Sienatary-respublikancy zaklikajuć Trampa adnavić dapamohu Ukrainie i jaje dostup da raźvieddanych
Častka amierykanskich zakanadaŭcaŭ z Respublikanskaj partyi pačynajuć zaklikać prezidenta ZŠA Donalda Trampa admianić svajo rašeńnie ab prypynieńni vajskovaj i raźviedvalnaj dapamohi Ukrainie, piša «Jeŭrapiejskaja praŭda».
Respublikancy papiaredžvajuć, što doŭhaje spynieńnie amierykanskaj dapamohi padčas vajennych dziejańniaŭ budzie mieć surjoznyja zhubnyja nastupstvy.
Na ich dumku, Tramp mieŭ prava časova spynić pastaŭki zbroi va Ukrainu, kab acanić chod vajny, akazać cisk na sajuźnikaŭ pa NATA i stvaryć akno dla pieramovaŭ ab mirnym pahadnieńni pamiž Ukrainaj i Rasijaj. Ale ŭ toj ža čas zakanadaŭcy ad Respublikanskaj partyi papiaredžvajuć, što spynieńnie pastavak zbroi i bojeprypasaŭ na nadta doŭhi čas moža mieć razburalny ŭpłyŭ na bajazdolnaść Ukrainy, što padarvie jaje ryčahi ŭpłyvu ŭ pieramovach z Rasijaj.
Akramia taho, jany padkreślivajuć nieabchodnaść nieadkładna adnavić abmien raźvieddanymi, pakolki, pa słovach zakanadaŭcaŭ, Złučanyja Štaty naŭrad ci vyjhrajuć ad pazbaŭleńnia Ukrainy krytyčna važnaj raźviedvalnaj infarmacyi z pola boju.
«Heta tryvoha za ŭkrainski narod. Mianie bolš turbuje, jak da hetaha pastaviacca ludzi na poli boju», — skazaŭ sienatar Cim Cilis, kamientujučy paŭzu ŭ amierykanskich vajskovych pastaŭkach.
Cilis papiaredziŭ, što paŭza ŭ akazańni dapamohi, pra jakuju było abvieščana ŭ paniadziełak, «moža akazacca karysnaj dla Pucina». Jon taksama skazaŭ, što va Ukrainy dastatkova zbroi i bojeprypasaŭ, kab pakul utrymlivać liniju frontu, ale vykazaŭ nadzieju, što paŭza ŭ vajskovaj dapamozie praciahniecca niadoŭha. Pry hetym sienatar «nie suprać» paŭzy, kali heta budzie karotkaterminovaja «pieramoŭnaja taktyka».
«Ja spadziajusia i malusia, kab jana była niadoŭhaj. Dumaju, tak i budzie», — dadaŭ Cim Cilis.
Staršynia Kamiteta Sienata pa asihnavańniach Śjuzan Kolinz zajaviła, što vystupaje suprać spynieńnia vajskovaj dapamohi.
«Ja nie dumaju, što my pavinny prypyniać našy namahańni. Heta ŭkraincy pralivajuć kroŭ», — skazała jana, nazvaŭšy ciapierašni momant «krytyčnym dla Ukrainy».
Lidar respublikanskaj bolšaści ŭ Sienacie Džon Tjun padkreśliŭ, što paŭza ŭ vajskovaj dapamozie Ukrainie budzie časovaj.
«Heta paŭza, što važna, a nie prypynieńnie. Dumaju, heta častka pieramoŭ. I ja spadziajusia, što ŭrešcie my pasadzim ludziej za stoł pieramoŭ i zmožam damovicca ab pahadnieńni, jakoje pryniasie mirnaje raźviazańnie hetaha trochhadovaha kanfliktu i, spadziajusia, budzie pavažać suvierenitet ukrainskaha naroda», — skazaŭ jon.
Sienatar Lindsi Hrem taksama adznačyŭ, što zaniepakojeny abvieščanaj Trampam paŭzaj pa abmienie raźvieddanymi z Ukrainaj.
«Ja vielmi zaniepakojeny hetym u doŭhaterminovaj pierśpiektyvie,» — zaŭvažyŭ jon.
Sienatar Džon Kornin, člen kamiteta Sienata pa raźviedcy, skazaŭ, što «raźviedvalnyja danyja, jakija my davali ŭkraincam, byli vielmi važnyja dla taho, kab jany mahli praciahvać baraćbu».
«Ja spadziajusia, što paŭza budzie skasavanaja ŭ niejki momant», — zajaviŭ jon.
Sienatar Majk Raŭnds, člen kamiteta pa Uzbrojenych siłach, zajaviŭ, što nie padtrymlivaje rašeńnie ab spynieńni abmienu raźvieddanymi z Ukrainaj, a taksama spadziajecca, što paŭza ŭ vajskovaj dapamozie Ukrainie budzie tolki časovaj.
Maxar zakryŭ Ukrainie dostup da svaich spadarožnikavych zdymkaŭ
ZŠA adklučyli Ukrainie celepakazalniki dla HIMARS
«Tuman vajny stanie dla USU značna bolš hustym». Da čaho moža pryvieści admova ZŠA pieradavać svaje raźvieddanyja Ukrainie
Daradca Trampa raskazaŭ, kali ZŠA mohuć razmarozić vajskovuju dapamohu Ukrainie
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie4
Kamientary
"Sanitary demakraty zaklikajuć Trampa..."