Łukašenka znajšoŭ pryčynu, čamu zachodnija palityki apałčylisia na Biełaruś. Jana nastolki ž niečakanaja, jak i absurdnaja
Akazvajecca, vinoj usiamu ich «biaździetnaść».
Jak pieradajuć dziaržaŭnyja ŚMI, Łukašenka «nazvaŭ Vialikuju Ajčynnuju vajnu apafieozam tysiačahadovaj historyi vojnaŭ i bitvaŭ zachodniaj i ŭschodniaj cyvilizacyj».
«My ŭ hetaj historyi ŭžo pastavili kropku adzin raz. Treba budzie — pastavim i druhi. Choć jany i biez nas spraviacca.
Admova ad tradycyjnych kaštoŭnaściaŭ, moda na čajłdfry zrabili svaju spravu. Pahladzicie, chto staić u avanhardzie antybiełaruskaj, antyruskaj kampanij. Biaździetnyja palityki. Ich rod zakančvajecca. Im navat hien nianaviści niama kamu pieradać. Zasłona», — zajaviŭ Łukašenka.
Pa svajoj zvyčcy, jon supraćpastaviŭ zachodnim palitykam ich narody, ličačy, što «z tymi, chto žyvie dziela budučyni svaich dziaciej i ŭnukaŭ, my zaŭsiody znojdziem ahulnuju movu i damovimsia». Choć, u adroźnieńnie ad Łukašenki, raskrytykavanyja im palityki nie ŭzurpavali ŭładu, a abranyja tymi samymi narodami na svabodnych vybarach.
Uvohule ž łukašenkaŭskaj Biełarusi niama čym chvalicca ŭ śfiery naradžalnaści, jana ciapier nižejšaja, čym u vajennyja časy.
Zusim niadaŭna kiraŭnica Centra čałaviečaha raźvićcia i demahrafii Instytuta ekanomiki NANB Nastaśsia Babrova adznačała ŭ intervju dziaržaŭnamu ahienctvu «Minsk-Naviny»:
«Tak, u nas vialikaja padtrymka šmatdzietnych. Adnak da źjaŭleńnia treciaha dziciaci treba naradzić pieršaje i druhoje. A mienavita pieršyja źjaŭlajucca ź ciažkaściu. Paśla ich z-za prablem sa zdaroŭjem baćkoŭ daloka nie zaŭsiody naradžajucca druhija».
Što da zachodnich palitykaŭ, to siarod ich traplajucca roznyja. Kali, naprykład, u prezidenta Francyi Emanuela Makrona ci fiederalnaha kanclera Hiermanii Ołafa Šolca sapraŭdy niama dziaciej (ale ŭ žonki Makrona jość dzieci ad papiaredniaha šluba), to, naprykład, kiraŭnica Jeŭrakamisii Ursuła fon der Lajen — maci siami dziaciej (dvuch synoŭ i piaci dačok).
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ16
Kamientary