Tramp i Zialenski raskazali, pra što siońnia razmaŭlali pamiž saboj pa telefonie
12 lutaha prezident ZŠA Donald Tramp pahavaryŭ z kiraŭnikom Rasii Uładzimiram Pucinym, a paśla źviazaŭsia z prezidentam Ukrainy Uładzimiram Zialenskim. Spačatku było viadoma tolki pra fakt apošniaj razmovy, ale paśla abodva prezidenty paviedamili ŭ sacsietkach pra toje, jakija prablemy padčas jaje abmiarkoŭvalisia.
Paviedamleńnie Trampa pra razmovu ź Zialenskim u sacsietcy Truth Social było našmat karaciejšym, čym pra razmovu z Pucinym. Ale ŭ im prezident ZŠA byŭ hetak ža sama napoŭnieny aptymizmam:
«Ja tolki što razmaŭlaŭ z prezidentam Ukrainy Uładzimiram Zialenskim. Razmova prajšła vielmi dobra. Jon, jak i prezident Pucin, choča zaklučyć mir.
My abmierkavali mnostva tem, źviazanych z vajnoj, ale ŭ asnoŭnym sustreču, jakaja pryznačanaja na piatnicu ŭ Miunchienie i dzie delehacyju ŭznačalać vice-prezident Džej Dzi Vens i dziaržaŭny sakratar Marka Rubia.
Spadziajusia, vyniki sustrečy buduć stanoŭčymi. Pryjšoŭ čas spynić hetuju niedarečnuju vajnu, padčas jakoj byli masavyja i zusim niepatrebnyja śmierci i razbureńni. Chaj dabrasłavić Hospad narody Rasii i Ukrainy!», — napisaŭ Tramp.
Zialenski, u svaju čarhu, napisaŭ pra vyniki sustrečy ŭ telehramie:
«Tolki što havaryŭ z Donaldam Trampam. Praciahłaja razmova. Pra mahčymaści dasiahnuć miru. Pra našu hatoŭnaść pracavać razam na ŭzroŭni kamandaŭ. Pra našy technałahičnyja mahčymaści, u pryvatnaści drony i inšyja sučasnyja vytvorčaści.
Udziačny prezidentu Trampu za cikavaść da taho, što my možam zrabić razam. Abmierkavali našu razmovu sa Skotam Biesentam i padrychtoŭku našaha novaha pahadnieńnia pa biaśpiecy i ekanamičnym i resursnym uzajemadziejańni.
Prezident Tramp prainfarmavaŭ mianie pra detali svajoj razmovy z Pucinym. Ukraina bolš za ŭsich choča miru. Vyznačajem našy sumiesnyja z Amierykaj kroki, kab spynić rasijskuju ahresiju i harantavać nadziejny, praciahły mir.
Jak skazaŭ prezident Tramp, let's get it done. Damovilisia pra dalejšyja kantakty i sustrečy».
Paśla Zialenski jašče raz zakranuŭ pytańnie razmovy z Trampam u svaim tradycyjnym viačernim zvarocie:
«Vielmi pradmietnyja pieramovy sa Złučanymi Štatami Amieryki. Była razmova z prezidentam Trampam — dobraja razmova, padrabiaznaja. Ja ŭdziačny prezidentu Trampu za ščyruju cikavaść da našych ahulnych mahčymaściaŭ, da taho, jak my možam razam nablizić sapraŭdny mir.
Praciahłaja razmova. My abmierkavali šmat niuansaŭ — dypłamatyčnych, vajennych, ekanamičnych, i prezident Tramp prainfarmavaŭ mianie pra toje, što jamu skazaŭ Pucin.
Vierym, što siły Amieryki dastatkova, kab razam z nami, razam z usimi partniorami dacisnuć Rasiju i Pucina da miru».
Ciapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary