Byłoha prezidenta Balivii Eva Maralesa sprabujuć aryštavać za zhvałtavańnie 15-hadovaj aktyvistki. Jana naradziła ad jaho

Balivijski sud vydaŭ zahad na aryšt byłoha prezidenta krainy Eva Maralesa pa abvinavačańniach u seksualnym złoŭžyvańni adnosna niepaŭnahadovaj dziaŭčyny i handli ludźmi padčas jaho 14-hadovaha prezidenctva. Takoje rašeńnie pryniata paśla taho, jak 65-hadovy palityk dvojčy nie źjaviŭsia na sudovaje pasiadžeńnie, dzie pavinna było razhladacca pytańnie pra jaho papiaredniaje źniavoleńnie, pieradaje vydańnie The Guardian.

Abvinavačańni suprać Maralesa ŭklučajuć epizody seksualnaha hvałtu ŭ adnosinach 15-hadovaj dziaŭčyny i naradžeńnie joju dziciaci ŭ 2016-m hodzie. Dziaŭčyna na toj momant uvachodziła ŭ balivijskuju moładzievuju hvardyju — pradziaržaŭnaje palityčnaje abjadnańnie, stvoranaje samim Maralesam.

U arhanizacyju dziaŭčynu addali jaje baćki dziaržsłužboŭcy, jakija potym zapluščvali vočy na fakty žorstkaha abychodžańnia Maralesa ź ich dačkoj i jaje nastupnaje zhvałtavańnie. Pavodziny baćkoŭ, pavodle sudovaha abvinavačańnia, tłumačylisia ich žadańniem padniacca na palityčnaj leśvicy i atrymać peŭnyja vyhady. Baćka dziaŭčyny znachodzicca pad aryštam ź minułaha kastryčnika.

Kali vina Eva Maralesa budzie dakazanaja, jamu pahražaje turemny termin ad 10 da 15 hadoŭ, padkreśliła prakuratura Balivii. Sud taksama pastanaviŭ zamarozić usie finansavyja aktyvy Maralesa i zabaranić jamu pakidać krainu.

Sam Marales admaŭlajecca źjaŭlacca ŭ sudzie, nazyvajučy siabie achviaraj palityčnaha pieraśledu z boku ciapierašnich uładaŭ Balivii, «jakija chočuć pieraškodzić tamu viarnucca ŭ vialikuju palityku». Advakaty byłoha prezidenta śćviardžajuć, što jon nie moh prysutničać na sudzie z-za prablem sa zdaroŭjem, adnak sudździa adchiliŭ usie padadzienyja miedycynskija daviedki.

Tym časam tysiačy prychilnikaŭ Maralesa, jakija na praciahu apošnich miesiacaŭ błakavali darohi, paralizujučy ekanomiku, praciahvajuć akazvać supraciŭ sprobam jaho aryštu. Eks-prezident, pavodle miascovych miedyja, ciapier chavajecca ŭ adnym z rehijonaŭ krainy ŭ padachoŭnaj štab-kvatery prafsajuzaŭ vytvorcaŭ liściaŭ koki, jakija vykarystoŭvajucca ŭ stvareńni adnajmiennaha papularnaha narkotyka.

Nahadajem, što ŭ 2019 hodzie ŭ Balivii prajšli prezidenckija vybary. Miascovy CVK tady abviaściŭ, što Marales pieramoh u pieršym tury, adnak apazicyja nie pryznała vynikaŭ. Paśla troch tydniaŭ maštabnych pratestaŭ Marales, pazbaviŭšysia padtrymki vojska, uciok za miažu. Kiraŭnica CVK taksama sprabavała źbiehčy, ale była zatrymanaja pratestoŭcami.

Praz hod palityk viarnuŭsia na radzimu pad harantyi biaśpieki jahonaj byłoj partyi «Ruch da sacyjalizmu», jakaja zachavała ŭładu i šyrokuju padtrymku ŭ hramadstvie. Adnak byłyja adnapartyjcy faktyčna zabaranili Maralesu kali-niebudź viartacca da ŭłady, što dahetul pravakuje sutyknieńni pamiž prychilnikami abodvuch palityčnych łahieraŭ.

Eva Marales mieŭ ciopłyja adnosiny z Alaksandram Łukašenkam praź ich ahulnaha siabra i byłoha vieniesuelskaha kiraŭnika Uha Čaviesa, a taksama niekalki razoŭ naviedvaŭ Biełaruś, dzie vykazvaŭ zachapleńnie «sacyjalnymi pieraŭtvareńniami ŭ Biełarusi».

• 3
• 0
• 3
• 11
• 3
• 0
• 2
• 0