U minskim muziei pravodziać ramantyčnyja spatkańni. Na ich sapraŭdny ažyjataž — da śniežnia niama miescaŭ
Zładzić ramantyčnaje spatkańnie ŭ Minsku možna nie tolki ŭ restaranie ci kaviarni, ale i ŭ samym sapraŭdnym muziei. Naprykład, u muziei Pietrusia Broŭki. Onlíner daviedaŭsia, kolki kaštuje pravieści ramantyk u kvatery z historyjaj i ci jość popyt na taki niezvyčajny varyjant.
Litaraturny muziej Pietrusia Broŭki znachodzicca ŭ domie Śviancyckaha na vulicy Karła Marksa, 30. Jaho pabudavali bolš za stahodździe tamu. U roznyja časy ŭ hetaj čatyrochpaviarchoŭcy žyli viadomyja palityčnyja dziejačy BSSR Mikałaj Haładzied, Pancielajmon Panamarenka, Alaksandr Čarviakoŭ, piśmieńnik Ciška Hartny. Narodny paet Piatruś Broŭka pasialiŭsia tut u 1951-m i pražyŭ 29 hadoŭ. Paśla jahonaj śmierci ŭ kvatery tvorcy adčynili muziej. Heta, darečy, adziny muziej-kvatera ŭ Minsku.
— Upieršyniu farmat [spatkańniaŭ] źjaviŭsia ŭ 2017 hodzie. I nie jak pasłuha, a jak akcyja, prymierkavanaja da 14 lutaha. My pravodzili konkursy ŭ sacyjalnych sietkach: pary vykładvali svaje ramantyčnyja fotazdymki ź vieršami Broŭki, my abirali pieramožcu — taho, chto mieŭ mahčymaść pravieści viečar usich zakachanych z harbataj va ŭtulnym pakojčyku ź vidam na praśpiekt u našym muziei. Ale popyt staŭ vielmi vialikim, i my hady dva tamu vyrašyli zrabić padobny farmat aficyjnaj pasłuhaj, kab čałaviek u luby momant moh jaje zamović, — raskazvajuć u muziei.
Jak usio adbyvajecca? Muziej pracuje da 19:00. Paśla, kali na viečar jość adpaviedny zapis, prychodzić para. Dla naviednikaŭ pravodziać nievialičkuju ramantyčnuju ekskursiju, padčas jakoj raspaviadajuć pra asabistaje i siamiejnaje žyćcio Pietrusia Broŭki i jahonaj žonki Nadziei, pakazvajuć dadatkovyja ekspanaty z fondaŭ muzieja nakštałt kaśmietyki i ŭpryhažeńniaŭ, što naležali žoncy piśmieńnika.
Paśla haściej pravodziać u dalni pakoj — z francuzskimi voknami i vidam na praśpiekt — i častujuć harbataj. Pry žadańni možna zamović ci prynieści z saboj desierty. Užyvać ałkahol tut zabaroniena, tamu ad vina i šampanskaha pryjdziecca admovicca. Pravodzić čas u farmacie spatkańnia ŭ muziei možna da 23:00. Uvieś hety čas u muziei znachodzicca supracoŭnik, da jakoha ŭ luby momant možna źviarnucca pa dapamohu: paprasić pled ci zadać pytańnie.
Kaštuje ramantyčnaje spatkańnie 60 rubloŭ.
Jak paviedamili ŭ muziei, padobnyja sustrečy karystajucca popytam i da kanca vosieni amal usie viečary zaniatyja.
— Spatkańnie zamaŭlajuć davoli časta, ale, jak vy razumiejecie, intares idzie chvalami. Prychodzić błohier, zapisvaje rolik — i popyt pavialičvajecca. Naprykład, ciapier usio raśpisana ŭžo da śniežnia, i tak užo nie ŭ pieršy raz. Adnak potym moža być spad, — raspaviadajuć u muziei.
Chto zamaŭlaje spatkańni? Heta ludzi roznaha ŭzrostu i intaresaŭ. U muziei pryhadvajuć, jak adnojčy na spatkańnie pryjšli ludzi stałaha vieku, i z boku heta vyhladała davoli miła.
— Časam prychodziać sapraŭdy apantanyja i zacikaŭlenyja našaj kulturaj ludzi, a časam byvajuć tyja, chto prosta žadaje cikava pravieści čas. Kali čałaviek kaža, što niašmat viedaje pra Pietrusia Broŭku ci biełaruskuju litaraturu, my ž jakraz dziela hetaha i pravodzim ekskursiju. I zvyčajna ludzi vielmi zadavolenyja viedami, jakija atrymlivajuć.
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia7
Kamientary