Makron: Jeŭropa hatovaja pavialičyć vydatki na abaronu i ŭziać na siabie adkaznaść za biaśpieku
Pra heta prezident Francyi paviedamiŭ paśla druhoj na hetym tydni terminovaj sustrečy lidaraŭ zachodnich krain. Post z zajavaj apublikavany na staroncy Emanuela Makrona ŭ Ch.
«My pierakananyja ŭ nieabchodnaści pavieličeńnia našych vydatkaŭ i naroščvańnia našaha patencyjału ŭ halinie abarony i biaśpieki dla Jeŭropy i kožnaj z našych krain. Rašeńni buduć pryniaty ŭ bližejšyja dni i tydni», — napisaŭ Makron.
Druhaja za try dni terminovaja sustreča lidaraŭ zachodnich krain zaviaršyłasia ŭ sieradu. Na joj prysutničali pradstaŭniki ES, Kanady, Isłandyi i Narviehii.
Makron padkreśliŭ, što Jeŭropa padtrymlivaje Ukrainu i hatova pryniać na siabie adkaznaść za zabieśpiačeńnie miru i biaśpieki ŭ rehijonie.
«Heta fundamientalny intares Francyi, i ja jaho harant», — skazana ŭ zajavie.
Pieršaja inicyjavanaja prezidentam Francyi Emanuelem Makronam sustreča prajšła ŭ Paryžy 17 lutaha. U tych pieramovach brali ŭdzieł lidary Francyi, Brytanii, Hiermanii, Italii, Ispanii, Danii, Polščy, Niderłandaŭ, a taksama kiraŭniki NATA i ES.
Pra kankretnyja rašeńni pa vynikach sustrečy nie paviedamlałasia, adnak u ES i NATA zajavili pra nieabchodnaść bolš inviestavać u abaronu, a taksama dać Kijevu nadziejnyja harantyi biaśpieki.
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»31
Kamientary