Šviejcarskaja premija adznačyła Sašu Filipienku za litaraturnyja dasiahnieńni

Saša Filipienka staŭ uładalnikam hałoŭnaha pryza Premii šviejcarskaha tavarystva abarony aŭtarskich pravoŭ ProLitteris, jakaja ŭručajecca štohod za vybitnyja dasiahnieńni ŭ litaratury i mastactvie, piša Reform.news.

Žury ŭ svaim abhruntavańni padkreśliła ŭmieńnie biełaruskaha piśmieńnika ŭ tvorach «pierapłavić hniatlivyja abstaviny ŭ mocnyja mietafary, kab zrabić adčuvalnaj absurdnaść palityčnych i ekzistencyjalnych situacyj».

Žury, u skład jakoha ŭvajšli francuzski piśmieńnik i pierakładčyk Valancin Dekap, paetka i piśmieńnica Maryna Skałava i šviejcarski litaratar Piter Stam, dali razhornutaje abhruntavańnie svajmu vybaru.

«— Niahledziačy na małady ŭzrost, piśmieńnik, jaki naradziŭsia ŭ Biełarusi i žyvie ŭ emihracyi ŭ Bazieli, užo maje važki tvorčy darobak: piać ramanaŭ, dźvie pjesy, šmatlikija publikacyi ŭ hazietach. Jaho pracy byli apublikavanyja šviejcarskimi vydaviectvami Diogenes i Noir sur Blanc i atrymali mižnarodnaje pryznańnie. Knihi Sašy Filipienki bazujucca na hruntoŭnym dakumientalnym daśledavańni, materyjale, jaki jon navatarska i daścipna pieratvaraje ŭ mastackuju litaraturu.

Saša Filipienka ŭmieje pierapłavić hniatlivyja abstaviny ŭ mocnyja mietafary, kab zrabić adčuvalnaj absurdnaść palityčnych i ekzistencyjalnych situacyj. Vykarystoŭvajučy satyru i dalikatnaść, jon rekanstrujuje toje intymnaje i banalnaje, što prymušaje ludziej tryvać ci zahaniaje ich u abjektyŭna nievynosnyja situacyi. Jaho humar — vybitny; na prykładzie čałaviečych losaŭ piśmieńnik nabližaje da čytača składanyja histaryčnyja kanteksty.

Uznaharodžvajučy Sašu Filipienku, žury taksama chacieła b adznačyć aŭtara, čyja karjera była paznačana značnymi asabistymi i palityčnymi ryzykami. Saša Filipienka — kaštoŭny śviedka, jaki ŭnosić svoj układ u razumieńnie sučasnaj hieapalityčnaj situacyi ŭ jakaści budaŭnika mastoŭ. I jon źjaŭlajecca pradstaŭnikom vialikaj supolnaści piśmieńnikaŭ, jakija žyvuć u Šviejcaryi, ale nie pišuć ni na adnoj ź miascovych moŭ. Jak žury, my rady dapamahčy Sašu Filipienku praciahnuć svaju važnuju pracu ŭ Šviejcaryi, atrymaŭšy ProLitteris Prize».

Zhodna z praviłami premii, uładalnik hałoŭnaha pryza (u 40 000 frankaŭ), vybiraje atrymalnika sponsarskaj uznaharody (10 000 frankaŭ). Saša Filipienka padtrymaŭ aŭtarku i pierakładčycu Mod Mabiłar, jakaja pierakłała na francuzskuju movu tvory rasijskich litarataraŭ Michaiła Šyškina, Huziel Jachinaj i Ramana Sienčyna.

• 2
• 0
• 0
• 4
• 0
• 0
• 0
• 0