Bajniet za horła voźmuć miakka

Rozhałas ŭsio ž daŭ plon. Toj prajekt, što ŭ śniežni pastaviŭ na vušy sieciŭnuju publiku, trochi źmiakčyli.

Pastaralisia pryhoža ŭpakavać: kłopat pra aŭtarskija pravy i ŭsio takoje… Schavali vušy palityčnaj cenzury, prybrali šerah adyjoznych momantaŭ, zatušavali rolu Apieratyŭna-analityčnaha centra pry prezidencie. Ale nie sumniavajciesia: ščoŭkać dziubaj tam nie buduć.

Dakumient napisany ćmianaj, błytanaj techničnaj movaj, budzie dapaŭniacca roznymi pastanovami ab paradku rehistracyi i h.d. Karaciej, daje šyroki absiah dla čynoŭnickaha ščyravańnia. A ŭ jaki bok jany ščyrujuć, my dobra viedajem.

Rehistracyja infarmacyjnych sietak, sistem i resursaŭ — voś vam adzin hiemaroj. Identyfikacyja «abanienckich pryład» (kampoŭ) i karystalnikaŭ (nas samich) — jašče adzin.

Nu i narešcie —

abmiežavańnie dostupu «na zapyt karystalnikaŭ». Na praktycy jano moža vylicca ŭ hłušeńnie nieŭpadabanych resursaŭ, najpierš padčas vybarčych kampanij.

Heta rabili i raniej, ale zaraz možna ŭžo nie tojačysia, nie maskujučy pad «niepaładki na linii».

Inačaj kažučy, dakumient choć farmalna i techničny, adnak zatočany pad vybaračnaje hłušeńnie kramoły.

Ulubiony mietad: usich trymać pad kaŭpakom i čas ad času rabić trapnuju «akupunkturu».

Va ŭkazie niama naŭprostavaha zahadu zładzić rehistracyju veb-ŚMI. Adnak nie rassłablajciesia. Mahčyma, prosta nie zachacieli dražnić Jeŭropu. Dać ža admašku možna ŭ luby momant. Bo

punkt pra patencyjnuju rehistracyju interniet-miedyj zakładzieny ŭ dziejny zakon ab ŚMI.

Pry hetym ukaz atrymaŭsia syry i eklektyčny, trochi padobny miescami na słavutuju dyrektyvu ab umacavańni dyscypliny. Štości śpiecham vykreślivali, štości upisvali, jak śpičrajtery ŭ dakład, što kroŭ z nosu musić być padrychtavany da peŭnaj daty. Kompleksnaha asensavańnia Sieciva jak źjavy ŭ tekście niama, panuje drobnatemje.

Nu nie carskaja heta sprava — zahadvać, kab stavili hipierlinki (adčuvajecca łabizm peŭnych ahienctvaŭ). Dziela abarony aŭtarskaha prava dastatkova šlifanuć adpaviedny zakon. A zahad, kab dziaržorhany mieli sajty dy apieratyŭna napaŭniali ich, naŭrad ci padvysić stupień hałosnaści. Što ŭtojvali, toje i buduć utojvać.

Zrešty,

hałoŭnaje dasiahnuta: padviedziena baza pad bolej žorstki kantrol nad anamalnym areałam volnicy ŭ aŭtarytarnaj dziaržavie.

Jak i klalisia čynoŭniki, ukaz nie zdušvaje Bajniet. A tolki miakka kładzie na horła čepkuju ruku.

Alaksandr Kłaskoŭski.

• 0
• 0
• 0
• 0
• 0
• 0
• 0
• 0