Na Hrodzienščynie dźvie staryja vodanapornyja viežy prystasujuć pad chosteł i bar

Užo źjavilisia eskizy budučaha chosteła ŭ Mastach. Ilustracyi publikuje telehram-kanał «Biełorusskaja hłubinka». Zhodna ź imi, paśla restaŭracyi ŭ viežy źjaviacca novyja vokny. Unutry budynak padzielać na pavierchi i pamiaškańni, u jakich praduhledziać numary dla pastajalcaŭ. U kožnym numary budzie ŭłasny sanvuzieł. Da budynka prybudujuć zakrytuju leśvicu ŭ takim ža cahlanym pramysłovym styli, jak i ŭvieś budynak.

Pavialičyć

Prajekt chosteła ŭ mastoŭskaj viežy. Fota: t.me/glubinka_by

Eskiz numaroŭ u chostele. Fota: t.me/glubinka_by

Staruju vodanapornuju viežu ŭ Navahrudku buduć restaŭravać ułaśniki hatela «Jeŭropa». Jany płanujuć pieratvaryć jaje ŭ bar. Pra heta na svajoj instahram-staroncy paviedamiŭ błohier Dzianis Blišč. Vintavaja leśvica ŭ viežy viadzie na samy vierch, a praz akno vidać «ekskluziŭnyja krajavidy horada», dadaje błohier.

Pavialičyć

Navahrudskaja vieža ŭsiaredzinie. Fota: instagram.com/blisch

Vieža ŭ Navahrudku zvonku. Fota: instagram.com/blisch

U instahramie hatela «Jeŭropa» ŭ apisańni možna pračytać karotkuju infarmacyju:

«My — siamja Potkinych. Šukajem inviestaraŭ. Restaŭrujem hatel «Jeŭropa» 1900 hoda. Budujem padziemny muziej. Restaŭrujem vodanapornuju viežu».

Ułady płanavali stvaryć u navahrudskaj viežy muziej vady

U 2013 hodzie ŭ navahrudskaj viežy płanavali adkryć ahladnuju placoŭku. Paśla ad hetaj idei admovilisia i vyrašyli stvaryć interaktyŭny muziej vady. «Navahrudskija ŭłady z entuzijazmam padtrymali ideju stvareńnia takoj ustanovy», — paviedamlali dziaržaŭnyja miedyi.

Navat sabrali śpiecyjalnuju kamisiju, jakaja pavinna była daśledavać techničny stan budynka — ale muziej u viežy tak i nie źjaviŭsia.

Jakija prajekty z vodanapornymi viežami (nie) realizavali ŭ Hrodnie

Staradaŭniuju vodanapornuju viežu ŭ lesaparku Rumlova chacieli vykarystać dla biznesu. Pavodle płanaŭ pryvatnaha inviestara, na viežy mieła źjavicca naziralnaja placoŭka i nievialiki ofis. Ale prapanova padvieści da viežy inžyniernyja kamunikacyi vyklikała ŭ miascovych ekołahaŭ abureńnie. Ideja nie adpaviadała statusu pomnika pryrody, jaki maje park — u vyniku prajekt zakryli.

U byłych hrodzienskich vadanapornych viežach «Kasia» i «Basia» z 1987 hoda znachodziacca mastackija majsterni. Heta adna z turystyčnych admietnaściaŭ horada. Praŭda, nie abychodzicca biez prablem: u 2022 hodzie mastakam raptoŭna vystavili rachunak za karystańnie ziamloj — 22 tysiač rubloŭ za šeść hadoŭ. Tady tvorcam daviałosia šukać sponsara, kab zapłacić pazyku.

• 2
• 0
• 0
• 0
• 0
• 0
• 0
• 1