$700 miljonaŭ na zvałcy — ciapier kančatkova. Brytaniec nie zmoža vykapać sa śmiećcia svoj dysk ź bitkojnami

Džejms Chaŭełs z valijskaha horada Ńjupart śćviardžaje, što ŭ 2013 hodzie jaho dziaŭčyna vypadkova vykinuła dysk, na jakim zachoŭvałasia kala 7,5 tys. bitkojnaŭ. Pa ciapierašnim kursie hetaj kryptavaluty heta bolš za 700 młn dalaraŭ.

Jon patrabavaŭ ad miascovaj rady albo dazvolić jamu pravieści raskopki, albo vypłacić adpaviednuju sumu ŭ jakaści kampiensacyi. Adnak sudździa pastanaviŭ, što ŭ pazovu niama realnych jurydyčnych pierśpiektyŭ.

Pradstaŭniki ŭładaŭ Ńjuparta rastłumačyli, što zhodna z zakonam vykinuty dysk usio roŭna pierajšoŭ va ŭłasnaść uładalnikaŭ zvałki. Akramia taho, jak padkreślili ŭ meryi, praviadzieńnie raskopak u śmiećci supiarečyć ekałahičnym normam.

Chaŭełs abiacaŭ miascovaj radzie 10% ad sumy, atrymanaj ad prodažu bitkojnaŭ u vypadku ich pośpiechu, ale advakaty apanientaŭ nazvali heta prapanovu sprobaj prymusić čynoŭnikaŭ finansavać raskopki.

Na zvałcy, dzie znachodzicca dysk Chaŭełsa, usiaho bolš za 1,4 młn ton śmiećcia. Adnak valijec śćviardžaje, što zdoleŭ adnosna dakładna vyznačyć miescaznachodžańnie dysku: na hetym učastku znachodzicca tolki 100 tys. ton adkidaŭ.

«Hetaje rašeńnie pakinuła mianie ni z čym. Ciapier u mianie nie zastałosia ničoha», — zajaviŭ Chaŭełs paśla rašeńnia suda. «Ja staŭ čarhovaj achviaraj «vialikaj brytanskaj sistemy kryvasudździa».

«Nie treba ličyć mianie skvapnym, ja ž hatovy padzialicca prybytkami. Ale nichto ź ludziej z ułady, nie choča sa mnoj narmalna razmaŭlać», — skardzicca brytaniec.

Jon upeŭnieny, što ź vialikaj vierahodnaściu zdoleje adnavić infarmacyju z dysku, choć za hady, praviedzienyja na zvałcy, jaho korpus napeŭna iržavieŭ. Chaŭełs śćviardžaje, što byŭ adnym ź pieršych entuzijastaŭ bitkojna i ŭ 2009 hodzie «namajniŭ» značnuju sumu hetaj kryptavaluty.

Chaŭełs raspaviadaŭ žurnalistam, što kłavijaturu noŭtbuka, z dapamohaj jakoha jon zdabyvaŭ bitkojny, vypadkova zalili limanadam. Paśla hetaha jon vyniaŭ dysk, na jakim zachoŭvalisia klučy ad kryptavaluty.

Valijec taksama śćviardžaŭ, što na samoj spravie pamyłku zrabiła jaho tahačasnaja dziaŭčyna, jakaja fizična vyviezła dysk na zvałku. Jana, adnak, zapiarečyła, što Džejms sam paprasiŭ jaje vyvieźci nazapašanaje śmiećcie, što jana i zrabiła.

Chaŭełs nieadnarazova prasiŭ haradskuju radu Ńjuparta dazvolić jamu pravieści raskopki, kab znajści niaščasny dysk, ale pastajanna atrymlivaŭ admovu.

U 2023 hodzie jon vyrašyŭ padać u sud na haradskuju radu — hetaja sproba i skončyłasia dla Chaŭełsa kančatkovaj niaŭdačaj.

• 0
• 1
• 9
• 7
• 2
• 6
• 0
• 0