Probašču Čyrvonaha kaścioła Uładzisłavu Zavalniuku spoŭniłasia 75 hadoŭ
A ŭ mai adzin z najstarejšych śviataroŭ Minska-Mahiloŭskaj archidyjacezii adznačaŭ 50-hodździe śviatarstva.
Na žal, apošnija amal dva hady Čyrvony kaścioł začynieny ŭ vyniku zahadkavaha pažaru, što adbyŭsia 26 vieraśnia 2022 hoda.
Budučy śviatar naradziŭsia 8 lipienia 1949 hoda va Ukrainie, na Vińniččynie, u siale Słabada-Muraŭskaja, što paśla źjadnańnia z susiednim siałom atrymała nazvu Klakotyna.
Paśla zakančeńnia siaredniaj škoły pajechaŭ u dalokuju Ryhu z namieram pastupić tam u katalickuju sieminaryju. Adrazu pastupić u sieminaryju nie atrymałasia, i małady čałaviek zastaŭsia ŭ Ryzie, pracujučy tam budaŭnikom, nahadvaje bijahrafiju catholic.by.
Na šlachu da śviatarstva jamu daviałosia pieraadoleć nie adnu pieraškodu, ale razam ź im zaŭsiody była matula, jakaja padtrymlivała syna na šlachu paklikańnia.
U 1969 hodzie Uładzisłaŭ Zavalniuk narešcie byŭ pryniaty ŭ duchoŭnuju sieminaryju ŭ Ryzie — adnu ź dźviuch katalickich sieminaryj, jakija na toj čas dziejničali ŭ Savieckim Sajuzie, — paśla zakančeńnia jakoj staŭ śviatarom. Paśviačeńnie 26 maja 1974 hoda jamu ŭdzialiŭ kardynał Julijan Vajvads.
Dušpastarskuju dziejnaść ksiondz Uładzisłaŭ raspačaŭ na pasadzie probašča hreka-katalickaj kaplicy na armianskich mohiłkach u Kišyniovie.
Znachodziačysia ŭ Małdovie, absłuhoŭvaŭ kala 70-i parafij, pieraśledavaŭsia savieckimi ŭładami.
Na pačatku 1979 hoda viarnuŭsia ŭ Łatviju, dzie vykonvaŭ śviatarskija abaviazki ŭ horadzie Vałmijera. Viasnoju 1979 vyjechaŭ u Kazachstan.
Z 1980 hoda znoŭ nios śviatarskaje słužeńnie ŭ Łatvii. Słužyŭ vikaryjem u łathalskim miastečku Varaklany. Byŭ abmiežavany savieckimi administracyjnymi ŭładami ŭ vykanańni śviatarskich abaviazkaŭ: mieŭ prava tolki spaviadać i adpraŭlać imšu.
U listapadzie—śniežni 1980 hoda byŭ prymusova źmieščany ŭ psichijatryčny špital u horadzie Daŭhaŭpiłs.
Z 1984 hoda i da siońnia žyćcio ksiandza Uładzisłava Zavalniuka nieparyŭna źviazana ź Biełaruśsiu.
Napačatku słužyŭ u Hłybokim. Paśla 1988 hoda adnačasova nios śviatarskaje słužeńnie ŭ jakaści vikaryja ŭ kaściole na Kalvaryjskich mohiłkach — adzinaj na toj čas katalickaj śviatyni ŭ Minsku.
Z 1989 hoda razam ź viernikami zmahaŭsia za viartańnie biełaruskich katalickich śviatyń u Minsku: kaścioła śviatoha Symona i śviatoj Aleny, katedralnaha kaścioła Najśviaciejšaha Imia Maryi, kaścioła Najśviaciejšaj Trojcy (śviatoha Rocha) na Załatoj Horcy.
Adnaviŭ i raspačaŭ dziejnaść katalickich parafij u Karališčavičach, Červieni, Smalavičach, Raŭbičach i inšych miaścinach.
Z 1990 hoda niaźmienny probašč Čyrvonaha kaścioła, jaki byŭ začynieny ŭ vieraśni 2022 hoda paśla dziŭnaha pažara.
Z pačatku 1990-ch hadoŭ paśladoŭna pašyraŭ užyvańnie biełaruskaj movy ŭ Katalickim Kaściole na Biełarusi. Zavočna praciahvaŭ navučańnie ŭ Katalickaj teałahičnaj akademii ŭ Varšavie. Skončyŭ vyšejšyja mahistarskija kursy pa teałohii (1993).
Z 1991 viadzie šyrokuju knihavydavieckuju dziejnaść, vydaŭ niekalki knih, u tym liku adzin z aŭtaraŭ navukova-papularnaj knihi «Kanfiesii na Biełarusi (kaniec XVIII — XX st.)» (1998).
Ajciec Uładzisłaŭ pryčyniŭsia da raźvićcia kultu Maci Božaj Budsłaŭskaj u ahulnabiełaruskim maštabie, spryjaŭ stvareńniu ŭ Budsłavie Nacyjanalnaha sanktuaryja.
Šmat u čym dziakujučy mienavita jaho namahańniam mižuradavym Kamitetam pa zachavańni niemateryjalnaj kulturnaj spadčyny JUNIESKA ŭ listapadzie 2018 hoda Budsłaŭski fest byŭ uklučany ŭ Reprezientacyjny śpis niemateryjalnaj kulturnaj spadčyny čałaviectva.
Za vialikija zasłuhi pierad Kaściołam Papa Francišak pryznačyŭ ksiandza kanonika Uładzisłava Zavalniuka Kapiełanam Jaho Śviataści, abo papskim prełatam.
Štohod ksiondz kanonik Uładzisłaŭ Zavalniuk sam jak zvyčajny pilihrym pieški idzie ŭ Budsłaŭ razam z pakutnaj pilihrymkaj u maŭčańni, na chlebie i vadzie.
Taksama jon viadomy jak viadomy pčalar, što mieŭ pasieku na dachu kaścioła.
Ciapier čytajuć
«Ja nie chaču adpuskać žyćcio». U piśmieńnicy Śviatłany Kurs rak na poźniaj stadyi5
Kamientary