Vierym u Zmušku! Chto taja płyŭčycha, jakaja siońnia moža prynieści miedal Biełarusi
Płyŭčycha Alina Zmuška siońnia ŭ 22:25 zmahajecca za alimpijski miedal — dziaŭčyna vyjšła ŭ finał spabornictvaŭ pa brasie na 100 mietrach. Raskazvajem pra adnu ź niešmatlikich biełaruskich nadziej u Paryžy.
Alinie 27 hadoŭ, jana rodam z Kalinkavičaŭ. Bras dla jaje — bolš, čym rodny styl: brasam płavała jaje maci, dy i sama dziaŭčyna pierajšła na jaho jašče ŭ dziacinstvie. Starejšaja siastra Aliny taksama ŭ svoj čas pajšła ŭ płavańnie.
«Moj lubimy bras ličycca vidam asablivym. My płyvučyja jak žaby, takija ž ślizkija i hnutkija, jak jany», — apisvaje Alina svoj styl.
Bolšaść svaich miedaloŭ Alina ŭziała na stamiatroŭcy brasam — jakraz taja dystancyja, na jakuju jana vyjdzie siońnia ŭviečary: Zmuška šmatrazovaja čempijonka krainy, bronzavaja pryziorka etapaŭ Kubku śvietu. Biełaruska vystupała i na minułaj letniaj Alimpijadzie ŭ Tokia, ale nie prabiłasia dalej za papiarednija zapłyvy: na stamiatroŭcy jana stała 21-j, na 200 mietrach — ažno 26-j. A voś ciapier jana prajšła ŭ alimpijski finał, dy jašče z asabistym i nacyjanalnym rekordami.
Sioletnija biełaruskija alimpijcy prachodzili pravierku na niejtralnaść u dačynieńni da padtrymki napadu na Ukrainu. Alina jaje prajšła, ale ž z hetym nie pahadzilisia pravaabarončyja arhanizacyi Global Rights Compliance. U dziaŭčyny znajšli łajk, pastaŭleny pad dopisam rasijskaj aktrysy Hanny Chilkievič. U sakaviku 2022-ha Chilkievič pisała, što «nastaje novy čas», i heta «čas siły i novych mahčymaściaŭ», kali «našamu prezidentu [Uładzimiru Pucinu] asabliva patrebnaja padtrymka».
Alina maje dypłom spartyŭnaha psichołaha: chaciełasia papracavać sa svaim psichałahičnym stanam, dy zaadno vyrašyła atrymać adpaviednuju adukacyju. Vučycca daviałosia na dzionnym adździaleńni, bo zavočki na toj śpiecyjalnaści niama. A paralelna Alina jašče i pracavała, i adpracoŭvała na sabie psichałahičnyja mietodyki.
Heta ŭpeŭnienaja ŭ siabie dziaŭčyna — voś jak jana razvažaje pra svaju źniešnaść:
«U płyŭčych cudoŭnaja fihura. Ja ŭ hetym upeŭnienaja, a jak ličać inšyja, mnie niecikava. U mianie pryhožyja nohi, pryhožyja plečy. Tak, jany trochi šyrejšyja, čym u inšych dziaŭčat, ale heta nie prablema. Maje plečy nie pieraškodzili mnie vybrać idealnuju viasielnuju sukienku, nie pieraškadžajuć vybirać pryhožaje adzieńnie».
U 2023-m Alina vyjšła zamuž. Raskazvaje, što paśla rośpisu, z makijažam i ŭ pryhožaj sukiency, pajechała treniravacca ŭ basiejn. Atrymałasia praduktyŭna — dapamahła ejfaryja ad ščaślivaha dnia.
Abrańnik Aliny — biełaruski płyviec Rusłan Skamaroška. Chłopiec, u adroźnieńnie ad žonki, nie moža pachvalicca vysokimi mižnarodnymi vynikami. Miarkujučy pa jaho instahramie, niekalki hadoŭ tamu Rusłan ekśpierymientavaŭ z anłajn-inviestycyjami, ale ŭ apošni čas jon publikuje zdymki na temu płavańnia i foty z Alinaj.
«Naša Niva» — bastyjon biełaruščyny
PADTRYMAĆCiapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary