Azaraŭ raskazaŭ, čym budzie zajmacca jaho detektyŭnaje biuro «Reks»
Alaksandr Azaraŭ razam z paplečnikam z «Bajpoła» Stanisłavam Łupanosavym zasnavali 24 sakavika 2025 hoda ŭ Polščy detektyŭnaje ahienctva. «Biełsat» daviedaŭsia ŭ Azarava, ź jakimi zapytami tudy možna iści, dy inšyja padrabiaznaści.
Poŭnaja nazva kampanii — «Agencja detektywistyczna Reks» (Detektyŭnaje ahienctva «Reks»). Žurnalisty cikaviacca, jak prydumvałasia nazva. Alaksandr Azaraŭ kaža, heta pieršaja nazva, jakaja pryjšła ŭ hałavu, da taho ž jość stanoŭčaja asacyjacyja ź sieryjałam «Kamisar Reks».
«Dumaju, u takoj spravie pieršaje, što pryjdzie na dumku, — zaŭsiody pravilnaje budzie», — adznačaje surazmoŭca.
Dziejnaść kampanii akreślenaja jak detektyŭnaja. Heta aznačaje davoli šyroki śpiektr pasłuh. Kampanija moža vykryvać prasłuchoŭvańnie ŭ pamiaškańniach, aŭtamabilach i telefonach, kansultavać u halinie biaśpieki, pradavać i zdavać u arendu śpiectechniku, dzielicca surazmoŭca.
«Mahčymy zbor dokazaŭ pa kryminalnych i hramadzianskich spravach, pravierka infarmacyi, roznych faktaŭ, pošuk ludziej, u tym liku rodnych i prodkaŭ. Budziem zajmacca i pravierkaj biźnies-partnioraŭ i patencyjnych pracaŭnikoŭ. Jašče možam zrabić abśledavańnie miascovaści. U našyja kampietencyi ŭvachodziać i siamiejna-šlubnyja spravy, źviazanyja z vykryćciom zdrady ci apiekaj nad dziećmi», — praciahvaje surazmoŭca.
Kali nas cikavić niešta ź pieraliku, choć pravierka druhoj pałavinki, choć biźnies-partniora — Alaksandr Azaraŭ zaprašaje karystacca pasłuhami, ale ich vykanańnie mahčymaje tolki paśla zaklučeńnia aficyjnaj damovy, padkreślivaje jon.
Ideja adkryć detektyŭnaje ahienctva pryjšła tamu, što bolšaść ludziej u «Bajpole» źjaŭlajucca śpiecyjalistami ŭ akreślenych spravach, praciahvaje Azaraŭ.
«Popyt my jašče nie vyvučali, ale spadziajomsia, što praca ŭ nas budzie, bo my pieršaja padobnaja biełaruskaja kampanija ŭ Polščy, jakaja da taho ž moža akazvać pasłuhi na rasiejskaj movie. U Polščy miljony ŭkraincaŭ i kala 300 tysiač biełarusaŭ. Hetyja ludzi taksama patrabujuć pasłuh», — raskazvaje jon.
Pakul arhanizacyja tolki zarehistravałasia, tamu spravaŭ, jakija byli b u pracy i pra jakija možna było b raskazać, jašče niama. Taksama nie źjaviłasia sacsietak ci sajtu kampanii.
«Było šmat administracyjnaj pracy, kab arhanizavać dziejnaść. Heta [rehistracyju. — Zaŭv. red.] zaŭvažyli ŚMI i nadrukavali hetuju infarmacyju. Dziejnaść jašče nie pačałasia, ale my možam brać na pracu ludziej, jakija majuć dośvied u praviadzieńni apieratyŭna-vyšukovych mierapryjemstvaŭ», — kaža Azaraŭ.
Pakul praca nie pačałasia, to i prajs-list nie składali, tamu, kolki buduć kaštavać pasłuhi biełaruskich detektyvaŭ u Polščy, surazmoŭca skazać nie moža.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary