Litoŭskaha palityka-papulista zaprasili ŭ ZŠA na sustreču z Maskam. Toje, što heta razvod, jon zrazumieŭ tolki ŭ aeraporcie
Lidar papulisckaj litoŭskaj partyi «Niomanskaja zara» Remihijus Žamajtajcis trapiŭ u niepryjemnuju historyju. Jon pavieryŭ, što jaho z žonkaj zaprasili na sustreču z pradstaŭnikami Departamienta efiektyŭnaści ŭrada ZŠA (DOGE), adnak u aeraporcie daviedaŭsia, što kvitki na samalot, jakija jon atrymaŭ — lipavyja, piša Delfi.lt.
«Niekalki tydniaŭ tamu z našaj kamandaj źviazaŭsia Rajan Rejdeł z DOGE i skazaŭ, što jon — čałaviek z kamandy Iłana Maska. Dva tydni išła pierapiska, abmien infarmacyjaj, zatym nas zaprasili ŭ ZŠA na sustreču ź ich kamandaj. Meta sustrečy — atrymańnie infarmacyi, sabranaj Ahienctvam ZŠA pa mižnarodnym raźvićci. Adnak siońnia, kali my pryjechali ŭ aeraport, vyśvietliłasia, što heta padman miascovych litoŭcaŭ. Kvitki falšyvyja!», — aburajecca Žamajtajcis.
Z-za hetaha jamu «daviałosia viartacca nazad na pracu».
Taksama palityk apublikavaŭ u sacyjalnych sietkach skrynšoty, na jakich nibyta bačnyja listy, adpraŭlenyja Rajanam Rejdełam ź jahonaj asabistaj elektronnaj pošty. U ich śćviardžajecca, što supracoŭniki pasolstva ZŠA ŭ Litvie pieradali jahony list Iłanu Masku ŭ Ahienctva mižnarodnaha raźvićcia.
U pačatku lutaha Žamajtajcis sapraŭdy napisaŭ list u administracyju ZŠA z prośbaj dać infarmacyju pra niaŭradavyja arhanizacyi ŭ Litvie, jakija atrymlivali dapamohu ZŠA. Palityk zapeŭnivaŭ, što Ahienctva ZŠA pa mižnarodnym raźvićci nibyta akazvaje ŭpłyŭ na ŭnutranuju palityku Litvy.
«Pasolstva ZŠA ŭ Litvie źviarnuła našu ŭvahu na list, jaki vy niadaŭna adpravili spadaru I. Masku z nahody finansavańnia USAID i jaho mahčymaha ŭpłyvu na ŭnutrypalityčnyja pracesy ŭ Litvie. Choć ja i pišu vam pakul nieaficyjna, maja meta — sabrać dadatkovuju infarmacyju dla padrychtoŭki aficyjnaha adkazu, tamu pišu sa svajoj asabistaj elektronnaj pošty i łaskava prašu ciapier nie dzialicca sa srodkami masavaj infarmacyi našaj pierapiskaj», — havorycca ŭ elektronnym liście, adrasavanym Žamajtajcisu.
«Byŭ by ŭdziačny za Vaša mierkavańnie z hetaj nahody i chacieŭ by daviedacca pra mahčymaść asabistaj sustrečy dla bolš dakładnaha abmierkavańnia hetaha pytańnia. U zaležnaści ad vašych mahčymaściaŭ my možam arhanizavać sustreču ŭ ZŠA ci z našymi pradstaŭnikami ŭ pasolstvie ZŠA ŭ Litvie.
Naš departamient asabliva zacikaŭleny ŭ atrymańni dadatkovaj infarmacyi pra vykarystańnie USAID srodkaŭ, pakolki hetaja infarmacyja maje vyrašalnaje značeńnie dla acenki budučaha losu ahienctva. My budziem radyja pryniać vas u ZŠA dla bolš padrabiaznaj hutarki, i DOGE hatovy pakryć vašyja transpartnyja vydatki», — padkreślivajecca ŭ im.
U inšym liście da Žamajtajcisa prykładajucca dakumienty pra braniravańnie avijabileta i hatela i adznačajecca, što jamu nibyta zabraniravany rejs pieršaha kłasa avijakampanii Turkish Airlines.
Pravapapulisckuju partyju «Niomanskaja zara» Remihijus Žamajtajcis zasnavaŭ u listapadzie 2023 hoda. Na apošnich parłamienckich vybarach jana dabiłasia vialikaha pośpiechu, atrymaŭšy kala 15% hałasoŭ vybarščykaŭ i pravioŭšy ŭ Siejm 19 deputataŭ sa 141. Heta byŭ treci vynik z usich palityčnych siłaŭ, i sacyjał-demakraty, jakija pieramahli na vybarach, byli vymušanyja zaprasić «Niomanskuju zaru» va ŭradavuju kaalicyju».
Žamajtajcis raniej nieadnarazova traplaŭ u skandały, źviazanyja ź jahonymi vykazvańniami, jakija traktavalisia jak antysiemickija, taksama jon nievyrazna vykazvaŭsia adnosna anieksii Rasijaj Kryma. U intervju, uziatym letaś niezadoŭha da vybaraŭ, jon stanoŭča vykazvaŭsia adnosna pierśpiektyŭ adnaŭleńnia ekanamičnaha supracoŭnictva ź Biełaruśsiu.
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary