Stała viadoma, jak Tramp choča nacisnuć na Kitaj u raźviazanaj handlovaj vajnie

Administracyja Donalda Trampa płanuje vykarystać pieramovy ab taryfach, kab prymusić handlovych partnioraŭ ZŠA abmiežavać svaje suviazi z Kitajem, piša The Wall Street Journal.

Stratehija praduhledžvaje zaklučeńnie damoŭlenaściaŭ, pavodle jakich ZŠA skasujuć abo źniziać handlovyja barjery ŭ abmien na izalacyju kitajskaj ekanomiki.

Pavodle płana, ZŠA buduć prasić bolš jak 70 krain nie dazvalać Kitaju adpraŭlać tavary tranzitam, nie davać kitajskim kampanijam mahčymaści abychodzić taryfy praz łakalizacyju vytvorčaści, a taksama nie prymać u siabie tannyja pramysłovyja tavary z Kitaja. Meta — asłabić ekanomiku KNR i źnizić jaje pieramoŭnyja mahčymaści pierad mahčymaj sustrečaj Trampa i Si Czińpina.

Inicyjataram takoj stratehii staŭ ministr finansaŭ ZŠA Skot Besent, jaki aktyŭna ŭdzielničaje ŭ handlovych pieramovach paśla abviaščeńnia Trampam 90-dzionnaj paŭzy va ŭviadzieńni taryfaŭ dla bolšaści krain, akramia Kitaja. 

Hetaja inicyjatyva stała častkaj šyrejšaha płana izalacyi kitajskaj ekanomiki, jaki padtrymlivajecca mnohimi słužboŭcami ŭ administracyi Trampa. 

Adnak kančatkovaja meta palityki Trampa adnosna Kitaja pakul nie vyznačanaja. Besent padkreślivaje, što mahčymaść dla pieramoŭ ź Piekinam jašče isnuje, ale dla hetaha nieabchodny ŭdzieł Trampa i Si. Pres-sakratarka Biełaha domu Keralin Levit kaža, što inicyjatyva ciapier u rukach Kitaja: «Kitaj musić zaklučyć ździełku z nami. My nie abaviazanyja rabić heta ź imi. Kitaj choča adnaho — amierykanskaha spažyŭca».

Na fonie hetaha Kitaj taksama aktyvizuje svaju dypłamatyju: Si Czińpin niadaŭna naviedaŭ Vjetnam — krainu, jakaja mocna paciarpieła ad taryfaŭ ZŠA — i padpisaŭ dziasiatki ekanamičnych damoŭlenaściaŭ. Jak adznačyŭ Piter Chareł, były daradca pa mižnarodnaj ekanomicy ŭ Saviecie nacbiaśpieki ZŠA pry Bajdenie, Piekin umieła karystajecca situacyjaj, choć jaho mahčymaści adkazać abmiežavanyja. Jon adznačyŭ, što Kitaj «nie stanie zamienaj ZŠA jak krynicy popytu dla mnohich krain, što raźvivajucca».

Choć ZŠA i źjaŭlajucca «čystym imparcioram», Kitaj usio bolš robić staŭku na samadastatkovaść. Ekśpierty prahnazujuć, što stratehija Trampa moža stvaryć Kitaju ekanamičnyja ciažkaści, ale Piekin zdolny efiektyŭna vykarystoŭvać palityčny bok situacyi.

ZŠA ŭ ramkach handlovaj vajny z Kitajem uviali na kitajskija tavary pošliny ŭ pamiery 145%, Piekin adkazaŭ uviadzieńniem pošlin u 125%.

• 5
• 1
• 3
• 9
• 0
• 0
• 0
• 0