Hrodzieniec stvaryŭ dakładnuju kopiju Farnaha kaścioła ŭ minijaciury i drukuje fihurki na 3D-pryntary
Hrodzieniec Ihar Apiakun kanstrujuje meblu dla kruiznych łajnieraŭ — stvaraje pratatypy praź śpiecyjalnuju prahramu. Adnojčy jon vyrašyŭ paekśpierymientavać z pradmietami bolš składanaj formy i tak stvaryŭ dakładnuju kopiju Farnaha kaścioła, a ciapier raspracoŭvaje fihurku Kałožy. Pra heta hrodzieniec raskazaŭ u fejsbuk-supołcy «Hrodna», zaŭvažyŭ Hrodna.life.
U dziacinstvie rabiŭ fihurki z kardonu, u darosłym uzroście — na 3D-pryntary
Madelavańniem Ihar zachaplaŭsia ź dziacinstva, praŭda, tady rabiŭ madelki z kardonu. U darosłym uzroście chobi pierarasło ŭ prafiesiju — hrodzieniec staŭ kanstruktaram.
Pracujučy ŭ śpiecyjalnaj prahramie dla madelavańnia, mužčyna ŭbačyŭ, što tam jość opcyja 3D-druku. Akramia kanstrujavańnia mebli dla łajnieraŭ, Ihar vyrašyŭ pasprabavać zrabić bolš składanyja madeli.
«Mianie zacikaviła. Padumaŭ, što možna zrabić niešta bolš składanaje — u mianie mama ŭvieś čas chodzić u (Farny — red.) kaścioł. I ja vyrašyŭ zrabić joj padarunak, tak i atrymałasia», — apisvaŭ u instahramie praces stvareńnia fihurki Ihar.
Stvareńnie pratatypa zaniało miesiac, druk — niekalki hadzin
Na raspracoŭku pratatypa spatrebiŭsia miesiac. Ihar adznačaje, što hatovych čarciažoŭ Farnaha kaścioła niama. Tamu hrodzieniec samastojna vyvučaŭ architekturu budynka i praporcyi, rabiŭ fatahrafii, kab paśla sprajektavać madel u prahramie.
Druk fihurki na 3D-drukarcy zajmaje piać hadzin. Daŭžynia — usiaho 6 santymietraŭ. Samaja maleńkaja detal fihurki — kryž na viežy, taŭščynia jakoha 0,1 mm.
«Heta vializnaja detalizacyja, raniej dastupnaja tolki samym prasunutym juvieliram. U madelach pieradadzienyja ŭsie nadpisy, jakija jość na chramie — nad uvachodam i na pastamiencie Isusa. Pieradaŭ usie niuansy».
Ihar dadaje, što jašče 20 hadoŭ tamu pra stvareńnie nastolki detalizavanaj fihurki možna było tolki maryć. Takaja dakładnaść stała mahčymaj dziakujučy źjaŭleńniu novych technałohij kanstrujavańnia.
Ciapier mužčyna choča raspracavać madel Kałožy.
«U joj samaja vialikaja składanaść — ustaŭki ŭ vyhladzie kryžoŭ z kalarovaha kamienia. Tut ža važna supastavić mahčymaści vizualizacyi i techničnych instrumientaŭ, jakimi ja vałodaju. Namalavać možna ŭsio što zaŭhodna, a ŭvasobić — prablema. Budu dumać, jak zrabić tak, kab usio było dakładna».
Dzie adšukać fihurki hrodzienca
Ihar zrabiŭ niekalki varyjantaŭ fihurak Farnaha kaścioła: prazrystuju, pakrytuju załacistaj i srebnaj farbaj, a taksama kalekcyjnuju — madel razmalavanaja pa padabienstvie aryhinała. Niekalki fihurak hrodzieniec pieradaŭ u suvienirnuju kramu Friends u CUMie, pradajucca madeli i ŭ suvienirnaj kramie kala sinahohi.
Taksama kupić madeli Farnaha kaścioła možna praz Instagram-akaunt hrodzienca. Košt fihurak pačynajecca ad 35 rub.
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Kamientary