«Dzie-nidzie nam na karyść, dzie-nidzie naŭrad». Łukašenka baicca, što paśla pieramovaŭ u Rasiju viernucca zachodnija kampanii
Alaksandr Łukašenka na vyjaznym sieminary pa sielhastematycy prakamientavaŭ pieramovy Rasii i ZŠA ŭ Er-Ryjadzie.
Łukašenka zajaviŭ, što nie viedaje, čaho chočuć ZŠA ad Rasii. Jon aścierahajecca, što Vašynhton choča sutyknuć Maskvu i Piekin.
«Vy bačycie, jak źmianiajecca palityčnaje stanovišča, jakoje daminavała nad ekanomikaj u suviazi z palitykaj ZŠA i hetak dalej. Ale radavacca nie treba. My nie viedajem, čaho chočuć ZŠA. Kažu heta, bo ja absalutna pahružany ŭ hetyja pytańni.
My nie viedajem, čaho jany zapatrabujuć ad rasijan za spynieńnie vajny i hetak dalej. Mnie zdajecca, što jany pasprabujuć zaraz rasijan sutyknuć z kitajcami. Voś hetaha rasijanam dapuścić nielha», — zajaviŭ Łukašenka.
Jon taksama aścierahajecca, što paśla zaviaršeńnia vajny i źniaćcia sankcyj zachodnija kampanii viernucca ŭ Rasiju, i Biełaruś prajhraje kankurencyju, piša BiełTA.
«Dzie-nidzie, napeŭna, nam na karyść, dzie-nidzie naŭrad ci, kali tudy (damoviacca Pucin i Tramp) viernucca ŭsie hetyja zamiežnyja kampanii — spačatku amierykanskija, a potym inšyja — jeŭrapiejskija. Budzie niaprosta kankuryravać na našym rynku. Ale pradukty charčavańnia buduć patrebnyja ŭsim. Tamu krainu padtrasicie jak naležyć», — adznačyŭ Łukašenka.
Paśla pačatku poŭnamaštabnaj vajny mnohija zachodnija kampanii syšli z Rasii. Biełaruś, straciŭšy zachodnija rynki, amal całkam pieraaryjentavała svaju ekanomiku na rasijski rynak.
Ciapier čytajuć
Na Alaksandru Hierasimieniu napali ŭ centry Varšavy23
Kamientary
heta or))) jak i fota