Mierc: Jeŭropa dalokaja ad taho, kab havaryć ab uviadzieńni vojskaŭ va Ukrainu

Kancler Hiermanii Frydrych Mierc i premjer-ministr Italii Džordža Miełoni zajavili, što ciapier Jeŭropa nie razhladaje mahčymaść adpraŭki vojskaŭ va Ukrainu, bo hałoŭnym pryjarytetam źjaŭlajecca dasiahnieńnie biezumoŭnaha spynieńnia ahniu z boku Rasii, piša Reuters.

«Nastupnym krokam pavinna stać vyznačeńnie farmatu mirnych pieramovaŭ i mahčymych harantyj biaśpieki dla Ukrainy, kali jany kali-niebudź spatrebiacca. Ale ciapier pra heta havaryć jašče rana», — skazaŭ Mierc. «Niama nijakaj pryčyny kazać pra [vojski] ciapier, my daloka ad hetaha. My chočam, kab spyniłasia zbroja, kab spynilisia zabojstvy… voś nad čym my pracujem ciapier. I nie nad čym inšym», — dadaŭ jon.

U piatnicu ŭ Ałbanii prajšła sustreča lidaraŭ Francyi, Hiermanii, Vialikabrytanii i Polščy razam z prezidentam Ukrainy Uładzimiram Zialenskim. Jany taksama praviali telefonnuju razmovu z prezidentam ZŠA Donaldam Trampam, jaki paviedamiŭ, što ŭ paniadziełak źbirajecca pahavaryć z rasijskim prezidentam Uładzimiram Pucinym.

Premjer-ministr Italii Džordža Miełoni na sustrečy nie prysutničała. Italjanskija ŚMI śćviardžajuć, što heta było zroblena naŭmysna, pakolki prezident Francyi Emanuel Makron nibyta nie chacieŭ jaje bačyć u hetym kole.

Kamientujučy situacyju, Miełoni adznačyła: «Italija hatovaja dałučycca da luboha mižnarodnaha farmatu, jaki nakiravany na spynieńnie vajny, ale nieabchodna paźbiahać raskołu ŭnutry Zachadu. Zachodniaje adzinstva było našaj hałoŭnaj mocaj z pačatku ŭvarvańnia Rasii. U taki dalikatny momant treba adkłaści asabistyja supiarečnaści, jakija mohuć padarvać heta adzinstva».

Mierc taksama paviedamiŭ, što Jeŭrasajuz pracuje nad novym pakietam sankcyj suprać Maskvy paśla niaŭdałych pieramoŭ u Stambule, dzie ŭpieršyniu za try hady adbyŭsia asabisty kantakt pradstaŭnikoŭ Rasii i Ukrainy. «Pieramovy ŭ Stambule nie apraŭdali našych čakańniaŭ, niahledziačy na vielmi kanstruktyŭnuju pazicyju ŭkrainskich pieramoŭščykaŭ», — adznačyŭ jon.

Pazicyja Mierca nakont vojskaŭ supadaje ź linijaj jaho papiarednika Ołafa Šolca, jaki taksama ličyŭ, što zaraz hałoŭnaje — dasiahnieńnie mirnaha pahadnieńnia.

Premjer-ministr Vialikabrytanii Kir Starmier raniej vykazvaŭsia za mahčymaść nakiravańnia miratvorcaŭ, ale tolki pry najaŭnaści amierykanskich harantyj biaśpieki dla jeŭrapiejskich krain.

Rasija nieadnarazova adchilała ideju prysutnaści zachodnich sałdat z krain NATA va Ukrainie.

• 0
• 2
• 1
• 0
• 0
• 0
• 0
• 0