Ad 8 da 11 hadoŭ. U Homieli za «zdradu dziaržavie» vynieśli prysud siamji
Praces prachodziŭ u zakrytym režymie z 20 maja, spravu razhladaŭ Homielski abłasny sud, piša «Radyjo Svaboda».
Jak stała viadoma «Svabodzie», adzin z abvinavačanych, Vasil Procharaŭ, atrymaŭ 11 hadoŭ kałonii. Jahonaja žonka Łarysa i syn Pavał atrymali pa 8 hadoŭ źniavoleńnia. Jašče adzin fihurant spravy, nastaŭnik biełaruskaj movy Rusłan Pracharenka atrymaŭ 10 hadoŭ kałonii. Pra los piataha fihuranta spravy, Fiodara Aksionienka, ničoha nie viadoma.
Udzielniki zakrytaha pracesu majuć padpiski ab nierazhałošvańni. Ź nieaficyjnaj krynicy Svabodzie viadoma, što kryminalnaja sprava tyčycca fatahrafavańnia roznych abjektaŭ na terytoryi Biełarusi, a za fihurantami spravy niejki čas pierad aryštam sačyli śpiecsłužby.
Hrupu abvinavačvali pavodle artykułaŭ «zdrada dziaržavie» (č. 1 art. 356 KK), «raspalvańni varožaści» (č. 1 art. 130 KK) «sadziejničańnie ekstremisckaj dziejnaści» (č. 1 art. 361-4 KK) i «niedaniasieńnie pra złačynstva» (č. 1 art. 406 KK).
Siamja Procharavych doŭhi čas žyła ŭ vioscy Hrabaŭka Homielskaha rajonu. Na momant zatrymańnia jany žyli ŭ vioscy Uza Homielskaha rajonu, kudy pierajechali dva hady tamu.
Starejšy Procharaŭ, Vasil Vasilevič, etničny ŭkrainiec 1969 hoda naradžeńnia, były desantnik. Jon naradziŭsia ŭ Čarnobyli (Kijeŭskaja vobłaść). Vasil Procharaŭ časta jeździŭ ź Biełarusi va Ukrainu. U 2021 hodzie na jaho nie było pačatych kryminalnych spraŭ. Pracavaŭ u asnoŭnym u śfiery budaŭnictva, prarabam i majstram.
Aproč pracy, Vasil mieŭ svoj błoh na YouTube. Tam jon dzialiŭsia z padpisčykami videa pra vioski i pasiołki Homielskaj vobłaści, u tym liku čarnobylskaj zony. Častka videa pryśviečana śviatkavańniu Dnia desantnika ŭ roznyja hady.
Žonka Vasila Łarysa Procharava — biełaruska 1975 hodu naradžeńnia. Pachodzić z Hrabaŭki Homielskaha rajonu, žyła tam doŭhi čas. Raniej pracavała sanitarkaj u adnoj z homielskich lakarniaŭ.
Syn Procharavych Pavał naradziŭsia ŭ 1996 hodzie. Z 2007-ha pa 2019 hod siem razoŭ byŭ za miažoj — va Ukrainie i Polščy. Jon skončyŭ Biełaruski dziaržaŭny ŭniviersitet transpartu, pracavaŭ u budaŭničym treście. U śniežni 2023 hodu paviedamlałasia, što była zatrymanaja i dačka Procharavych Anastasija, ale jaje niama siarod abvinavačanych.
Rusłan Pracharenka pracavaŭ nastaŭnikam biełaruskaj movy i litaratury ŭ Naroŭli. Tudy jon trapiŭ pa raźmierkavańni, kali skončyŭ Homielski dziaržaŭny ŭniviersitet imia Franciška Skaryny. Chłopcu 24 hady. Svaje sacyjalnyja sietki jon vioŭ na biełaruskaj movie, časam vykazvaŭsia na palityčnyja temy i rabiŭ pieraposty z tak zvanych «ekstremisckich» kanałaŭ. Taksama pisaŭ pra toje, čamu varta razmaŭlać pa-biełarusku.
Fiodar Aksionienka naradziŭsia ŭ 1978 hodzie Łuninieckim rajonie, vučyŭsia ŭ techničnym univiersitecie ŭ Homli, tam ža zastaŭsia žyć i pracavać. Jon maje bahatuju bijahrafiju — pracavaŭ kiroŭcam, budaŭnikom, dyrektaram roznych kamiercyjnych firmaŭ. Nie mienš za 17 razoŭ pryciahvaŭsia da administracyjnaj adkaznaści pa linii DAI. U 2001 hodzie jaho sudzili pavodle kryminalnaha artykuła 339 za chulihanstva.
Sankcyi artykuła «zdrada dziaržavie» — ad 7 da 15 hadoŭ pazbaŭleńnia voli. Na luty 2024 hodu pravaabaroncy «Viasny» naličyli minimum 55 čałaviek, jakija stali «zdradnikami dziaržavy» pa viersii śledstva i suda.
Kamientary