Amierykanskija žurnalisty pabyvali va ŭkrainskaj turmie, nabitaj maładymi rasijskimi pryzyŭnikami

Načalnik turmy, jaki havaryŭ z žurnalistami na ŭmovach ananimnaści, kab harantavać, što jaje miesca znachodžańnia nie budzie raskrytaje, skazaŭ, što za apošnija 10 dzion praz ustanovu prajšli 320 rasijskich pałonnych, a dalej ich nakiroŭvajuć u inšyja miescy ŭtrymańnia — tak zvanyja papraŭča-pracoŭnyja łahiery va Ukrainie.

Jon taksama dadaŭ, što ź liku tych 320 pałonnych tolki kala 20% nazvali siabie kantraktnikami abo inšym čynam mabilizavanymi sałdatami. Z hetaha vynikaje, što pryblizna 250 pałonnych byli pryzyŭnikami terminovaj słužby.

«Mnohija ź ich — vielmi maładyja: pryzyŭniki, jakija adbyvali abaviazkovuju hadavuju vajskovuju słužbu, jakija pa idei nikoli nie pavinny byli ŭdzielničać u bajach. Niekatoryja ź ich atrymali ranieńni, bolšaść tolki niadaŭna stali darosłymi. U futbołkach i šlopancach, na žaleznych dvuchjarusnych łožkach. U adnoj z kamier pa televizary krucili «Harfiłda», — pišuć žurnalisty.

U liku apytanych pałonnych byli jak sałdaty z bujnych haradoŭ, jak, naprykład, Sankt-Pieciarburha, tak i ź nievialikich nasielenych punktaŭ, naprykład, z maleńkaj vioski ŭ Pienzienskaj vobłaści.

Jak adznačaje vydańnie, zachop takoj vialikaj kolkaści sałdat terminovaj słužby padčas ukrainskaha ŭvarvańnia na terytoryju Rasii składaje surjoznuju prablemu dla Kramla. A taksama robicca peŭnym testavym vyklikam dla Ukrainy:

«Jak taja budzie abychodzicca z takoj vialikaj kolkaściu rasijskich vajennapałonnych, jakija mohuć razhladacca jak asabliva kaštoŭnyja raźmiennyja maniety ŭ budučych pieramovach abo abmienach».

The Washington Post nahadvaje zachodniaj aŭdytoryi, jak Pucin «paabiacaŭ zaniepakojenym maci, što pryzyŭniki nie buduć udzielničać ni ŭ jakich bajavych dziejańniach». I što amal strymaŭ abiacańnie.

«My nie chacieli vajavać ni ŭ jakim razie. Nam abiacali, što my naohuł nie budziem udzielničać u bajavych dziejańniach. Ale niešta pajšło nie tak», — raskazaŭ žurnalistam 22-hadovy Mikałaj z Čalabinska. Na pytańnie, chto heta abiacaŭ, jon adkazaŭ: «Uładzimir Pucin».

Vydańnie śćviardžaje, što ŭkrainskija turemnyja achoŭniki «prysutničali ŭ kamierach padčas intervju, ale nie sačyli za razmovami, nie ŭstaŭlali zaŭvah i nie prahladali materyjału pierad publikacyjaj».

«Pieravažnaja bolšaść pałonnych naohuł nie paciarpieli. Niekalki paranienych sałdat, apytanych WP, raskazali, jak jany atrymali ranieńni ŭ bai da pałonu, uklučajučy adnaho, jaki skazaŭ, što paraniŭ siabie ŭłasnaj hranataj u nadziei pamierci i nie trapić u pałon. Ukrainskija sałdaty akazali jamu pieršuju dapamohu, skazaŭ jon, a paśla evakujavali ŭ kliniku, dzie jamu zrabili renthien i zrabili apieracyju pa vydaleńni askiepkaŭ z ran», — paviedamlajecca ŭ materyjale.

Rasijskija sałdaty zajaŭlajuć, što ź imi abychodziacca dobra i akazvajuć miedycynskuju dapamohu:

«Ich binty vyhladali čystymi. Ź ich słoŭ, u turmie trochrazovaje charčavańnie, uklučajučy sup, sałatu i kašu. Pałonnyja kažuć, što im dazvalajuć prymać duš i nie kryŭdziać».

• 32
• 1
• 7
• 2
• 0
• 1
• 2
• 1