Pobač z Nacbankam vystraiłasia vialikaja čarha. Chtości navat stajaŭ usiu noč
Nacbank siońnia prezientavaŭ jubilejnyja banknoty i maniety z nahody 80-hodździa Pieramohi. Heta vyklikała ažyjataž u peŭnych kołach.
Kupić jubilejnyja maniety i banknoty, jakija vypuścili abmiežavanym tyražom, možna ŭ kasach Nacbanka na vulicy Tałstoha. Da adkryćcia kala budynka sabrałasia čarha, piša Onliner.by
Achvotnyja kupić maniety i banknoty stajali ŭ chaatyčnym paradku. Akazałasia, što zajmać fizičnuju čarhu niama sensu — treba zapisvacca ŭ śpis. Śpis uznačalvaŭ mužčyna pa imieni Valeryj, jaki stajaŭ ź siniaj tečkaj u ruce.
Na prostym arkušy farmatu A4 zapisany numary, imiony i proźviščy, niekatoryja pakidali numary telefonaŭ.
«Farmiravałasia čarha z učarašniaha ranku. Ja pryjechaŭ a 7 ranicy, mnie pieradali śpis, pradziažuryŭ dźvie hadziny. Ludzi padychodzili i zapisvalisia. Na siońniašniuju ranicu ŭ śpisie było 300 čałaviek», — raspavioŭ mužčyna.
Žurnalistam Onliner.by dastaŭsia numar 310, im paraili pryjechać da 16 hadzin. Čarha i śpis — źjava samaarhanizavanaja, mnohija jość u kłubie kalekcyjanieraŭ.
«Ja navat čuŭ, što kahości siudy za manietami pasłaŭ načalnik!» — raspaviadaje nieznajomiec z natoŭpu.
Parušać vyznačany paradak nichto nie maje namieru — usie spakojna zapisvajucca i čakajuć. Niekatoryja adychodziać patelefanavać znajomym i paviedamić pra situacyju.
«Stajać zvyčajnyja dziadźki i ciotki!» — emacyjna raspaviadaje žančyna ŭ słuchaŭku.
«Dy heta ŭsie kalekcyjaniery stajać! Mahčyma, hetaja manieta chutka ŭ 10 razoŭ daražej budzie!» — nie mienš emacyjanalna adkazvaje joj mužčynski hołas u słuchaŭcy.
Jak raspaviali kalekcyjaniery, kaštoŭnaść sieryi ŭ tym, što jana pryśviečanaja jubileju Pieramohi i vypuščanaja nievialikim tyražom. Siarebranyja maniety cikavyja jašče i vahoj — dźvie ŭncyi, a taja, što ź nikielu, — «pryhožaja i kalarovaja».
Kalekcyjaniery adznačajuć, što takaja čarha — zvyčajnaja sprava ŭ dzień pastupleńnia pamiatnych maniet.
«Jak nie kupić manietu, pryśviečanuju 80-hodździu Pieramohi, kali ŭ mianie jość da 50– i 60-hodździa? Kalekcyju ja źbiraju 30 hadoŭ, ale pa kolkaści nie skažu — nie ličyła», — uśmichajecca žančyna z natoŭpu.
Tym časam da natoŭpu vyjšaŭ mužčyna, jaki vyviedaŭ situacyju. Jon paviedamlaje: maniety vydajuć pa adnoj, banknoty — pa 5 štuk, pracuje adna kasa.
Bližej da 9 hadziny z budynka źjaŭlajecca pieršy ŭładalnik banknoty i dźviuch maniet. Mužčynu adrazu ž abstupaje natoŭp, jaki prosić pakazać kuplenaje. Akazvajecca, maniety mužčyna kupiŭ dla siabie, a voś banknotu pieradaŭ inšamu čakajučamu.
Kupiura ŭ 80 rubloŭ pradajecca ŭ pryhožaj čyrvonaj vokładcy — usio razam abydziecca ŭ 120 rubloŭ. Apošni raz, darečy, pamiatnyja kupiury vypuskali ŭ 2016 hodzie. Ale heta asablivaja nie tolki z-za unikalnaha dyzajnu i abmiežavanaha vypusku ŭ 80 000 štuk. Upieršyniu pamiatnuju sieryju, pryśviečanuju jubileju Pieramohi, dadali banknotaj, da hetaha vypuskalisia tolki maniety.
Na kupiury, da słova, zastałosia vyjava nieisnujučaj słavutaści — dziŭnaha młyna, jakuju dyzajnier uziaŭ sa stoka.
Za zachavanaść maniet chvalavacca nie prychodzicca — kožnaja zapakavanaja ŭ futlar. Mužčyna, jaki ich kupiŭ, raspavioŭ, što jon — uładalnik «dastatkova vialikaj kalekcyi», jakuju zachoŭvaje ŭ albomach. Surazmoŭca padkreślivaje: na hetym zachapleńni jon nie zarablaje. Usie ekzemplary, pa słovach minčanina, jon kuplaje tolki naŭprost u bankach — pierakupščyki jaho pryncypova nie cikaviać.
Spačatku kupić pamiatnyja maniety jon paprasiŭ mamu, ale z-za pracy žančyna nie zmahła vykanać prośbu. Tady mužčyna vyrašyŭ pryjechać sam, niahledziačy na pieramiaščeńnie ŭ invalidnaj kalascy. U razmovie jon niekalki razoŭ padkreślivaje, nakolki važnyja roŭnyja ŭmovy dla ŭsich.
«Pieršy raz ja pryjechaŭ siudy ŭčora ŭ rajonie druhoj hadziny dnia, śpisaŭ nie było. Druhi raz — u 23 hadziny, pierada mnoj byli 4 čałavieki, raskazali pra śpis. Mnie pajšli nasustrač i dazvolili prajści pieršym. Ja tut byŭ z 23 hadzin i da adkryćcia kasy», — raspavioŭ mužčyna.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary