭ, padniatych na vyšyniu 15 m nad zachoŭvajemymi fabryčnymi pabudovami.

U im moža raźmiaścicca peŭny vystaŭny centr. Sami ž vytvorčyja budynki ŭ asnoŭnym zachoŭvajucca i rekanstrujujucca pad šmatfunkcyjanalnuju prastoru.

Prapanujecca ŭznaŭleńnie histaryčnaj płaniroŭki vuł. Zamkavaj ź likvidacyjaj isnujučaj naziemnaj parkoŭki kala vyšynnaha biźnies-centra, a taksama ŭznaŭleńnie płaniroŭki i zabudovy ansambla vulicy Nova-Miaśnickaj u maštabie histaryčnych formaŭ i płastyki fasadaŭ budynkaŭ. Zaraz hetaja vulica nie isnuje, jana prachodziła pablizu Minskaha zamčyšča. Ciapier tam raźmiaščajecca škoła № 44 (pr. Pieramožcaŭ, 3a) z prylehłaj terytoryjaj.

Mierkavańni minčan

Što prapanoŭvali haradžanie padčas abmierkavańnia detalovaha płana? Hučali roznyja punkty hledžańnia nakont budaŭnictva transpartnaha tunelu pad płoščaj Svabody. Minčanie bajacca, što jon moža paŭpłyvać na kulturny słoj. Taksama niama adnaznačnaha mierkavańnia adnosna budaŭnictva dziciačaha sadka pablizu vuł. Mielnikajcie i pieraŭtvareńniaŭ u zav. Špalernym z źjaŭleńniem novych abjektaŭ na im.

Prahučali i zusim radykalnyja prapanovy pra znos cełaha šerahu budynkaŭ, u tym liku žyłoha doma z handlovym domam «Na Niamizie» jak stylova nie źviazanych z histaryčnym centram. Zrazumieła, takuju prapanovu nielha razhladać usurjoz.

Jak adznačałasia vyšej, prapanovy prajekta pa asvajeńni terytoryi da 2030 hoda rada padtrymała, za vyklučeńniem raźmiaščeńnia dziciačaha sadka. Pra addalenuju pierśpiektyvu infarmacyja prahučała jak aznajamlenčaja. Było skazana, što patrabujecca dadatkovaja dapracoŭka i šyrokaje abmierkavańnie ŭ prafiesijnym asiarodździ pytańniaŭ budučaha raźvićcia histaryčnaj častki horada.

• 0
• 3
• 2
• 3
• 2
• 0
• 1
• 0