Na minułym tydni amierykanskaja analityčnaja firma Piper Sandler skarekciravała svaju pazicyju pa EPAM Systems, paniziŭšy rejtynh akcyj z «vyšej za rynak» da «niejtralnaha» i ŭstanaviŭšy novuju metavuju canu ŭ $170. Źmiena adlustroŭvaje zakłapočanaść nakont strymanaha popytu i jaho patencyjnaha ŭpłyvu na rost dachodaŭ kampanii, paviedamlaje Devby.io.
Akcyi EPAM ciapier handlujucca prykładna pa $157. Z pačatku hoda ich kaciroŭki źnizilisia bolš čym na 30%, chacia dadzienyja InvestingPro pakazvajuć, što kampanija zachoŭvaje dobruju ahulnuju acenku finansavaha zdaroŭja. Metavaja (jana ž «spraviadlivaja») cana akcyj — heta cana, jakaja raźličana z ulikam upłyvovych na jaje ekanamičnych faktaraŭ (naprykład, pamieru prybytku, stanu aktyvaŭ kampanii, rynačnych pierśpiektyŭ).
EPAM Systems u lutym ustanaviła metavyja pakazčyki rostu dachodaŭ na 2025 finansavy hod u dyjapazonie 10—14% z prahnazujemym arhaničnym rostam dachodaŭ 0,9—4,9%, ale moža sutyknucca ź ciažkaściami ŭ ich dasiahnieńni. Pieršapačatkovy prahnoz byŭ zasnavany na čakanym palapšeńni ŭ druhoj pałovie hoda, ale ŭ Piper Sandler ciapier sumniavajucca ŭ im z-za zapavoleńnia pracesaŭ pryniaćcia rašeńniaŭ. Pavodle analizu InvestingPro, ciapier kampanija handlujecca nižej za svaju ŭnutranuju vartaść, a metavyja pakazčyki analitykaŭ varjirujucca ad $180 da $300.
U Piper Sandler miarkujuć, što prahnoz dachodaŭ EPAM moža być pierahledžany ŭ bok panižeńnia na 300—600 bazisnych punktaŭ, pakolki vierahodnaść adnaŭleńnia ŭ druhoj pałovie hoda pad sumnievam.
Patencyjnaje źnižeńnie prahnozu dachodaŭ adyhrała vialikuju rolu ŭ panižeńni rejtynhu akcyj. U Piper Sandler ličać, što ŭ ciapierašnich abstavinach EPAM budzie składaniej raści. Firma addaje pieravahu inšym kampanijam u siektary, takim jak Accenture, jakaja ličycca bolš stabilnaj, abo Globant, u jakoj čakajecca adnosna bolš vysoki rost.
Karekciroŭka rejtynhu Piper Sandler źjaŭlajecca važnaj padziejaj dla inviestaraŭ i inšych udzielnikaŭ rynku, pakolki moža paŭpłyvać na ŭsprymańnie rynkam dynamiki akcyj EPAM u bližejšaj pierśpiektyvie.
Tym časam niadaŭna EPAM adrapartavała ab dachodach za 4 kvartał, jakija pieravysili čakańni analitykaŭ. Skaryhavany prybytak na akcyju skłaŭ $2,84, što lepš za prahnoz $2,75. Dachod za kvartał dasiahnuŭ $1,25 młrd suprać aryjencirovačnych $1,21 młrd, pavialičyŭšysia na 7,9% u paraŭnańni ź minułym hodam.
Japonskaja inviestfirma Mizuho Securities skarekciravała svaju metavuju canu akcyj EPAM z $282 da $267, zachavaŭšy rejtynh «vyšej za rynak». Hetaja karekciroŭka adbyvajecca na fonie prykmiet adnaŭleńnia popytu i zapłanavanych stratehičnych inviestycyj kampanii ŭ novyja technałohii, naprykład u hienieratyŭny ŠI. Amierykanskaja Guggenheim taksama krychu źniziła metavuju canu z $290 da $285, ale paćvierdziła rejtynh «kuplać», spasłaŭšysia na stanoŭčuju dynamiku arhaničnaha rostu vyručki i stratehičnyja ŭkładańni. Abiedźvie firmy adznačyli, što EPAM demanstruje nižejšuju, čym čakałasia, apieracyjnuju maržu, ale ličać heta časovaj źjavaj. Usio heta, na dumku analitykaŭ, adlustroŭvaje vieru ŭ zdolnaść EPAM spravicca ź ciapierašnimi vyklikami i skarystacca budučymi mahčymaściami.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary