Novy hiensak NATA vystupiŭ za prava Ukrainy nanosić dalnabojnyja ŭdary pa Rasii
Były premjer-ministr Niderłandaŭ Mark Rute na druhi dzień paśla svajho ŭstupleńnia na pasadu hienieralnaha sakratara NATA adpraviŭsia ŭ Kijeŭ i zajaviŭ, što Ukraina pavinna mieć mahčymaść abstrelvać rasijskuju terytoryju dalnabojnymi zachodnimi rakietami.
«Ukraina, biezumoŭna, maje prava na samaabaronu, i mižnarodnaje prava tut na jaje baku», — zajaviŭ novy kiraŭnik Paŭnočnaatłantyčnaha aljansu, vystupajučy na pres-kanfierencyi razam z prezidentam Ukrainy Uładzimiram Zialenskim.
Pry hetym prava Ukrainy na samaabaronu, pa słovach Rute, «nie zakančvajecca na miažy»: Rasija viadzie niezakonnuju vajnu, i heta aznačaje, što naniasieńnie ŭdaraŭ pa rasijskich źniščalnikach i rakietach da taho, jak jany mohuć być vykarystanyja suprać hramadzianskaj infrastruktury Ukrainy, moža dapamahčy vyratavać žyćci ludziej.
Zialenski skazaŭ, što vykłaŭ Rute elemienty svajho «płana Pieramohi», jaki jon niadaŭna padaŭ prezidentu ZŠA Džo Bajdenu i abmiarkoŭvaŭ ź lidarami inšych krain padčas vizitu ŭ Złučanyja Štaty. Hałoŭnaje pałažeńnie hetaha płana — dać Ukrainie bolš sučasnaj zbroi.
U Kijevie Zialenski ŭ čarhovy raz zaklikaŭ dapamahčy Ukrainie nie tolki ŭ abaronie, ale i ŭ nastupleńni, źniaŭšy zabaronu na prymianieńnie dalnabojnych rakiet, takich jak ATACMS i Storm Shadow.
«Viadoma, my chočam, kab Ukraina nie była zabytaja. Ale najlepšy sposab nie zabycca pra Ukrainu — dać adpaviednuju zbroju i nieabchodnyja dazvoły. I dapamahčy źbivać… tyja ž iranskija rakiety abo bieśpiłotniki; jak jany źbivajucca nad Izrailem — kab sapraŭdy hetak ža sama ich źbivali i nad Ukrainaj», — skazaŭ Zialenski, majučy na ŭvazie dapamohu zachodnich krain u adbićci iranskich udaraŭ rakietami pa Izrailu.
Niahledziačy na niekalki tydniaŭ abmierkavańnia temy dalnabojnych rakiet, Džo Bajden pakul nie daŭ zhody na ich prymianieńnie dla ŭdaraŭ uhłyb Rasii, lidary jakoj znoŭ stali pahražać prymianieńniem jadziernaj zbroi ŭ vypadku pierasiačeńnia čarhovych čyrvonych linij.
Ale Mark Rute ŭ Kijevie zajaviŭ:
«Adzinaja kraina tut, jakaja pierasiekła čyrvonuju liniju, — heta nie Ukraina, heta Rasija».
Ciapier čytajuć
Šakujučaja strata hoda, tajamničyja źniknieńni, dykpiki i departacyi — asnoŭnyja ludzi i padziei 2025 hoda3
Kamientary