Navumčyk pra rezkija zajavy Paźniaka: Jaho nie cikavić imidž, jon kaža toje, što nie havorać inšyja
Niadaŭna palityk Zianon Paźniak asudžalna vykazaŭsia na adras Maryi Kaleśnikavaj. Jon nazvaŭ palitźniavolenuju «štučna i z palityčnym uchiłam razdźmutaj asobaj» i paŭtaryŭ svoj raniejšy tezis, što štab Viktara Babaryki skarystała Maskva. Jaho paplečnik, publicyst i były deputat Viarchoŭnaha Savieta Siarhiej Navumčyk u razmovie z «Radyjo Svaboda» prakamientavaŭ hetyja zajavy.
Navumčyk kaža, što za 30 hadoŭ nie staŭ by stavić pad sumnieŭ tezisy Paźniaka, jakija vyklikajuć niepryniaćcie. «Potym čas pakazaŭ, što jon mieŭ racyju», — adznačaje jon.
Navumčyk zhadvaje, jak adnojčy napisaŭ Paźniaku, što jaho rezkaja forma moža adšturchoŭvać ludziej. Maŭlaŭ, vy kažacie praŭdu, i kali-niebudź z hetym pahodziacca, ale ciapier heta škodzić vašamu imidžu.
«Jon adkazaŭ (nie dasłoŭna, ale blizka da tekstu): «Siarhiej, mianie zusim nie cikavić moj imidž. Jość rečy, jakija, ja liču, treba skazać. Kali inšyja ich nie havorać, ich kažu ja». Chrestamatyjnym prykładam byŭ artykuł ab ruskim impieryjaliźmie i jaho niebiaśpiecy».
«Mnie zdajecca, tut jašče tyja pryčyny, što padziei 2020 hoda naležnym čynam nie praanalizavanyja, — praciahvaje Navumčyk. — Pieraškadžaje i toje, što mnohija ich aktyŭnyja ŭdzielniki za kratami. Jasna, što treba ich vyzvalać. Miž inšym, i sam Paźniak pra heta piša».
Były deputat Viarchoŭnaha Savieta taksama krytykuje lidaraŭ 2020-ha.
«Što adbyłosia tady: źjaŭlajucca ludzi, absalutna biez usiakaj palityčnaj bijahrafii, biez palityčnaj daśviedčanaści i albo vyłučajucca kandydatami ŭ prezidenty, albo ŭznačalvajuć ich štaby. Mała taho, tym, chto prapanuje im pasłuhi, jany prosta kažuć: pajšoŭ von, my zaraz pakažam, jak treba źmianiać uładu. Mianie viedajecie što ŭraziła? Znoŭ ža nie budu nazyvać proźvišča, chacia hety čałaviek nie za kratami, dziakuj bohu. Jon kazaŭ: my kali pabačyli paśla vybaraŭ dziasiatki ci sotni tysiač ludziej na vulicach mienskich, my ašaleli, my razhubilisia, my nie viedali, što nam rabić».
Navumčyk dadaje, što niekalki byłych deputataŭ Viarchoŭnaha Savieta ad BNF prapanoŭvali svaje pasłuhi ŭ 2020-m, ale ich nie stali słuchać. Jon ličyć, što dastatkova było adnaho čałavieka, jaki moh by istotna paŭpłyvać na situacyju, — Siarhieja Antončyka, byłoha deputata Viarchoŭnaha Savieta, adnaho ź lidaraŭ rabočaha ruchu.
Kali b za niekalki miesiacaŭ padrychtavali strajkamy na 10-15 biudžetaŭtvaralnych pradpryjemstvach, situacyja była b zusim inšaja, pierakanany Navumčyk.
«Była b situacyja ekanamičnaha kałapsu, i toj ža samy Pucin pazvaniŭ by i skazaŭ: «Alaksandr Ryhoravič, davaj užo».
Toje, što nie byŭ praviedzieny razbor palotaŭ, i paradžaje takija rezkija acenki, jak daje Paźniak, padsumoŭvaje Siarhiej Navumčyk.
Paźniak: Kaleśnikava — štučna razdźmutaja asoba, jakaja adznačyłasia infantylnymi pavodzinami i niedalokimi kazańniami
Zianon Paźniak raskazaŭ, čym zajmaŭsia 10 dzion va Ukrainie
Paźniak prapanavaŭ stvaryć anałah «Biełsata» — ukrainski telekanał ź viaščańniem na Biełaruś
Zianon Paźniak: Chto moža zamianić Łukašenku? Realna — nichto
Paźniak: Kaleśnikava — poŭnaje palityčnaje ništo
Kamientary