Minčuk chacieŭ pravučyć «chama» ŭ tramvai, ale čamuści ŭdaryŭ kalenam u nos školnicu
U Minsku ŭ sud nakiravali kryminalnuju spravu ŭ dačynieńni da 46-hadovaha mužčyny, abvinavačanaha ŭ chulihanstvie. Jak paviedamili Minsk-Navinam u prakuratury Partyzanskaha rajona, incydent adbyŭsia ŭ tramvai maršrutu №6.
Uviečary abvinavačvany jechaŭ u hramadskim transparcie i zaŭvažyŭ pažyłoha pasažyra, pobač ź jakim na siadzieńni znachodziŭsia małady čałaviek. Mužčynu padałosia, što toj nie sastupaje miesca piensijanieru. Jon zrabiŭ zaŭvahu, ale, nie atrymaŭšy reakcyi, raptam udaryŭ «kryŭdziciela» kalenam u nos i vyjšaŭ z tramvaja.
I tut niečakany pavarot u historyi: akazałasia, mužčyna ŭ paryvie hnievu navat nie razhledzieŭ, što bje nie chłopca, a dziaŭčynu, pryčym niepaŭnaletniuju. Školnica jechała ŭ tramvai na treniroŭku.
Pa jaje słovach, jana nie reahavała na zaŭvahi, bo nie chacieła pravakavać kanflikt, dy i ŭ sałonie byli volnyja miescy. Paśla ŭdaru ŭ dziaŭčyny pajšła kroŭ z nosa. Jana vyjšła na nastupnym prypynku i patelefanavała maci, paśla čaho taja źviarnułasia ŭ milicyju.
Asobu napadnika ŭstanavili pa zapisach kamier videanazirańnia, ustanoŭlenych u tramvai. U dačynieńni da mužčyny zaviali kryminalnuju spravu pavodle č. 1 art. 339 KK RB (chulihanstva).
Pa słovach namieśnika prakurora Partyzanskaha rajona Cimura Stužuka, abvinavačvany nie pracuje aficyjna i raniej nie byŭ sudzimy. Jon pryznaŭ svaju vinu i raskajaŭsia ŭ zroblenym. Sud abraŭ jamu mieru strymańnia ŭ vyhladzie padpiski ab niavyjeździe.
Kamientary