Novaja mikrachvalevaja sistema abiasškodžvaje rai dronaŭ za siekundy

Jak paviedamlaje Interesting Engineering, kampanija Epirus, jakaja śpiecyjalizujecca na zbroi nakiravanaj enierhii, pastaviła pieršy dośledny ŭzor sistemy ExDECS (Expeditionary Directed Energy Counter-Swarm — Ekśpiedycyjnaja sistema nakiravanaj mikrachvalevaj niejtralizacyi roju) u rasparadžeńnie marskoj piachoty ZŠA.

ExDECS ujaŭlaje saboj partatyŭnuju vysokamahutnuju mikrachvalevuju zbroju, jakuju možna ŭstaloŭvać na mašyny abo pryčepy. Jana vykarystoŭvaje nakiravanaje vypramieńvańnie dla padaŭleńnia nievialikich dronaŭ 1-j i 2-j hrup — heta, jak praviła, lohkija aparaty, što vykarystoŭvajucca dla vyviedki abo ataki. U adroźnieńnie ad kłasičnych srodkaŭ supraćpavietranaj abarony, ExDECS niejtralizuje drony nie fizična, a bieskantaktna, uździejničajučy na elektroniku adrazu cełaj hrupy.

Sistema zasnavanaja na płatformie Leonidas Expeditionary, taksama raspracavanaj Epirus. Jaje klučavaja asablivaść — mahčymaść adnačasovaj niejtralizacyi mnostva pavietranych pahroz. Dziakujučy kampaktnamu dyzajnu, ExDECS zručna vykarystoŭvać u palavych umovach, što asabliva važna dla padraździaleńniaŭ, jakija dziejničajuć u składanaj abo źmienlivaj abstanoŭcy.

Unutranaja architektura ExDECS pabudavanaja na ćviordacielnych kampanientach, što robić jaje nadziejnaj i prostaj u absłuhoŭvańni ŭ paraŭnańni sa starymi vakuŭmnymi technałohijami.

Važny elemient kanstrukcyi — lohkazamiennyja ŭzmacnialnyja moduli LRAM (Line Replaceable Amplifier Modules), jakija zabiaśpiečvajuć modulnaść sistemy i dajuć mahčymaść chutka adnavić jaje pracazdolnaść u vypadku niaspraŭnaści asobnych kampanientaŭ.

Moduli LRAM nie tolki zamiennyja, ale i dajuć mahčymaść naroščvać mahutnaść sistemy, adaptujučy jaje pad kankretnyja zadačy — ad abarony adnaho aŭtamabila da stvareńnia poŭnavartasnaj stacyjanarnaj ustanoŭki.

Sistemu taksama lohka naładzić pad kankretnyja ŭmovy. Jaje paramietry — častata, forma sihnału, mahutnaść — mohuć źmianiacca prahramna, biez zamieny aparatnaha zabieśpiačeńnia. Heta robić ExDECS hnutkim instrumientam, jaki možna apieratyŭna adaptavać da roznych typaŭ pahroz.

ExDECS raspracavanaja jak častka namahańniaŭ ZŠA pa stvareńni ekanamičnaj sistemy abarony ad BPŁA. Adna z hałoŭnych pieravah — adsutnaść bojeprypasaŭ i minimalny košt «strełu», bo sistema vykarystoŭvaje tolki elektraenierhiju. Heta asabliva aktualna ŭ situacyjach, kali tannyja drony masava atakujuć pazicyi, a zapasy rakiet i snaradaŭ abmiežavanyja.

Jak padkreślivajuć pradstaŭniki Epirus, novaja technałohija dazvalaje efiektyŭna abaraniacca ad bieśpiłotnikaŭ va ŭmovach pierahružanaha radyjočastotnaha śpiektru i chutkaha źmianieńnia abstanoŭki. Pavodle ich mierkavańnia, takija sistemy ŭ budučyni mohuć zaniać važnaje miesca ŭ składzie sučasnych sił supraćpavietranaj abarony — naroŭni z radarami, srodkami radyjoelektronnaj baraćby i kłasičnymi pierachopnikami.

• 20
• 1
• 1
• 0
• 0
• 0
• 0
• 0