Amierykanski miljarder Iłan Mask zajaviŭ, što choča adpravić rakietu na Mars u nastupnym hodzie, a pačać piłatavanyja paloty — užo ŭ 2029-m. Pra heta jon napisaŭ u svajoj sacsietcy X ranicaj u subotu, 15 sakavika.
U svaim paście Iłan Mask adznačyŭ, što choča adpravić rakiety na Mars da kanca 2026 hoda. U pryvatnaści, jon napisaŭ pra toje, što jahonaja kampanija SpaceX płanuje zapuścić svoj kaśmičny karabiel Starship z čałaviekapadobnym robatam Optimus, stvoranym Tesla.
Optimus, taksama viadomy jak Tesla Bot, — čałaviekapadobny robat, jaki raspracoŭvajecca kampanijaj Maska. 170-santymietrovy android zadumany dla vykanańnia «niebiaśpiečnych, paŭtaralnych i sumnych zadač», havaryłasia ŭ jaho pradstaŭleńni ŭ 2021 hodzie.
Iłan Mask i raniej byŭ viadomy tym, što vyznačaŭ praźmierna aptymistyčnyja terminy. Ale kali vysadka ŭ nastupnym hodzie sapraŭdy projdzie paśpiachova, to Mask kaža, što choča pačać adpraŭlać ludziej na Mars užo ŭ 2029 hodzie, choć, ź jahonych słoŭ, bolš imavierna, što heta adbudziecca ŭ 2031 hodzie.
Pa słovach Maska, jahonaja pramiežkavaja meta — «zrabić tak, kab kožny moh adpravicca na Mars, kali zachoča», a kančatkovaja — «pieratvaryć Mars u cyvilizacyju, jakaja samapadtrymlivajecca».
Dla realizacyi svaich metaŭ SpaceX nieabchodna dakazać nadziejnaść, biaśpieku i zdolnaść Starship da składanaj dazapraŭki na arbicie, jakaja krytyčna važnaja dla dalokich kaśmičnych pieralotaŭ. Pakul što, niahledziačy na toje, što ŭ chodzie šmatlikich vyprabavalnych palotaŭ pratatypa Starship byli dasiahnutyja peŭnyja pośpiechi, uklučajučy vychad u kosmas, kampanija sutyknułasia i ź niaŭdačami.
U sakaviku hetaha hoda adbyŭsia čarhovy incydent, kali rakieta Starship vybuchnuła paśla ŭźlotu, što stała druhim niaŭdałym zapuskam u hetym hodzie.
Najbolš ščaślivym na inaŭhuracyi Trampa vyhladaŭ Iłan Mask VIDEA
Starship palacić na Mars užo ŭ nastupnym hodzie
Karabiel Starship vybuchnuŭ padčas siomaha testavaha palotu
Technałahičny praryŭ SpaceX: rakieta-nośbit viarnułasia na startavy kompleks
SpaceX upieršyniu paśpiachova viarnuła na Ziamlu šmatrazovy paskaralnik samaj ciažkaj rakiety «Staršyp»
Kamientary
Lepšyja: Tramp, Mask, Vens, Pucin, Łukašenka.