U Siryi kałonu rasijskich vajskoŭcaŭ nie puścili na bazu ŭ Tartusie
Ministerstva abarony Siryi admoviła rasijskim vajskoŭcam u dopusku na bazu fłotu ŭ Tartusie, paviedamlaje tureckaje vydańnie TRT. Kałona z 30 hruzavikoŭ z rakietnym uzbrajeńniem, jakaja vyjšła ranicaj z avijacyjnaj bazy Chmiejmim, była spynienaja vajskoŭcami, jakija padparadkoŭvajucca novamu ŭradu, piša The Moscow Times.
U vyniku kałonu pratrymali na kantrolna-prapusknym punkcie ŭ Tartusie kala vaśmi hadzin. Paśla šmathadzinnaha čakańnia i sprobaŭ atrymać dazvoł na ŭjezd jana musiła viarnucca ŭ Chmiejmim ni z čym.
Incydent adbyŭsia na fonie niadaŭnich zajaŭ kiraŭnika Minabarony pierachodnaha ŭrada Siryi Murchafy Abu Kasry ab tym, što zachavańnie rasijskich baz u krainie budzie zaležać ad taho, ci pryniasie heta vyhadu novym uładam. Ministr daŭ zrazumieć, što Damask chacieŭ by atrymać eks-prezidenta Siryi Bašara Asada, jaki chavajecca ŭ Maskvie.
Pa słovach Kasry, kiraŭnik urada Siryi Achmied Aš-Šaraa ŭzdymaŭ hetaje pytańnie na sustrečy z rasijskaj delehacyjaj u kancy studzienia. Tady ž abmiarkoŭvałasia vypłata reparacyj, pakolki vojski Rasii dapamahali Asadu ŭtrymlivać uładu, bambardzirujučy harady, dzie znachodziłasia apazicyja.
Pakul pieramovy vynikaŭ nie dali, kazaŭ kiraŭnik delehacyi, namieśnik ministra zamiežnych spraŭ Michaił Bahdanaŭ. Pry hetym Rasija vykazała hatoŭnaść apłacić adnaŭleńnie Siryi, kab atrymać «zialonaje śviatło».
Šancaŭ na pośpiech, adnak, niašmat, bo suprać zachavańnia rasijskich baz vystupaje Turcyja, jakaja dapamahła paŭstancam zrynuć Asada i praciahvaje ich padtrymlivać. Taksama novyja ŭłady razarvali damovu z «Budtranshazam» ab inviestycyjach u port Tartusa ad 2019 hoda, zaklučanuju na 49 hadoŭ.
Maskva ŭžo vyviezła častku ŭzbrajeńnia ź Siryi. U tym liku heta rabiłasia praz bazu ŭ Tartusie.
Baza VMF u Tartusie davała Rasii pramy vychad u Mižziemnaje mora i razam z aeradromam u Chmiejmimie słužyła klučavym punktam dla raspaŭsiudžvańnia ŭpłyvu Kramla na Blizki Uschod i Afryku, a taksama chabam dla pierakidańnia vojskaŭ, najmitaŭ i zbroi.
Zamiest Rasii vajskovyja bazy ŭ Siryi moža raźmiaścić Turcyja
Lidar hrupoŭki CHTŠ Achmied al-Šaraa abvieščany časovym prezidentam Siryi
Novyja ŭłady Siryi patrabujuć ad Rasii vydać Bašara Asada
Novyja ŭłady Siryi pahadzilisia adnavić adnosiny z Rasijaj. Ale tolki paśla pryznańnia pamyłak i vypłaty kampiensacyi
U port Tartusa pryjšli rasijskija karabli. Rasija vyvodzić vojski ź Siryi?
Ryžankoŭ sustreŭsia z novym kiraŭnictvam Siryi
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary